Concrete, un producto asina comun, uza tur caminda den construccion. Con bo por upscale un producto asina comun? Con bo por present’e na un manera elegante of transform’e pa e ta algo bunita? Carondina y Orlin a descubri e manera pa haci esaki creativamente. Uzando nan mannan y nan mente creativo, inspira pa diseño moderno y minimalista, nan a cuminsa cu un DIY project durante shelter-in-place cu a bira un marca riba su mes ofreciendo productonan unico traha den concrete.
ADORÉE
Carondina nunca a considera su mes un persona creativo. “Un cos cu semper mi tabata gusta ta fotografia, semper mi tabatin un camara cu mi”. Orlin si ta considera cu semper e tabata posee e gen creativo, for di chikito e tabata gusta pasa tempo cu su primo cu tabata traha cu tools riba brommer of e tabata wak su tata traha cu cement rond di su cas. “Tambe den e ramo di cushina hopi biaha bo mester ta creativo y purba wak e productonan pa uza na diferente forma cu no ta e manera comun”.
Como un ‘do it yourself’ project durante e shelter-in-place na 2020, Orlin y Carondina a bay traha doorstops di concrete pa nan cas. Despues di esaki nan a sigui experimenta cu concrete cu ta un producto hopi versatil.
E ta e producto mas uza den construccion pero tambe por wordo presenta na un manera hopi delicado y elegante. “Esaki a pone nos cuminsa brainstorm riba e concepto Adorée Lifestyle Concrete”.
