Turistanan Mericano purbando di scapa e ambiente toxico actual di politica na cas no a aprecia con esaki a mustra di sigui nan te den nan vakantie na Aruba. E post den fin di siman di un potret di bandera ‘Trump 2020’ for di balcon di un hotel local a ocasiona henter un conmocion cibernetico cu ainda por mira su efectonan.
Hopi di e miles y miles di miembronan di e grupo ‘Aruba – One Really Happy Island’ tabata pidi pa por fabor laga politica afo, ya cu ta temanan di isla so nan kier wak. Inevitabelmente e post a sirbi como espacio pa midi forsa entre fanaticonan di President Donald Trump y sostenedornan di candidato democrata Joe Biden pa medio di likes y comentarionan.
E episodio a saca na cla e hecho cu e administrador di e grupo ‘Aruba – One Really Happy Island’ no tin ni sikiera un cuenta activo mas cu Facebook, y cu tur e tempo aki en realidad no tabatin un supervision di loke ta keda publica. Ora esey a bira evidente, menos consideracion e usuarionan tabatin den expresa nan puntonan di bista. Un tabata bisa otro pa sali for di e grupo, mientras cu otronan a hacie di nan mes pa evita e tema.
Consecuentemente administradornan di otro gruponan similar p.e. di propietarionan di timeshare di un hotel specifico y di ‘All Things Aruba’, cual ultimo ta un di esnan mas popular, a cay aden. Nan a invita e miembronan pa pasa over pa nan grupo cu si tin un of mas administrador ta supervisa y implementa e reglanan di comunicacion, entre otro.
Hopi Arubiano cu tambe ta miembro di e tipo di gruponan aki pa diferente motibo, entre otro pa comparti informacion y conseho como ‘local’ na nos bishitantenan, tambe a tuma nota di loke a sosode, pero a mustra di keda na margen di e discusion. Algun so tabata pidi pa administrador interveni y pa tur hende miho enfoca riba e cosnan bunita y positivo di nos isla.
Como cu e Facebook Groups ta un forum di media social, no por controla mucho loke ta keda publica of ken ta participa (cu excepcion di e administrador cu, den e caso aki, ta MIA!) Entidadnan oficial manera ATA tampoco por haci mucho al respecto. Ta spera cu djis e tono di e intercambionan por baha y cosnan por sigui trankil durante e tres luna mas cu falta pa eleccion presidencial na Merca cu ta dia 3 di November.
