Aruba lo haya su prome Middle-Highschool Montessori na Augustus

E grito constante pa opcionnan diferente den nos sistema di educacion ta cada vez mas fuerte. Desde algun aña caba esaki ta andando unda personanan individual como tambe grupo di mayornan y docentenan mes, a cuminsa pusha pa bin cu alternativanan diferente pa ofrece educacion na nos muchanan. Motibo principal, tur mucha ta diferente y ta sinti cu sistema di educacion na Aruba ta stanca y no ta conoce inovacion di tal indole pa ofrece mas opcion na muchanan. Asina scolnan cu sistema di K-12, online schooling pa menciona algun, a cuminsa bira un realida. Ademas di esakinan, desde algun aña caba, Aruba ta disfruta di e sistema di scol Montessori, pero den su calidad di kleuter y scol basico primario unicamente. Awor e informacion ta un realidad unda e grupo di muchanan cu ta den e sistema aki, lo por ta trankil paso lo tin continuacion cu apertura di e prome Middle-Highschool Montessori School na Aruba. Pero esaki ta habri tambe pa studiantenan nobo cu por sali di e sistema tradishonal pa cambia pa esun di Montessori, sin problema algun. E prome Middle-Highschool Montessori School aki ta un Proyecto c’un dama docente Arubiano na cabez, Irayka Yanez.

“Desde cu mi tabata haciendo mi opleidingnan na IPA y na Hulanda, mi tabata haya e filosofia di Dr. Maria Montessori hopi interesante. Durante mi estudio di Onderwijskunde nos a profundisa mas den Dr. Montessori su investigacionnan y metodo. Pero locual cu a impactami mas, ta ora cu mi a experiencia e metodo den practica. Esaki a pasa pa prome biaha na Beautiful Sun Montessori (kleuter) situa aki na Aruba na Balashi. Den e tres aña nan cu mi yiu muher mayor Elly tabata alumno di e scol, mi a siña conoce e practica mas di cerca, y esaki a horta mi curason por completo. Pero e motivacion pa habri e scol mes a presenta dos aña pasa, ora cu Elly a drenta Upper Elementary na Nos Fortalesa Montessori Elementary School, cu a pone nos cuminsa pensa what’s next despues di elementary. Y eynan ta caminda cu e pregunta a bin dicon no habri un Secondary Montessori School. No pa Elly so, pero tambe pa tur otro alumnonan cu ta sinti cu e sistema aki ta pas miho pa nan”

“E beneficionan ta infinito. Pa cuminsa, Maria Montessori su sistema no ta traha solamente riba e parti academico di un mucha, sino riba ful e ‘ser’ di e hende – den e caso aki e mucha. E meta principal ta pa e mucha por yuda su mes, pa e ta mas independiente posibel, y cu e lo por ta mas flexibel pa adapta su mes na e cambionan cu e mundo ta ofrece. Sin lubida, un di e propositonan principal ta pa desaroya un mucha cu ta emocionalmente sano”.

“Na prome luga, sigur educacion di Montessori ta un educacion mas personalisa. Un di e beneficionan di esaki ta cu e klasnan ta consisti di tres edad den e mesun klas. Esaki ta stimula leadership den e alumnonan. Den e caso aki, e scol lo bay tin dos klas, un pa e edad di 12 pa 15 aña y un klas pa e edad di 15 pa 18 aña. E sistema aki tambe ta duna e studiante e oportunidad di por diferencia den su nivel. Si e studiante ta sinti cu e kier y por avansa den e tareanan concerni, e por haci esaki hunto cu e alumnonan mas grandi cune. Pues no ta asina cu ta paso un alumno tin 12 aña, ta e nivel di 12 aña e ta haya. Si un alumno kier avansa pa un nivel mas halto, esaki ta posibel. Ademas, e parti di keda sinta no ta existi den e sistema aki. Asina tambe e alumnonan mas grandi ta yuda esunan mas chikito, y cada alumno su rol ta cambia segun cu nan sigui avansa den e scol. Na di dos luga, e parti cu Maria Montessori ta yama “Practical life experience”, ta na unda no ta enfoka solamente riba e parti academic, sino tambe riba e parti spiritual, fisico y emocional di e alumno. Esakinan ta e dosnan cu mas ta resalta, pero tin un lista largo di diferencia entre e sistema di Montessori cu esun tradicional”.

“E plan di e scol ta pa ofrece e comunidad di Aruba un metodo diferente den enseñansa y cu e mayornan por tin e escogencia den un metodo di enseñansa pa nan yiu. Tambe, pa tur e muchanan cu awo ta cabando e basischool di Montessori por keda den e mesun tipo di enseñansa cu nan ta custumbra cune ora nan yega scol secundario. E scol ta pa tur mucha di edad di 12 pa 18 aña. Nos lo cuminsa e aña escolar aki cu e Middle School cual ta pa muchanan di 12 pa 15 aña. Si tin suficiente peticion pa e High School, cu ta pa muchanan di 15 pa 18 aña, lo por considera pa habri esaki tambe na augustus venidero”.

