Pasion pa carnaval
“Esaki ta e di dos temporada, despues di pasco cu mas mi gusta”, Cindy ta cuminsa bisa referiendo na e temporada di Carnaval. “Mi pasion pa carnaval semper tabata t’ey. Tur aña mi ta reuni nos grupo di amistadnan p’asina nos para hunto riba e ruta di carnaval y celebra e temporada aki. Tur aña un tema diferente y shirts no por keda afor. Same spot y ambiente manera tur aña: Veneno Crew”. Y no ta nada straño mirando cu el a lanta cu e ambiente di carnaval den famia tambe kendenan tabata reuni pa decora trailers. “Mi mama mes casi tur aña ta participa den Carnaval. E stima Carnaval”, e ta bisa. Pero di tur esaki di su infancia y adolecencia, kizas e temporada di mas bunita p’e ta e recuerdo di su participacion como reina grandi di Dakota. “ Esaki tabata un experiencia unico cu sigur a dunami hopi confiansa y seguridad den mi mes. Aki mi a logra sali como di dos finalista di Aruba su carnaval”
Un seccion...Pakico no?
“Tur aña mi tabata participa den fakkel cu grupo di amistadnan. Manera Januari habri, mi ta semper cla pa forma un grupo nos para hunto y gosa di e temporada. Tur parada nos ta presente sin falta. Balonnen optocht tambe a bira un tradicion di tur aña cu nos chikitinnan”. Cindy ta admiti cu e idea pa bin cu su mesun grupo tur aña tabata surgi, pero despues e tabata laga esaki toch un banda. “Semper e temporada aki nos ta bisa un dia nos lo participa. Aña pasa e oportunidad a presenta y manera Queeny a tuma contacto cumi, mi a consulta esaki cu nos grupo di amistadnan. Asina e idea a nace pa tin nos propio seccion y nos a ‘make it happen’ y presenta den carnaval 64 cu 12 participante cu e tema Exotic Creatures. “P’ami como un seccion completamente nobo, e riesgo grandi tabata e acceptacion y percura pa duna un bon presentacion riba caminda. Mi por bisa cu pa nos prome biaha e tabata tremendo. E acceptacion cu nos a ricibi y tur e bon comentarionan tabata simplemente ‘amazing’”.
E proceso
Mientras e exposicion di e trahenan di carnaval ta concentra den algun parada pa e publico, e preparacion tras di cortina di dje ta di lunanan largo hunto cu bo bida normal cu tambe tin cu continua. “Esaki sigur no ta facil, pues purba balansa famia trabou, training y hinca tempo den preparacion pa Carnaval. Tur cos ta a base di un ‘planning’. Tur dia mi ta rondia riba internet ideanan y tambe coordina cu tur encarga p’asina tur cos cana manera debe ser. Nos mester ta pendiente di cada detaye y cu nos propio estilo den esaki. Pa conceptualisa e diseño nos ta hiba nos ideanan na Ronchi de Cuba cual diseño final ta keda den su man. Un persona cu mi ta admira y sigur tin un aprecio grandi p’e pasobra semper e ta cla pa yuda. E material y acabado final ta den man di Edson Everon cu ta duna e realse na nos diseño. Dos persona cu sigur mi tin un aprecio y stimacion grandi pa nan. Mi ta gusta di ta semper diferente y mi ta kere cu esaki ta haci nos seccion uno diferente y cu sigur a logra ricibi bon comentario. Te cu dia di awe, esaki t’e satisfaccion di mas grandi.
E prijs kaartje
Aparte di e alegria, diseño, e pluma, piedra y ambiente cu e ta pa tin bo mesun seccion, e fundeshi crucial ta e gastonan; e prijs kaartje pa tuma parti na esaki. “Sigur esaki tin su gastonan cune, p’esey nos seccion ta organisa fundraising durante aña pa baha e gastonan pa persona. Facil e no ta pero trahando hunto (como teamwork) nos ta ‘make it happen’. Mi ta kere si cu e ta keda na cada grupo/seccion con nan kier presenta riba caminda. Meta ta pa logra brinda un pakete atractivo y sigur no mucho costoso. Ideal ta pa por brinda un pakete cu por paga pa luna of haci fundraising etc. Esakinan por ta un estimulo pa sigur tin mas seccion riba caminda y engrandese nos Carnaval mas ainda. Materialnan awendia no ta barata y no necesariamente bo mester usa lo mas caro pa bo luci riba caminda. E balor no financiero ta keda e reaccion cu nos ta ricibi di e publico. No tin mihor premio cu esaki. E mas importante ta pa nos seccion presenta bunita y bon riba caminda y sin laga afo goza di tur parada. Esey t’e satisfaccion di mas grandi na final di dia.
Kico por mehora
“Loke p’ami lo por mehora, ta keda e punto pa no pura e parada. Ta hopi tempo y dedicacion cada grupo ta hinca p’asina trece e mihor riba caminda. Duna cada grupo e chens pa presenta locual nan traha pa varios luna asina duro y laga nos tin e espacio di goza y demostra e publico locual nos a traha p’e”.
Mensahe
E publico na banda ta ‘amazing’. Nos Arubianonan ta dushi hende, e apoyo y aplauso ta uno cu no mi persona so, mi tin sigur cu cada un di nos participantenan, ta hiba serca di nan curason. Ban gosa di Carnaval 65! Be safe y corda cuida nos chikitinnan.
