Aissette Rivera: “Un persona no mester ta ‘studia’ como periodista pa ta un profesional”

Ora cu ta papia di con un hende su personalidad por keda transmiti atrabes di microfon, maske bo no por wak e, Aissette Rivera lo por ta un bon ehempel di esaki. E energia cu e ta proyecta ta lag’e resalta inmediatamente.

E ta e prome pa confesa cu e relacion di amor cu radiodifusion ta mutuo, algo cu tabata hala su atencion for di mucha. Asina e tabata descubri musica y keda actualisa cu informacion. Asina mes, nunca el a pensa cu e lo tabatin durf di drenta e mundo aki.

Tur esey a cambia cinco aña pasa ora cu el a tuma e curashi di fungi como presentador di e programa di television ‘Brindis.’ Di e manera aki el a descubri e satisfaccion di comparti cu publico. Atrabes di e siguiente entrevista, ta conoce un poco mas di Aissette su pensamento riba prensa na Aruba.

Mi ta kere tin diferente factor cu ta contribui na e pensamento aki. Mester keda consciente cu e noticianan durante e pandemia a trece incertidumbre referente nos salud y finansas, dus esakinan ta ocasiona miedo. Riba dje, e medionan di comunicacion cu ta publica noticia sa cu publico ta reacciona na publicacionnan sensacional (y esaki ta conoci di hopi prome cu e pandemia). Mi ta kere e impacto di e crisis riba nos comunidad, combina cu e habito di sensacionalisa noticia, ta crea tera fertil pa panico.

Pa contraresta esaki tampoco no ta algo simpel, pero como consumidor nos mester keda consciente cu nos tin e poder di decision. Nos mester ta consciente di e impacto cu noticia por tin riba nos, y dicidi pa nos mes ki tipo di informacion y cual fuentenan di informacion nos ta opta pa sostene.

Mi tin cu bisa cu ami mes tabatin un reaccion mixto den cuadro di e prome ola y con necesario lo ta pa periodistanan ta riba caya durante Toque de Queda. Pero nos tur por a mira rapidamente den e prome dos anochinan cu cosnan serio a pasa durante toque e queda y cu prensa local a cubri esaki.

Por a mira cu a hasta lanta un asociacion di prensa a causa di e “acusacion” aki di falta di profesionalismo den prensa. Mester cuminsa na bisa, cu un persona no mester ta “studia” como periodista pa ta un profesional, pero tambe mester ta consciente cu nos comunidad ta hopi yega na influencianan internacional. Dus nos ta exigi cu e industria di periodismo cumpli na standardnan basta halto.

Aworaki mas cu nunca, den e epoca di fake news, mi ta bin bek na nos como consumidor. Ta nos deber pa nos ta consciente y pensa criticamente tocante locual nos ta lesa, y sigur mi ta kere ta bira momento pa nos miembronan di prensa custuma di publica fuentenan di informacion. Asina e publico por sa cu tur cos cu nan lesa of wak ta veridico y no ta un question di opinion.

Den casonan di presenta informacion mi ta laga mi propio opinion personal afor, mirando cu na e momento di informa mi deber cu e publico ta pa duna nan e informacion completo y veridico pa nan por forma nan propio opinion.

Mi mester bisa cu tin ocasion caminda mi ta comparti mi opinion tambe, pero semper cu e maximo esfuerso pa clarifica ora loke mi bisa ta a base di opinion of ta algo cu no ta confirma. E decision pa haci esaki ta motiva completamente pa e publico cu ta scucha, wak of lesa. Lo mas importante ta pa sirbi e publico, cu loke mi comparti ta informa, motiva of entretene nan. Idealmente tur tres!

Nomber: Aissette Rivera

Medio: Magic 96.5

Inicio den Prensa: 2015