E disciplina di semper spaar y e gana di semper traha, a hiba cu apesar di tur adversidad di un pandemia, Cadir Lampe no a sinta keto den e momento te awor mas dificil cu a toke ora el a keda sin trabou. Riba 16 di Maart, Cadir a haya e notificacion cu e tin cu bay cas. E tabata traha c’un compania hotelero cual a informe cu pa motibo di e lockdown y cu tur turista mester sali for di Aruba, lo no tin trabou. Na iniciio, el a haci algun locura ora cu a anuncia cierre di frontera; “ Mi a core bay cumpra yen di entertainment pa cas y yen cuminda paso nos ta bay pasa mas tempo na cas. Mi tabata bay lama practicamente tur dia y tin dia hasta 2 biaha. Mi a wak yen di series riba Netflix te cu mi no tabata por mas”, Cadir ta contra. Pero dado momento el a realisa, cu e no por djis keda asina. Asina Cadir su mente a cuminsa traha riba kico e tin cu bay haci pa sobrevivi e pandemia aki, sin un trabou y sin un entrada.
AVOGATO – UN ESFUERSO CU TA ‘PAY OFF’
“Mi a cuminsa riba un diahuebs manera tur otro den mi auto cu 1 caha di mango, 1 caha di awacati, 1 caha di lamunchi y 1 caha di banana. Mi a core full e isla pa brinda fruta na cas di clientenan cu no tabatin auto of manera pa sali for di cas. Poco poco, segun mi tabata bende, mi tabata bolbe inverti e ganashi den e negoshi dor di ‘upgrad’e mi seleccion di fruta cu mas surtido. Mi a cuminsa ofrece fruta y poco poco a upgrade pa producto seco, despues fruta exotico y al final e biggest seller ta e famoso webo cu tur siman tin cliente ta bolbe bek p’e.
