Lanta den un famia di creatividad unda musica semper tabata central, pa Aldrick Croes, ora e idea a nace pa bin c’un grupo di carnaval, e no tabata un idea loco en lo absoluto. “Tabata na 2008, e aña despues cu e banda DUSHI a gana roadmarch y roadjam cu MUSIC, cu mi ruman Hildward Croes (q.e.p) a pidimi pa hunto lanta Dushi Carnival Group”. Sin pensa dos biaha, e trabou pa haci esaki a cuminsa”.
#DUSHI PEOPLE
E prome cos cu mester a haci tabata bin un tema, Aldrick ta corda. “Life’s a Beach” tabata e prome tema y basicamente no tabatin diseño pa motibo cu nos tabatin solamente dos siman di tempo prome cu e proximo parada.
Asina e decision a bin pa nos solamente percura pa e tela ta disponibel y laga tur participante crea su propio fantasia”. Mientras esaki tabata tuma lugar, e parti crucial pa loke tabata e musica, tabata den man di Hildward cu Dushi Group. “Hildward semper tabatin un input total den e grupo pero su concentrashon tabata mas riba tereno musical pa keda creativo y atractivo pa nos #Dushi People”, Aldrick ta conta. Asina e grupo a subi caya pa prome biaha cu nan prome salida cu tabata un exito total den loke tabata ambiente.
E publico na banda a goza pasobra aparte cu e participantenan tabata anima, e musica tabata tremendo bou guia profeshonal ma- nera custumbra, di Hildward cu su musiconan di Dushi Band. E exito di e prome salida tabata con rmacion cu mester tabatin continuidad. E team tras di e grupo a cuminsa reuni y asina hunto, tabata dicidi riba tur aspecto di nan proximo participacion incluyendo, e tema. “Den e di dos salida, e grupo a crece mas ainda. Personalmente mi tin cu atribui esaki na e creatividad musical y e famoso Soca Trance di Hildward y su Dushi Band. Ademas di esaki, su temanan carnavalesco semper tabata cay den premiashon y tabata masha gusta mes”, Aldrick ta bisa.
Y asina a sigui traha riba e grupo. Cada aña, tur miembro cubriendo nan parti cu a haci cu e grupo a keda crece cu cada aña. Hopi tabata e dianan cu e ekipo tabata pasa Pasco y Aña Nobo ta traha riba head piece y accesorionan, en especial si e periodo di Carnaval tabata uno cortico.
CAMBIO INESPERA
Na 2014 Hildward a bira malo y despues di su fayecimento, e tabata un pregunta grandi ki e efecto esaki lo bay tin pa e grupo, cu ya tabatin su estilo bou di e musica crea pa Hildward. “Literalmente nos a cay den un bashi enorme sin sa unda pa bay of con pa cuminsa.
A purba continua cu Dushi Band pero esey a bira imposibel. Pues mester a bay c’un otro banda cu tabata Madness di Michael Lampe. Nos ta gradici Michael Lampe kende apesar di no tabata un carnavalista, a accepta e reto di purba yena un bashi y un sapato grandi, algo cu p’e tampoco tabata facil”, Aldrick ta splica.
“Unico cos “menos bon” di un otro banda tabata cu nos hendenan a keda añora Hildward. Dushi People nunca a surpasa e fayecimento di Hildward”.
DUSHI GROUP AWOR DEN 2020
Despues di a keda cu Madness como banda y e reaccion di e participantenan, a opta pa awor den 2020, bin cu algo diferente. “E periodo mas exitoso di DUSHI tabata tempo cu Hildward tabata na bida. E tabata sa con pa ‘cater’ e deseo musical di nos participantenan. Despues cu Hildward a fayece nos a bin ta lucha pa mantene su memoria bibo atrabes di DCG. Hopi contratiempo nos a surpasa pa awe ainda nos t’ey drentando e decada nobo cu e renobacion total awo cu nos artista local y internacional Jeon y Upgrade. Den team nos a discuti e opcionnan y mayoria a dicidi cu sea ta busca Jeon & Upgrade of ta tuma un break di Carnaval. Y nos a logra cu Upgrade gradiciendo Jeon tambe pa e oportunidad. Nos ta habri pa bunita sopresanan pasobra den man di Jeon y Upgrade mi sa cu nos ta bon”.
DISEÑ0
Secrets of the Savanna : E propio team di Dushi ta encarga cu e tema y diseño. Cosemento lo keda den man di cada participante.
KICO POR SPERA
Dushi Vibe so.
