Bay studia afor na un pais leu di cas y bira independiente ta un paso desea di hopi hobennan pero tambe ta bin tin biaha cu retonan y por ta ‘scary’. Mientras algun studiante tin e suerte kizas di tin famia cu por yudanan regla hopi asunto of hasta dunanan bon giua unavez nan yega Hulanda, no ta tur hoben tin e suerte aki. Samer Hamawi (26), un hoben Arubiano cu a bay Hulanda 7 aña pasa y awendia ta biba na Barcelona, Spañe a haya e inspiracion pa duna su aporte y bin c’un portal cu por centralisa e informacion aki un solo caminda.
“Despues di a studia na Hulanda fe 2013 pa 2017, mi a pensa pami mes “Si mi por a bay bek na 2013, kico lo mi kier pa ta diferente”?. Mi contesta ta e siguiente: Pa tin mas informacion di kico mi por spera na Hulanda y kico tur mi mester durante mi ‘daily life’ pa haci mi bida mas facil. Asina mi a lanta c’un idea pa crea un Knowledge Center unda tur e studiantenan cu ta preparando pa bay studia na Hulanda por haya informacion ‘with the click of one button’. E ta pa tur hende cu a caba Havo/VWO/EPI cu ta preparando pa bay Hulanda. Ora bo habri e google sheets, e ta manera un starter pack cu tur links, for di cua apps pa download, pa con bo ta cambia bo rijbewijs for di Aruba pa Hulanda por ehempel”.
Samer Hamawi su mes a studia International Business na Den Haag. Desde 2017 e ta na Barcelona unda el a haya un trabou como Campaign Specialist pa un Google Proyect pa e compania Teleperformance. Actualmente e ta e training team leader di e Proyecto completo. “E cos ki ta algo cu mi ta haci ‘on a daily basis’ pa mi trabou, dus mi ta develop hopi cos. Awe ma lanta cu e idea di give back na Aruba paso tin hopi informacion cu hopi Arubianonan studiante cu ya yega Hulanda, no sa”
