Naci na Hulanda di mayornan Surnameño, Nancy Gravenstijn a lanta na Aruba desde su 6 aña den Dakota. Un hubentud hopi dushi cu hopi amistadnan haciendo hopi deporte, manera basketball y core rollerblades na Centro Di Bario Dakota y YMCA ta conta como su mihor recuerdonan creciendo. Desde su 12 aña tanto su amigonan como sumes tabata sa cu e lo bira abogado. “E idea di defende hende contra di inhusticianan cometi contra di nan, semper a intrigami”.
Na 1994, Nancy a gradua y asina tambe, e inicio di un profesion di defensor y consehero legal a cuminsa. Pa e luna cu ta duna atencion na amor, Nancy ta comparti otro banda riba e topico aki; e aspecto legal ora cu tur cos, no ta mesun bon mas…Nancy ta sali di e punto di vista cu un famia ta importante pa e continuidad di nos sociedad y pa un desaroyo equilibra pa nos muchanan. Ideal lo ta si e famia semper lo keda hunto y uni. Lamentablemente esaki no tur ora ta e caso.
