Naci na Aruba, Brigitte Ellis (24) awendia ta considera su mes un persona exponi na basta influencianan y experiencianan internacional. Cu dos aña apenas, el a muda pa bay biba na Hulanda y no mucho tempo despues, el a muda cu su mama definitivamente pa Canada unda el a lanta y forma su mes bayendo un scol Frances. El a lanta ta papia Hulandes cu su tata, Ingles y Frances na Canada y Papiamento cu su primonan na Aruba. Semper e tabata biaha entre Canada y unda su tata tabata bibando pa trabou na e momento ey, sea Merca of Hulanda y mas cu claro, e tabata bishita su famia na Aruba, cada vez cu oportunidad tabata duna pa esaki.
“Mi ta sinti cu e hecho di a biaha tanto di mas hoben caba a dunami un bentaha y punto di referencia di e retonan di mundo y e oportunidadnan pa mi por a crece como persona den esaki. Un di e retonan aki semper tabata medio ambiente”.
CONSIENCIA AMBIENTAL
Brigitte ta corda e influencia riba dje di e documentario di ‘Al Gore, The Inconvenient Truth’ cu esaki a sali na 2006. “Mi ta corda cu hunto cu mi primanan nos a hasta scirbi un carta pa e tempo ey presidente Bush, cu nos Ingles kibra, riba e tema aki”. Aunke nan no a haya un contesta bek, Brigitte su pasion pa aporta na e lucha ambientalista no a calma.
Na scol e tabata parti di un team di grupo pro medio ambiente unda nan tabata haci proyectonan di limpieza. Tambe el a forma parti di un asociacion di sostenibilidad cu tabata haci proyectonan riba e tema aki. Cu 17 aña, el a dicidi pa muda pa Hulanda y bay biba cu su tata pa un tempo. El a cuminsa explora ki direccion di estudio sigui y eynan el a haya su interes den Liberal Arts and Sciences na Vrije Universiteit Amsterdam. “Mi a gusta e diversidad den e estudio. Exigencianan pa drenta den e scol tabata halto c’un admicion minimo di estudiantenan, pero ma dicidi pa bay p’e. Bo mester tabatin educacion equivalente na VWO cu puntonan halto, abilidad top den matematica, ingles y mas.
Mi a pasa e prome rond y despues mi a haci un otro test cu mi a pasa pa finalmente, mi mester a haci un entrevista. Mi a keda accepta y eynan mi a muda pa Amsterdam pa atende Universidad pa 3 aña, unda mi a gradua cu honors pa mi bachelor den Cognition & Anthropology. “Esaki mi a logra cu e sosten di mi famia y mayornan cu a keda motivami durante mi estudio pa no give up”. Un di mi actividad extra curriculum tabata traha cu e asosacion di sostenibilidad di Amsterdam unda nos tabata bin cu ideanan y posibilidadnan pa mehora nos medio ambiente.
Sea di pone bordji of por ehempel nos a bin cu prullenbak den stad unda nos tabata piki of motiva hendenan pa tira nan cabitonan di cigaria aden, na lugar di riba caya”.
Despues di a gradua, mi no tabata sigur kico lo tabata mi siguiente paso mesora. Mi a opta pa bay Aruba pa 1 aña, unda motiva pa mi tanta Arlene pa yud’e den un proyecto y mas cu claro. E tabata un bon decision p’ami, paso aparte di a gana tremendo experiencia c’un oficina top di abogacia y na e departamento di DIMAS, mi a haya e chens pa comparti cu mi famia, socialmente y goza di nos bunita beachnan.
Despues di Aruba, mi tabata sintimi cla pa mi siguiente paso, mi tabata kier a traha den un ambiente politico of diplomatico un caminda na mundo. Mi a scirbi un carta pa 3 diferente embahada y consulado. Mi a haya un reaccion for di Cape Town, Zuid-Africa pero e condicion tabata cu mi mester tabata registra na un Universidad pa por aplica. Ya mi idea tabata pa sigui pa mi masters y eynan mi aplica na universidad di Leiden pa Cultural Anthropology and Developmental Sociology cu tabata atraemi asina hopi. Mi a manda prueba di mi admision pa Cape Town y asina mi a keda accepta.
Na Januari 2019, mi a muda pa Cape Town pa 6 luna y p’ami esaki tabata un ‘life changing experience’. E escenario di seronan y naturalesa pa cuminsa tabata algo unico. Cu mi trabou na e consulado mi tabata mira hopi similaridad den e parti di identidad cu Aruba bou formacion Hulandes.
E cuestion di e formacion di identidad nacional di e pais bou di e formacion di Hulandes. Na Aruba, nos ta un mix di diferente nacionalidad pero toch nos tin nos mesun identidad como Arubiano. Basicamente, e ta importante pa tin e diferente comunidadnan aki rond dibo pa crea bo mesun identidad. Mi a dicidi pa traha mi thesis riba e tema aki cual mi ta trahando riba dje aworaki cu mi tin cu entrega na Januari.
ATENCION PA CLIMATE CHANGE
“Mi a dicidi pa tuma parti na e Global Climate Strike paso mi ta haya importante pa tuma parti na crea atencion na e topico aki. Hunto c’un amiga nos a traha bordjinan cu mensahenan di consientisacion pro medo ambiente y a tuma parti na e marcha organisa na Den Haag September ultimo. P’ami e tabata un di e experiencianan di mas special cu mi a pasa aden.
E simpel hecho di tabata rondona p’asina hopi hende cu mesun consiencia tabata algo hopi grandi. Pa loke ta Aruba, mi ta kere nos por haci hopi mas pero e ta cuminsa na educacion di e generacion di mas nobo. Nos tin cu realisa cu medio ambiente di mundo ta afecta nos tur, incluyendo Aruba.
Si nos por logra pa nos generacionnan lanta mas consiente di nos medio ambiente, nos como un isla chikito lo por manda un mensahe pa mundo henter cu por crece y multiplica. Mi ta kere cu nos mester por siña di otro paisnan y aplica esaki, manera por ehempel na Sur Africa unda nos tabatin un iniciativa cu tabata para pa co-creacion di proyectonan pro medio ambiente cu sosten di gobierno Hulandes y esaki a extende pa otro paisnan. Aruba por haci mas riba e parti di medio ambiente. Mi ta stima Aruba masha hopi mes y destino lo determina unda mi futuro lo ta cu esaki”
