Andrew Curiel no mester mucho introduccion na Aruba. E ta bon conoci como e top professional make-up artist na Aruba cu experticio y guia cu cursonan haci na New York den e arte aki. Aparte di esaki, el a perfecciona su mes tambe como un top costume designer y creator cual tecnicanan el a siña bou guia y estudionan di e top fashion designer y costumer Bob Mackie pa menciona algun. Na Aruba añanan atras, hopi por corda e trabounan cu Andrew Curiel a despliega tempo cu nos isla tabatin show y produccionnan internacional manera Oba Oba Brazil Show, Ginger Corte’s Show, Don’t tell Mama, Let’s go Latin y Neil’s 100 year Broadway Show. Berdad ta cu Andrew Curiel ta resalta full aña pa su creacionnan pero awor ya na inicio di 2019, un biaha mas el a demostra su abilidadnan un biaha mas. Esaki el a haci cu piezanan unico cu el a crea pa dos participante pa eleccion di reina den Aruba su carnaval, kendenan ambos a resulta victorioso. Con e ta logra crea esaki y kico ta su pensamento di con por sigui mehora, el a comparti cu nos.
1. XCL: For di ki tempo bo a sinti cu bo tin un talento creativo?
For di mi infancia semper ma gusta handenarbeid y crea.
2. XCL: Con bo tabata bai om cu esaki tempo bo ta chikito?
Mi semper tabata curioso pa sa con e ta pa traha y crea algo di nada dus for di ‘scracth’y asina mi tabata busca pa sa con e ta wordo elabora y cu ki material e ta wordo traha. Mi meta ta semper perfeccion.
3. XCL: Con bo a desaroya e talento aki banda di bo trabou convencional?
Tempo cu mi tabata studiando caba mi tabata bezig cu esakinan, y mi a cuminsa baila c’un grupo di carnaval na hotel y eynan mi a sigui desaroya mi talento di crea. Mi tabatin e dicha di a siña welder y soldeer pa mi por a crea mi piezanan y asina mi a sigui siña. Mi a haya e chens pa bay Trinidad y Tobago cu Carifesta y haya lectura cu diferente workshop di e maestro di carnaval cu e tempo ey a evoluciona e carnaval na Trinidad cu tabata Peter Mensah y Wayne Berkely. Nan tabata e dos designer y creadornan mas grandi cu Trinidad y Tobago a conoce den historia di nan carnaval.
4. XCL: Kico ta e periodonan di aña cu bo ta mas activo?
E periodo cu mi ta mas druk ta varia, e ta depende. Mi a haci Sint Maarten hopi aña y Corsou mi a haci e ultimo dos añanan aki net pa ora di eleccion di Miss Universe.
Mi a duna workshop na Corsow unda mi a siña grupo LE VIE con pa traha, arma y diseña costume y headpiece di carnaval Pa loke ta eventonan diferente, mi a haci pa Burning Man tambe aña pasa.
Mi a cuminsa pa e festival aki na Las Vegas unda mi a traha costume cu a keda bendi eynan. Dus mi ta creando diferente costumes, no pa Aruba solamente sino tambe pa exterior.)
5. XCL: Kico bo ta prefera, makiyahe of traha costumes?
Mi pasion y mi bida ta arte, dus p’ami djis di por crea caba ta yenami c’un sastifacion. E factor crea ta mi ‘drive’ y por haci cliente contento c’un artpiece of un new look cu mi lo crea cu make-up pa, ta un satisfaccion completo p’ami.
6. XCL: Con bo ta inspira?
P’ami, inspiracion ta cuminsa den yega na e lineanan di guia con pa crea algo y pa esey mester papia cu e clientenan y haya sa kico ta nan colornan preferi, nan gusto, y asina mi ta cuminsa nota tur cos y di eynan mi ta cuminsa inspira pa e piezanan of e look perfecto pa nan.
7. XCL: Con e subida di prijs mundial riba ‘luxury items’ ta afecta bo trabou?
Cu inflacion mundialmente tur articulo a subi y impuesto ta hunga un rol grandi, vooral cu taxnan halto principalmente ‘kinan na Aruba. Mester baha of elimina impuesto riba articulonan cu ta pa engrandece nos carnaval cual ta sinonimo cu nos cultura.
8. XCL: Bo ta sinti cu hendenan ta aprecia bo trabou y ta dispuesto pa paga p’e tambe?
Danki Dios cu mi trabou ta aprecia pa mi clientenan, y mi ta entrega un trabou completo na gusto di cada cliente.
