Dia internacional di hende muhe ta mundialmente celebra y pa e celebracion aki organisacion Women empOwering Women (WOW Aruba) kier inspira nos ser femenino local y alabes aporta na un bon causa. Desde 2016 Fundacion WOW Aruba un organisacion di hende pa hende muhe contando cu 36 miembro a sa di realisa diferente proyecto como tambe un conferencia pa publico durante aña 2019 “Dare to Be”. E proyecto mas recien, esta e “Impactful Women Project” tin como meta pa nombra un caya/edificio of retonde na un hende muhe impactante den nos comunidad. Pues asina contribui na igualdad den genero manera ta stipula como ‘Sustainable Development Goal #5’ di United Nations.
A cuminsa cu e proyecto ‘Impactful Women’ na luna di Juni den 2020 y abase di votacion di nos miembronan, entrevista a wordo realisa cu diferente hende muhe impactante den nos comunidad, entre otro Sarah Quita-Offringa, Myrna Jansen, Nicole Hoevertsz y Joyce Pereira. Di e entrevistanan aki a surgi consehonan valioso y asina top 3 conseho a keda conhuntamente eligi pa nos celebra nos hende muhe den forma unico.
E diseño di e conseho den forma di frase (quote) a wordo desaroya door di nos propio miembro Vanessa Donata pa asina crea shirts y tas pa benta. Por admira riba e potretnan e tres diseñonan cu ta consisti di e silueta di cara como tambe e conseho valioso di e hende muhe cu a sa di impacta nos comunidad den area di religion, educacion y turismo.
Pa e coleccion di T-shirt y tas nos ta conta cu conseho di Sra. Myrna Jansen, lider den sector di turismo “ It’s not about women vs. men, it’s about collaboration, cooperation and complementing”. Di Sra. Joyce Pereira, prome hende muhe cu Ph.D. den Papiamento, “No sconde bo mes, no sconde bo ideanan. Laga mundo sa cu bo tey”. Y por ultimo di Zuster Juliette su conseho “No lubida bo balor propio”.
Cada tas re-usabel tin un costo di AFL. 20,- y T-shirts AFL. 30,- obtenible pa hende muhe y homber den diferente size. Fondo recauda lo bay pa donacion na Fundacion Contra Violencia Relacional sosteniendo asina e importancia di crea relacionnan sano.
Nos ta invita nos comunidad pa celebra hende muhe e aña aki, por pre-order bo T-shirt y of tas via nos email [email protected], nos Facebook page ‘wowaruba’ y via Instagram @wow_aruba. Cada compra ta inclui delivery.
Un mensahe poderoso por nifica hopi y yuda un otro, hunto nos por crea mas conscientisacion riba e topico di igualdad. Invertiendo den un t-shirt of tas cu ta resalta nos propio pionero femenino bo por motiva otro y na mes momento aporta na un bon causa.