“Lo trata tur materia cu nos conoce den scolnan secundario, solamente cu den e caso aki, nan lo no wordo duna den un manera isola y sin e conexion cu otro. E filosofia di Dr. Maria Montessori, cu e muchanan ta haya den basisschool, ta e asina yama Cosmic Education. Esaki ta nifica cu tur cos aki na mundo, di un manera of otro, ta conecta cu otro den un sistema mas grandi cu nos mes. Nan ta yam’e tambe e Bigger Picture. Esaki lo sigui den e scol secundario tambe, na unda e relacion entre e “vaknan” ta mas visibel y e alumnonan por experiencia mesora e pakico di e “vaknan” door di pone esaki den practica na e mes momento cu nan ta siñ’e. Pues nos ta duna e teoria su balor practico mesora atraves di, entre otro, Field Trips.

E manera di duna les ta basa riba e sistema di “inquiry-based learning” cual ta stimula e muchanan pa pensa critico. Inquiry based learning ta basa riba preguntanan cu ta bin di e alumnonan mes cu despues lo keda investiga door di nan mes y presenta den klas. E “rooster”, manera ta keda yama den e sistema tradicional, ta hopi flexibel cu dos “open workcycle” cada un di minimo 90 minuut pa dia. Den e 90 minuut nan aki, e alumno por traha riba su tareanan of su so, den su grupo, den klas of pafo di klas y cu ayudo di esun nan mas grandi of cu guia di e maestro. Lesnan klassikaal lo ta na un minimo di dos biaha 20 minuut pa dia. E parti di practical life den e scol secundario ta encera cuido di nan mes, esaki ta inclui e parti di e “lunch program” na unda e alumnonan mes ta prepara nan snack y nan lunch tur dia. Den futuro, nos lo uza productonan cu nan mes ta planta. Esaki pa stimula sostenibilidad duradero. Banda di esaki, nan lo ricibi guia den mentorship p’asina nan siña conoce diferente profesion pa cuminsa orienta nan mes pa locual ta nan interes pa futuro. Tambe mi kier menciona cu nos lo ta trahando hunto c’un Montessori Secondary school na Mississipi na unda cu e parti internacional y intercultural lo tuma lugar. E alumnonan di e dos scolnan aki lo comparti cu otro nan experiencianan y tambe asina siña di otro. Ken sa cu nos por logra haci e intercambio aki fisicamente tambe”.

Con posibel e ta pa aplica e sistema di Montessori den su totalidad aki na Aruba? ”Nos no ta leu di esaki. Maria Montessori ta papia di “4 Planes of Development” cual ta cuminsa na 3 aña te cu 24 aña di edad. Cu e scol secundario aki, ya nos ta na e 3^rd plane of development y por ofrece e sistema aki na muchanan di 3 aña te cu 18 aña”.

“Den e metodo di Montessori nos no ta yame docente, pero e guia of e coach. Pa e prome aña nos lo tin dos guia full-time, un di nan t’ami mes, y tres guia part-time. Dos di e guianan part-time ta residencia na Merca y lo duna nan les atraves di un plataforma online”.

“E scol lo cuminsa opera pa e aña escolar binidero cu e Middle School, cual ta edad di 12 pa 15 aña (7^th to 9^th grade) y den futuro cercano lo habri e High School cual ta pa edad di 15 pa 18 aña (10^th to 12^th grade). Pa mas informacion y pa aplica na e scol por bishita nos website www.ynzmontessori.com y tambe por sigui nos desaroya atraves di nos Facebook page cual ta YNZ Montessori High School Aruba”.

“Mi mes a cuminsa mi trayectorio den enseñansa na IPA como alumno. Eynan mi tabata por a stage un blok na un scol secundario y asina mi a ripara cu mi a click cu e doelgroep aki di 12 pa 18 aña. Door cu IPA no tabatin e posibilidad pa gradua como docente di voortgezet onderwijs e tempo ey, mi a bay studia na Hulanda. Eynan mi a logra e diploma di 2e graads leraar den e vak di Scheikunde c’un minor den Natuurkunde. Despues di esaki, mi a sigui mi estudio na Universidad di Utrecht unda mi a obtene mi bachelor den onderwijskunde y mi master cu tres specialisacion cual ta Educational Design and Implementation, Personnel and Consultancy y Development and Assessment of Competences. Actualmente, mi ta completando e estudio pa bira un Certified Secondary Montessori Guide. Mi tin 17 aña den enseñansa riba diferente tereno, di duna les riba diferente nivel di enseñansa, desaroya opleiding nan, te cu dirigi un scol. Door di a conoce e diferente terenonan aki y cu e experiencia cu mi a haya for di cada un di nan, a hacie un poco mas facil p’ami pa duna mi mes un reto nobo.

Locual si ta dificil pa mi ta cu mi lo no tin e siguridad di un salario fiho pa ofrece mi famia cu e cambio aki. Y tampoco mi no sa kico e cambio aki lo nifica pa mi famia. Danki Dios cu te awor nan ta apoyando mi den e soño aki”.