9. XCL: Na ki momento bo a dicidi cu bo ta laga bo trabou convencional y bai completamente riba make up y costume?
Na momento cu Aruba Trading Company a sera den caya grandi y mi a haya e oferta pa termina mi trabou eynan na 2013. Di eynan mi a cuminsa riba mi mes, e no tabata facil na cuminsamento pero cu preseverancia y poco poco pero sigur mi a logra.
10. XCL: Cual ta e piesanan mas memorabel cu bo a traha?
P’ami tin varios piezanan cu a marca e historia pa Aruba su Carnaval, Solar Eclipse ta un di nan, Anochi tur pushi ta preto y Atlantis body rolls color agua cu mi mes a usa y a presenta den carnaval, pa National Costumes pa Miss Universe-The Blue Lady pa Corsou y asina mi tin hopi mas.
11. XCL: Pa ken tur bo a diseña y traha e aña aki di carnaval?
E aña kinan mi a diseña dos seccion pa Empire, Reina hubenil pa Dushi Carnival group y Sra Empire. Y apart di esakinan mi ta decorando pa algun otro gruponan tambe piezanan individual .
12. XCL: Pakico nos no ta mira abo mes hopi mas riba caminda den bo mesun creacionnan?
E motibo ta cu mi ta asina ocupa cu make-up y traha 13 pa 16 ora non stop ta imposibel pa mi por particpia den paradanan despues di un trabou asina largo.
13. XCL: Kico ta bo ambicion cu bo talento?
Mi ambicion ta pa antende y participa den mas carnavalnan den exterior y siña mas pa mi keda amplia mi conocimento den kico ta come y bebe di carnaval.
14. XCL: Con abo ta mira e evolucion di nos carnaval y kico falta, segun abo pa cambia of avansa?
Wel mi a participa y traha pa carnaval di Sint Maarten y Corsou y nan ta subiendo poco poco e nivel di nan carnaval tambe. Mi a design y duna workshop y a siñanan con ta traha y arma un headpiece, con pa arma e bodypiece y con bo ta dorna un costume. Poco poco bo ta wak e adelanto den e grupo y bo ta wak cu nan ta evolucionando na e parti eynan. Mi a participa tambe na e carnaval di Rio de Janeiro y bo ta wak con nan ta traha y con organisa nan ta. Esey ta e parti mas importante den carnaval. Principalmente mi ta kere cu Aruba tin hopi pa siña di e parti di organisacion aki, por ehempel nan ta mas flexibel den e parti di importacion y nan ta engradece nan carnaval cu impuestonan mas abou y esey ta engrandece bo carnaval paso bo no por ta pagando algo dobel di prijs pavia di impuesto. Mi ta sinti cu mester bin mas aporte for di parti di gobierno. Tambe hotelnan no ta aportando suficiente na nos carnaval. Mi ta haya cu cada hotel grandi mester por adopta un grupo di carnaval y asina engradece nos carnaval pasobra nan ta esunnan cu ta probecha y enjoy mas di esaki siendo cu nan no ta participa cu ni 1$ pa e participantenan cu ta esunan cu tin cu paga tur cos pa por haci e carnaval. Compara di awor pa un 15 aña pasa un lighting parade y lo bo haya sa kico tabata un lighting parade di berdad. E gasto ta pisa riba lomba di e pueblo tur aña y e ta bisto. Tambe mi tin cu bisa cu e aña aki parse di tin mas problema, polemica y mas envidia. Tur cos negativo ta keda subi subi y esey no por.
Mi kiermen mester sinta analisa y evalua e cos aki debidamente paso si e keda bai na e stap cu e ta bayendo aki, cu duele na mi curason mi tin di bisa cu Carnaval di Aruba lo caba y tur esunan cu ta siña di nos, nan si lo engradece nan carnaval y sigui bay den top marcando nan presencia riba e mapa di carnavalnan rond mundo. Desafortunadamente esun di 65 aña di Aruba ta esun cu mas problema cu nunca di tur e historia di carnaval di Aruba.
15. XCL: Conseho final?
Mester stop di bringa otro y crea mentiranan djis pa hisa ego propio y trece divicion. Ami ta haci mi trabou cu amor pa tur hende y tur mi trabounan ta creacionnan propio cu mi ta comparti cu tur hende. Esmas, na mas cu un ocasion ma yuda otronan haya trabounan pasobra mi ta kere den yuda semper. Cu union unicamente por keda engrandece nos carnaval, cu desunion, ta su morto garantisa.
