Afra Henriquez

29 September, 2019

Cambio di e bida di farandula pa un bida cu Dios

Ta parse manera ayera, pero ta 20 aña pasa cu Afranina Fiona Henriquez (40) tabata un nomber constantemente menciona den mundo di moda y beyesa. Awendia ya casi no ta mira ‘Afra’ mes mas locual a pone nos busca contacto cune pa sa un poco mas di con su bida a transcuri durante e ultimo añanan, su soño y metanan actual.

Mundo di modelahe & beyesa

El a crece y lanta den e barionan di Piedra Plat y Sanicolas hunto cu su mama. Cu apenas 7 aña, Afra a conoce e dolor grandi di un perdida di un ser stima. “ E morto di mi tata a haci un gran influencia den mi bida debi na su partida un parti di mi niñez a cambia”, e ta cuminsa na conta nos. El a lanta cu su mama, kende a bira manera su mihor amiga. Tur caminda bo tabata wak Afra, bo tabata mira su mama banda di dje y vice versa. Su introduccion den e mundo di ‘farandula’ a pasa den un forma hopi spontaneo e ta splica. “Canando cu mi mama den caya, Ronchi de Cuba a aserca nos y a puntra si mi lo por modela p’e y esaki tabata e inicio di e mundo aki p’ami cu 13 aña”.

Afra tabatin un estatura caba di riba 1 meter 70, cual sin duda tabata hala atencion aunke e mes ta bisa di tabata un mucha timido. Despues di a accepta y haya training for di Ronchi de Cuba, el a cuminsa mira escenario mas manera un plataforma pa e ‘act’. Unavez cu e baha for di esaki, e tabata bolbe bek na e mucha muher keto cu tabata purba di no hala atencion. Despues di tabata ya desaroyando den modelahe, el a keda aserca pa competi pa eleccion pa reina hubenil di carnaval di su districto. “Tabata señora Magda Nicolaas y Susanita Diaz Maduro kendenan a aserca mi mama pa mi bay pa reina y asina mi a ‘krijg de smaak te pakken’ manera nan ta bisa na Hulandes”, e ta bisa.

Esaki tabata su prome ‘certamen’ pero esun di mas serio cu caracter internacional y di un preparacion mas intensivo a bin cu su titulo di Miss World Aruba na 1996 y Miss Intercontinental na 1997. Den e certamen di Miss World na India, el a keda den e top 10 y a haya e titulo di Caribbean Queen y den e certamen di Miss Intercontinental, el a sali como 2nd Runner-up. Como modelo tambe el a representa Aruba unda el a keda den e top 10 di Model of the World. Pues un trayectoria interesante el a logra tras di su nomber.

“Mirando bek, mi lo no cambia nada ya cu e ta un parti di mi bida. Mi ta kere si cu si ta awe, lo mi no a participa den ningun certamen”, e ta bisa. “Berdad ta cu certamen tabata hopi ‘leerzaam’ mes p’ami den e sentido cu mi a crece como persona danki na tur e trainingnan cu mi a haya, pero despues di Miss Aruba, tur hende ta keda wakbo como un miss y no un persona. Si ba gorda of baha peso tin comentario como sifuera cu no ta nada otro mas c’un miss”, e ta bisa.

Mi ta soltera pero mi no ta mi so. hesus semper ta cumi

Un bida pafor di farandula

E tabata algun añanan sigur intenso di modelahe y certamen pero dado momento, Afra a dicidi na tuma rumbo nobo den su bida. “Na momento cu mi a dicidi di bai studia na Hulanda mi a bisa cu lo mi no haci of busca nada den farandula. Lo mi cuminsa dushi un bida ‘anoniem’.

Ningun hende conocebo, ningun hende sa bo nomber, hopi dushi mes e feeling ey tabata”, e ta conta. Na Hulanda el a biba 10 aña unda el a studia Cultureel Maatschappelijk Vorming y tin ya caba 6 aña na Aruba unda e ta traha como Educatief medewerker na Departamento di Cultura. Aunke hopi no sa, Afra tabata un persona semper di fe. Bek na Aruba, el a cuminsa dedica mas na su fe y cada vez mas leu di e mundo di farandula.

“Mi semper tabata y tin fe y tabata canta como hoben den koor di misa. Kizas e tempo di mi hubentud na Aruba mi tabata kere cu mi tabatin hopi fe pero si mi analisa bek, e no ta nada compara cu awor. Mi ta un Catholico Practicante. Kico esaki ta encera? Un bida activo den oracion, duna enseñanza, tuma tempo pa tuma enseñanza, traha pa parokia, participa na retironan spiritual. Haci lo mas hopi bon obra cu mi por. Haci mi maximo esfuerzo pa por agrada Dios”, e ta bisa. Di e cambio den su bida, e sosten cu ta importante p’e, ta esun di su rumannan den Cristo. “Mi rumannan den Cristo semper a sostenemi y manera nos ta bisa, tempo di Dios ta perfecto. Nan a mirami gatia te cana den fe y ta sinti nan mes orguyoso dimi. Maske mi ta bisa semper tur gloria na esun cu merese esaki. Paso no ta Afra sino Cristo cu ta biba den mi curason”.

Awendia hopi ta admira e cambio den Afra, un mucha muher firme den su creencia y contento cu e bida cu e tin. “Mi ta soltera pero mi no ta mi so. Hesus semper ta cumi”. No lo mi no cambia mi religion pa amor. Ni lo uni mi mes c’un ateo. Palabra ta bisa den 2 Cor 6:14 No Mara bo mes na hende cu no ta creyente pasobra husticia y maldad no tin nada di haber cu otro”.

Aruba & Fe

“Mi ta kere cu hobennan ta wak Fe/religion como algo hopi aparta di nan. Pa por tin un relacion cu Dios bo mester por conoc’e. E tarea pa cu esaki sigur ta bini di cas. Si como mayor bo no siña bo yiu resa, kere, gradici, ta con e por bira un hende di Fe?” E problema mas grandi den nos hubentud ta keda falta di amor, comunicacion y ignorante na e amor di Dios. Mi ta di opinion cu tur creyente mester lanta for di soño y ta mas activo. No solamente den proclama Dios su palabra pero den haci bon obra. Hopi biaha nos ta cla pa bisa den momento di sufrimento Dios yuda nan! Pero kico bo mes por haci pa alivia un bisiña of un deconosi su sufrimento. Sigur oracion ta yuda, mi tin testimonio na cantidad pero duna un man pa yuda un prohimo ta nesecario.

Mirando bek, mi no lo cambia nada pero mi ta kere cu si ta awe, lo mi no a participa den ningun certamen

Conseho:

Semper mi ta bisa Dios ta un cabayero y e ta para na porta di bo curason wardando abo habri p’e. P’ami Fe ta mi alimento, mi alegria y mi baranca. No limita bo mes di conoce E Berdadero Felicidad cu Ta Cristo Hesus.