E di 2 aerolinea mas grandi na mundo, Avianca, a tuma un paso drastico pa purba keda cu cabes riba awa durante e crisis di Covid-19. Diadomingo ultimo 10 di Mei 2020, Avianca Holdings cu ta opera bou di e bandera Colombiano a aplica pa e capitulo 11 di ley di bancarota na Merca, como parti di nan plan di reorganisacion pa busca na mengua e impacto di Covid-19 riba nan operacionnan.
Esaki a bin na momento cu e plazonan pa cancela nan debenanan tabata yegando serca sin posibilidad pa nan por cumpli cu esakinan y sigui opera na mes momento. Pues cu e paso aki, e aerolinea lo purba sigui opera p’awor mientras nan ta purba haya financiamento pa enfrenta nan obligacionnan. Avianca a anuncia caba e ciere di su operacionnan na Peru, loke ta nifica perdida di empleo pa centenar di nan trahadornan.
E aerolinea haci varios intento pa haya yudansa di gobierno Colombiano, te awor sin resultado positivo pa nan. E paso aki lo duna Avianca e espacio un rato pa hala un poco rosea mientras nan ta para dilanti debenan cu ta acumula na 4900 miyon di dollar riba plazo corto. E compania ta keda cu confiansa cu nan lo por por keda rescata pa e gobierno Colombiano, apesar di ningun señal cla riba esaki.
E situashon dificil aki di Avianca ta un efecto directamente di e pandemia di Covid-19 cu a causa un disminushon di e viaheronan aereo pa un 90% globalmente. Avianca no a realisa vuelonan regular di pasahero desde fin di maart y mayoria di su mas di 20mil empleadonan no a haya pago durante e crisis tampoco. E compania a laga sa cu nan no tin fecha pa reanuda nan operacionnan ainda debi cu nan centronan principal manera Colombia- El Salvador y Peru tin nan trafico aereo completamente sera. E ceramento di operacionnan di Avianca na Peru ta representa un 5% di nan entradanan. “Na e momentonan aki, nos no tin liquidez pa mantene un operacion cu perdida”, e director comercial di Avianca, Silvia Mosquera, a informa.
Prome cu e explosion di Covid-19, ya tabatin advertencianan riba e situashon financiero fragil di Avianca. Prome cu tur esaki, ya KPMG a mustra su dudanan riba continuidad di e compania pa 1 aña mas. E crisis di e aerolinea a hibanan na un degradacion di S&P cu su accionnan sera na 88 cent na New York mientras cu na 2014 esakinan tabatin un balor cu tabata surpasa 18 dollar.
