A restaura ex edificio di DOOV, Cu ta oficina principal di RdA y FMSA.
ORANJESTAD, Aruba – 30 di september 2017: Refineria di Aruba N.V. (RdA) a celebra inauguracion di nan oficina nobo, situa den e mesun edificio unda antes tabata acomoda DOOV. E edificio ta uno cu ta marca acionnan importante den e mundo petrolero, como cu pa prome biaha den mas cu 90 aña Aruba ta doño di su refineria. E trayecto pa remodela e edificio tabata uno largo ya cu e alcancenan di trabou tabata extenso despues di hopi añanan di abandono. A restaura e edificio, a haci cambionan, a mueble di nobo y haci’e cas pa e oficina principal di RdA y Fuels Marketing & Supply Aruba N.V. (FMSA) e compania principal di suministro di combustibel ariba nos isla, cu ta resorta directamente bou di RdA. E edificio lo bira e centro di tur asunto petrolero y di e Refineria di nos pais.
E anochi a inicia cu un discurso elocuente di e Managing Director y CEO di RdA, esta Alvin Koolman. E ehecutivo, no ta un cara desconoci den e mundo petrolero di nos pais. Sr. Koolman, a introduci un video cu a repasa e historia petrolero di Aruba, con el a inicia, evoluciona, a pasa den su bon añanan, a conoce su añanan menos bon y cu awor ta para na inicio di temponan nobo y prometedor pa nos economia. Minister demisionario, ing. Mike de Meza tambe a hiba palabra, y a elabora riba e historia y trayecto di negociacion cu a culmina na re-apertura di nos refineria.
E discursonan a termina cu un tremendo show di luz y candela cu tabata sali for di riba e edificio. A sigui un presentacion di banderanan acompaña pa e melodia di nos himno nacional, cu a marca apertura oficial di e edificio. E prome nan pa drenta e edificio tabata e Managing Director y CEO di RdA, Ministernan y ehecutivonan di Citgo Aruba Refinery. Simultaneamente, a sigui un show multi-cultural cu a rendi un homenahe na e diferente nacionalidadnan cu a haci Aruba nan hogar durante e decadenan. E show tabata presenta pa Aruba y Cocorico Dancers, sin lubida e tremendo presentacion di e banda Tsunami.
E “highlight” di e evento sin duda tabata 12or di anochi, ora a habri dia 1 di october 2017, cu a marca e prome aniversario di RdA y FMSA como companianan nobo y doño di e refineria cu sin duda lo hunga un rol esencial den desaroyo economico di nos pais, den e añanan nos dilanti. E celebracion a sosode cu champaña y un asina yama “hora loca”. Invitadonan a disfruta di un anochi sumamente exitoso y inolvidabel. Refineria di Aruba N.V. kier a yama danki na tur cu a sostene nan den un manera of otro, y tambe danki na tur invitado nan y comunidad cu a celebra hunto cu nan.
Pa mas informacion bishita Refineria di Aruba N.V. su website, cu awor ta acesibel pa asina comunidad di Aruba tambe por disfruta di e diferente video nan di informacion, por sera conoci cu RdA y FMSA su team di experto nan y e structura nobo di RdA. Otro metodo nan pa comunica cu RdA ta via su pagina di Facebook, of por manda un e-mail na [email protected].
