E activista local contra abuso sexual di nos muchanan, Lisette Gomes di fundacion “Mi Voz ta bo Voz, a post un peticion na comunidad di Aruba pa yuda kita e pelicula ‘Cuties’ for di Netflix su portofolio cu ta poni pa estrena dia 9 di september, 2020.
E peticion ta pa firma digitalmente e peticion online pa eliminacion di e pelicula aki.
Te awor mas di 30 mil persona a firma e peticion aki cu ta representa un strepi cora pa Netflix pa pone e pelicula aki riba su portofolio. ‘Cuties’ ta un pelicula cu a keda lansa prome bes na Sundance Film Festival. E trailer di e pelicula a pasa caba e siman aki riba YouTube y tin un NC-17 rating.
E storia den e pelicula ta trata di un mucha muher, Amy, cu ta cuminsa rebeldia contra su famia di tradishon conservativo y ta bira fascina c’un grupo categorisa como un ‘free-spirited dance crew,”, segun e descripcion poni awor. Pero, inicialmente e descripcion poni pa Netflix tabata : “Amy, 11, becomes fascinated with a twerking dance crew. Hoping to join them, she starts to explore her femininity, defying her family’s traditions”. Netflix a haci e cambio y a pone un disculpa pa e descripcion cu nan a pone prome. Aparte di e descripcion, tin e poster inicial cu a usa, cual a keda referi na dje como ‘disgusting”. Mesora a cambia e poster original tambe pa un otro pero no a confirma si e artwork a keda traha pa nan mes of un agencia priva.
E protesta di mayoria hende cu a firma e peticion digital aki ta debi na e edad di e hobennan (11 aña) cu ta keda bisti provocativamente y exponi ta baila den forma sexual, den e pelicula. “E cos ki ta crea pa entretenimiento pa e adultonan cu ta pedofiel”, ta entre e comentarionan duna.
