Desde e anuncio di 10 casonan nobo di transmishon local di Covid-19 den 2 dia, ta parse cu e sugerencia di parti di gobierno pa bisti mondkapjes ta hayando oido. Por a ripara establecimentonan cu borchi poni na entrada cu mester tin mondkapjes bisti prome cu drenta. Mientras venta di mondkapjes ta mustra di a aumenta na botica– y otro tiendanan rond, e opcion pa mondkapje traha na Aruba tambe ta hayando mas demanda. Lienchie Merryweather, kende normalmente ta druk ocupa creando vestuarionan di carnaval e.o., awor ta bezig trahando mondkapje pa cumpli cu e demanda grandi cu tin awor pa esaki. “E prome dia mi a bende mas cu 800 mondkapjes. Tur hende kier un pa nan y nan famia”, Lienchie a splica na Xclusivo Magazine Online. “Un locura, nos costureronan no tin man suficiente pa sigui cose, asina mes cu tin mas hende ta trahando of bendiendo mondkapjes na Aruba. E ta un panico sigur”.
Lienchie a haci donacion di e prome 500 mondkapjes cu el a traha pero desde dialuna e demanda a aumenta inmensamente. E mondkapjenan cu Lienchie ta traha ta consisti di varios material, color y diseño mescos cu size pa mucha chikito te cu adulto y tur ta bin cu filtro pega na nan. Mientras e casonan ta aumentando na Aruba pa loke ta transmishon local, e peticion pa bisti mondkapje awor ta hayando oido hopi cla. Cu e bistimento di mondkapje lo bira algo obligatorio na Aruba ainda no ta conoci, mientras cu na algun ciudadnan na Hulanda, Spanje y België den cierto areanan, uzo di mondkapje a bira obligatorio y ta mara hasta na un multa si no cumpli cu e regla aki.
Pa loke ta efectividad di mondkapje den evita contagio di Covid-19, esaki ta keda un tema cu hopi ta debati cu su pro y con. Na final, realidad ta cu mundo ta ‘boca abou’ den man di un pandemia na e momentonan aki unda hopi opinionnan den media ta bisa cu esaki lo por cambia te na momento c’un vacuna keda crea y distribui.
