Alexander Borja – Un personal trainer di curason

Realmente semper mi a dedica mi mes den baile for di tempo cu mi tin tino y p’esey semper ma mantene mi mes flaco”. Alex a yega Aruba 7 aña pasa realmente como parti di un show di baile na hotel. Su prome encuentro den un gym tabata desde su 18 aña caba tempo cu ya caba e tabata baila. “ Mi tabata kier tin mas musculo y mehora mi aspecto fisico y asina mi a cuminsa hisa peso sin ningun hende pa guiami. Mi ta corda mi no tabata sinti asina forsa pa por hisa mi compañeranan di baile y tur cos a cambia ora mi a cuminsa entrena”.

Awendia Alex tin 8 aña trahando como un personal trainer aunke e no tin su certificacion ainda, e ta yudando y dunando guia na otro hendenan cu tambe tin metanan diferente cu nan curpa. “Mi a siña di mi personal trainer na Panama cual a dunami e mihor guia cu mi por a pidi p’e. Mi ta gusta djis e hecho di tin e soñonan di cada persona den mi man y por haci esakinan realidad. Tambe e ta yenami cu hopi orguyo pa wak con hopi di personanan ta haya resultado cu no solamente ta dunanan un bon aspecto fisico y salud sino ademas un mihor auto estima y siguridad den nan mes.

“Den mi opinion mi ta kere cu e ta un drempel pa hopi hende pa drenta un gym debi cu nan ta sinti kizas berguensa y/of inseguridad di nan mes di haci algo malo of kizas nan no sa con pa usa e machinan y cu otro hende por harinan”. Asina mes Alex ta bisa cu el a mira un cambio grandi na Aruba. “Realmente si mi a wak cambionan, mi ta wak mas hende den gym, coriendo y lugarnan interesa pa haci competencianan den diferente categoria aunke di otro banda mi ta sinti cu ainda falta pa mehora y educa riba e mentalidad di e personanan riba con pa come saludabel”.

Hopi hende lo pensa pakico un personal trainer pa loke Alex ta bisa cu e motibonan ta hopi; Bo mester un guia ora di usa e machinnnan, un guia den e momento di haci cierto posicionnan ora di train pa no haci bo curpa daño. Un guia tambe ta bon pa animabo ora bo ta sinti cu bo no por mas y bo kier ‘give up’. Tambe manera hopi otro clientenan ta bisami, e ta ponenan sinti bon y mas disciplina di sa cu tin un hende ta wardando riba nan na gym.

Alex ta pensa cu no mester pensa mesora cu entrenamento na un gym ta caro, tur cos ta depende. “Realmente tin diferente nivel, tin hende cu ta prefera un entrenamento totalmente personalisa cual berdad por ta mas caro pero tin entrenamento den gruponan cu ta mas accesibel y nan ta bon tambe.

Pa loke ta ‘substancianan/enhancer’, Alex ta kere den cosnan mas natural; Mi no tin nada contra ningun hende pero mi ta bay mas den e banda di come saludabel y train duro. Ami mes no ta bai ningun competencia p’esey mi no tin pura den tin un resultado den pura sino tur cos poco poco y na su tempo. Cuminda ta keda hopi importante pasobra bo ta loke bo ta come. Train ta un 30% di loke bo ta logra y e otro 70% ta loke bo ta come. Hopi hende ta haci e mesun foutnan; nan no tin conciencia pa train den e forma corecto for di e contraccion y posicion di e musculonan of con pa arma e rutina y tambe nan no ta hiba un bon guia di alimentacion basa riba e obhetivonan cu nan kier logra.

Mi ta lanta herbe webo pa mi desayuna, bay gym pa 8’or p’asina mi ta na ora pa mi clientenan. Ora mi caba cu nan pa 12’or, mi mes ta cuminsa entrena. Despues mi ta bai cas come y prepara e cumindanan pa cada 4 ora. Mi ta bai gym bek 4:30 te cu 8’or y despues mi ta descansa.

E entrenamento cu mas mi gusta y por recomenda ta esun di circuito den intensidad, varios ehercicionan di mashinnan cu ta hibabo na entrena bo curpa y mixnan cu ehercicionan cardiovascular manera bula cabuya, subi trapi etc. Mi mes ta entrena 2 ora turdia; 1ora y mei pa peso y 20min di cardio.

Claro cu ta posibel, solamente cu despues bo mester tonifica.

Prome cu tur cos pa un mihor nutricion, bo mester baha e cantidad di carbohidrato, subi vegetal evita lacteos y dividi e porcion di lunch y dinner den dos p’asina bo por cuminsa come cada 4 ora.

Si realmente mi a yega di tin e tipo di clientenan ey, tin cu ta pensa cu djis di bay gym y no cambia nan habito di alimentacin nan lo logra tur cos pero manera mi a bisa caba, cuminda ta hopi importante ora di haya un bon resultado.

Esaki ta un labor hopi bunita di por yuda otro y hibanan na un miho bida. E ta un satisfaccion pa sa con pa guia yuda pa cada vez tin mas personanan saludabel ta cana rond.