Awe sigur bo a lanta y topa c’un cantidad di screen preto riba e varios medianan social existente. E motibo di esaki tin e number di ‘Black-Out Tuesday’.
Idea di esaki ta pa yena tur medianan social cu e cuadro preto scur aki, cual normal lo ta yena cu tur tipo di informacion y imagennan di su miyones di usuarionan cu e fin pa educa hende tur rond mundo riba e movecion contra racismo enfocando riba e pensamento di Black Lives Matter.
Organisadornan a bisa cu nan kier pa e diamars preto aki ta un dia cu mundo por desconecta di trabou y conecta cu e comunidad riba e pensamento pa bin cu pasonan di accion pa trece cambio y responsabilidad y cambio contra violencia y racismo.
MOTIBO CU HOPI TA PONIENDO NAN SCREEN PRETO
George Floyd di 46 aña a muri dialuna dia 25 di Mei 2020 durante un aresto unda e polis Derek Chauvin tabatin su rudia ta primi na su nek y bou wowo di su otro coleganan cu no a interveni apesar di ruego di Floyd cu e no tabata por a hala rosea. E agente Chauvin tabatin su rudia riba e nek di Floyd pa un total di 8 minuut y 46 seconde y 2 minuut y 53 seconde despues cu Floyd no tabata responde mas.
E movecion di “Black Lives Matter” movement, a cuminsa na 2013, incialmente como un social media hashtag prome cu el a bira un movecion di protesta despues di e absolucion di culpabilidad den e caso di George Zimmerman den e tiramento mortal di e teenager Afro-Mericano Trayvon Martin e aña prome.
Mescos cu otro partinan di mundo, por a mira na Aruba tambe un cantidad di nos ciudadanonan a marca nan screen preto cu mensahenan di solidaridad pa loke ta igualdad.
Celebridadnan rond mundo tambe a uni nan mes na e movecion aki cu mensahenan directo di sosten riba e movecion aki riba un diamars scur.
