Ta cuanto di nos no ta corda cu cariño nos participashon como mucha den carnaval? Recuerdonan bunita cu no tur mucha tin lamentabelmente y esaki ta algo cu Amarilis a purba evita mas cu e tabata por cu su grupo Little Groovers. Su meta ta pa logra pa muchanan di San Nicolas por tin recuerdonan y experiencianan bunita di carnival cu nan participashon den esaki. Amarilis a logra cuponan den parada cu su grupo di Little Groovers na prijsnan super abou y den algun biaha, hasta gratis pa participacion ya pa 9 aña sigui. Sinembargo pa carnival 66, lamentabelmente, e tin cu tuma un ‘break’.
Lanta den e bario di San Nicolaas, Amarilis Rodriguez Luciana ta e di 3 di 4 yiu. “Como mucha mi no tabata gusta carnaval mi mes debi na un mal experiencia cu a haci cu nunca mi a participa mas. Pero mi mama si semper a participa y ora ma bira adolecente, mi a cuminsa yude decora su trahenan y esey si mi a gusta masha hopi mes”, Amarilis ta conta. E idea pa bin cu grupo di carnaval a inicia via un grupo di amigo fanaticonan di Le Groove cu kier a mira e banda bek den parada di mucha.
Asina tambe Little Groovers a keda lanta na 2011. E tema cu a subi caminda cune pa prome biaha tabata Egypt Fantasy, cual tabata idea di un crew member. “Nos tabatin 29 participante unicamente y aunke e no tabata manera nos a spera, toch el a bay hopi bon mes pa esunnan cu a participa.
Nos motivacion pa e grupo di LG semper tabata pa engrandece Aruba su Carnaval di mucha”.
E team di Amarilis ta 7 persona cu ta traha pa pone e grupo riba pia y cu ayudo di sponsor, ta haci e posibilidad pa muchanan participa, hopi accesibel mes. Nos ta traha hopi duro mes durante e aña pa yega na fondonan pa cumpra tela y material. Nos ta bende ticket pa bbq aserca sponsornan cu ta yuda nos y asina logra un fondo a yuda nos. Pa participa cu Little Groovers nos ta cobra un suma entre 150 pa 165 orin.
Cu esey e muchanan ta haya nan paña e ora completamente cla. Mi sa haña sponser di amistadnan pa yuda e grupo di muchanan cu mi sa cu lo kier bay den parada pero ta cay duro pa nan mayornan”. Amarilis ta conta cu e emocion di e muchanan ora nan por participa den carnaval ta un satisfaccion grandi p’e tur aña cu lamentabelmente e no por cumpli cune e aña aki.
NO LITTLE GROOVERS DEN CARNAVAL 66
Pa nuebe aña Amarilis a logra bay cu su grupo di chikitinnan den Little Groovers y semer ta goza di aplauso na banda, pero e aña ‘ki, lo ta diferente. Cu dolor na su curason, el a dicidi di no participa den carnival 66. “E tabata hopi dificil pa tuma e decision aki. E situashon financiero a hunga un rol grandi den mi decishon y tabatin otro factornan cu a presenta aña pasa cu a haci mi desishon mas sigur ainda. Pero principalmente financieramente e ta birando dificil pa cubri e gastonan.
Pa haya sponsor financiero no ta facil y aña pa aña, e ta bira menos y mi miedo ta pa ora carnaval caba, mi keda cu debe di banda, cosedor of ken sea cu a haci trabou pa e grupo. Berdad ta cu mi a sinti cu esey ta e direcshon cu cos tabata bayendo y tabata mihor mi stop awor prome cu ta laat. Cu e lo bolbe pa e siguiente aña, Amarilis ta bisa cu tur cos ta posibel.
MESTER INVERTI MAS DEN CARNAVAL DI MUCHA
Amarilis no ta su so den e pensamento cu carnaval di mucha ta sufriendo. E ta mira cu cada aña tin menos participante, pues menos gruponan cu conclusion c’un parada cada vez mas chikito y cu esaki, un peliger pa e continuidad di carnaval riba su mes.
“E muchanan ta nos futuro carnavalistanan, si carnaval di mucha sigui manera e ta bayendo aworaki, keremi cu aki algun aña, Aruba su carnaval tambe lo ta hopi mas chikito.
Su mes, cu su experiencia den tur e añanan tras di lomba tin algun sugerencia; “Mi ta kere cu por ruleer e sequencia di e paradanan di mucha, por ehempel, un aña caba esaki na San Nicolaas, otro aña na Playa y asina succesivamente pa cada districto por benificia di e ‘carnaval maandag’ pa e muchanan.
Pa loke ta e fundacion di SMAC cu ta dirigi carnaval, Amarilis ta haya cu nan ta haciendo un bon trabou. “Mi lo bisa SMAC, sigui cu boso bon trabou, e ayudo pa cu gruponan di mucha sigur ta un alivio y spera nan sigui cu e bon trabou aki.
Mi ta kere cu no tin mucho mas cu nan por haci paso e sosten nanciero y falta di interes den participashon ta e gran problema den carnaval y mi ta spera cu esaki por cambia, pa beneficio di futuro di nos carnaval”
GRADICIMENTO
Mi ta gradici tur sponser, di e mas grandi pa esunnan di mas chikito cu semper a para y sostene Little Groovers. Na nos team completo y tambe na prensa, radio, cuerpo policial, full e organisashon di Smac y sin lubida e publico cu a sa di apoya Little Groovers all out.
