Cu un total di 51 mil miembro for di 100 diferente pais, All Things Aruba ta actualmente e grupo di fanaticonan di Aruba di mas grandi riba Facebook. Crea dia 31 di December di 2013 dor di David Seltzer, e grupo a conoce un crecemento exponencial durante ultimo aña, y mas ainda desde cu e pandemia a cuminsa. E tendencia di aumento di miembrecia ta continua y e administradornan ta yama esaki bon bini, mientras cu na mesun momento ta carga e responsabilidad di monitorea cu e grupo ta keda mes agradabel y dushi cu e isla cu nan ta stima. Ban conoce ken ta tras di ‘All Things Aruba’ y e origen di nan dedicacion na e grupo.
Administradornan
David Seltzer ta un chef di Massachusetts cu tin 28 aña bishitando Aruba hunto cu su casa. Ken Grille ta di New York y tin 16 aña ta bin Aruba. E ta un psicologo pensiona y fotografo profesional, hunto cu su casa, nan ta pasa casi 4 luna pa aña na Aruba. George Edwards ta un educador di New Hampshire cu ta biaha dos bes pa aña pa nos isla hunto cu su casa. Por ultimo, Doron Feder tin 37 aña biniendo Aruba cu su casa. E ta un optometrista retira cu ta biba na New York.
Fuera cu nan tur ta bin di e costa nor este di Merca, e demografico mas grandi entre nos bishitantenan, nan tin en comun un amor inmenso pa nos isla, su hendenan y ta propietario di timeshare local. “E ta en berdad nos di dos cas,” Grille ta bisa. “Nos dianan na Aruba ta yena di canamento riba beach, lesa bou di un palapa y un cocktail of un Balashi,” Edward ta comenta. Feder ta conta cu den nan 37 aña di ta bin Aruba 2 pa 3 biaha pa aña, “Nos a wak e isla crece y desaroya. Mescos tambe, nos amistad cu e hendenan di Aruba a crece. Nos ta haya cu nan ta di esnan mas bunita na mundo. Aruba tin un luga den nos curason.”
David a traha e grupo riba Facebook casi 7 aña pasa pasobra e kier a combersa cu otro hendenan cu tambe ta stima Aruba, den antesala pa un di su bishitanan y no tabata contento con e tono poco mas negativo ocasional den otro grupo. Na caminda e grupo a crece y a bira mas dificil pa maneha, pero tambe a bin mas persona dispuesto pa duna un man.
Popularidad
E secreto pa All Things Aruba keda un luga nechi y social pa comparti e amor pa Aruba, ta cu e gran mayoria di miembro ta hende, ta respeta e reglanan. Administradornan ta splica cu esnan cu no ta comporta, ta bay afo. Tur dia e administradornan ta recorda tur hende kico ta e meta di e grupo y kico no ta tolera. Seltzer: “E pagina nunca tabata miho cu awo! Ken tin un energia sin limite y a yuda pone All Things Aruba na un nivel nobo…”
E administradornan no tin un schedule pa atende cu e pagina, pero si, un dedicacion enorme. Nan ta hopi consciente di nan responsabilidad y ta check e pagina ki ora cu nan tin chens; sea ta mainta ora di lanta, of prome cu bay drumi. Durante dia tambe ta controla post, accepta hende nobo y interactua den e comentarionan. Nan ta admiti cu e ta tuma hopi tempo, pero tambe ta duna hopi satisfaccion di ta den contacto cu hende cu ta stima Aruba y cu e Arubianonan mes.
“Nos motivacion ta nos amor pa Aruba y nos deseo pa yuda e isla y su hendenan. Cosnan sigur a cambia den 2020 y mientras cu e meta principal di e grupo semper tabata pa promove Aruba. Esey awo ta mas importante cu nunca.” Ken ta admiti cu awo cu e grupo a crece, e ta miho ainda. Nan ta encanta di mira con hopi Arubiano ta drenta e grupo tur siman y awo e ta un luga caminda local y turista por comunica y yuda otro. E administradornan mes a bira famoso riba e isla cu turista y local cu ta reconocenan riba caya. “Atrobe, nos ta encanta e hecho cu tin asina hopi local, y ta djis logico cu esaki a haci e grupo miho ainda.” Seltzer ta comenta cu e localnan a bira e miho fuente di informacion den e grupo.
Otro factor cu nan ta atribui na e crecemento di e grupo cu hendenan local, ta cu nos hendenan tabata preocupa pa kico e turistanan tabata sinti of pensa tocante e virus. “Hende tabata spanta cu e turistanan no lo bolbe bek”. Tabata reconfortante pa nos wak y sinti e amor cu hopi hende rond mundo tin pa Aruba y cu nan no ta bandon’e awo den tempo dificil.
Moderacion
E dinamica den e grupo a mehora ainda mas cu e influx di hende nobo y Arubianonan. Ultimo temponan, ‘All Things Aruba’ a ricibi miles di miembro nobo cada luna. Bo ta ripara den e ‘feed’ di e pagina cu tin un smaak y energia nobo y agradabel. “Algun di nos ta haya potret pa wak di luganan cu nunca nos a yega di mira, haya un bista den e bida di e Arubianonan y tambe wak directamente e efectonan cu COVID tin riba e isla,”
Recientemente otro grupo similar a haya den un bataya di post entre su miembronan ribat tema di politica. Pa evita un situacion asina, e administradornan di All Things Aruba ta monitor e pagina 24/7 y poltica ta prohibi. “Nos ta recorda nos siguidornan frecuentemente cu no ta permiti politica, maldad of tiramento di palabra den e grupo.” Cu algun excepcion, tur hende ta respeta e regla ey. Adicionalmente tin e posibilidad di raporta un persona y asina miembronan mes ta yuda controla. “Nos no ta ria di saca un hende for di e grupo ora nan no ta sigui e reglanan.”
Pa futuro, e ekipo di All Things Aruba ta premira cu e crecemento aki lo continua y lo bira un herment ainda mas grandi pa comparti informacion entre local y bishitantenan. Tambe ta spera di por sigui yuda oficialnan comunica inmediatamente cu nan base di turista ora cu ta necesario, y pa negoshinan local por promove nan mes y “e maraviyoso isla di Aruba.”
