E tabata un dia di celebracion pa Aruba completo; un hotel den man di yiunan di tera. A tuma a 18 luna di renobacion multi-miyonario y finalmente Hilton Aruba Caribbean Resort & Casino a keda presenta dilanti un grupo di amigo, famia y invitadonan. E renobacion di e hotel tabata uno mas amplio cu na e simpel bista, a renoba for di su cambernan y suites, te cu su restaurantnan, areanan comun y e hardinnan tropical.
E ceremonia di reapertura di e resort a keda teni den e lobby recien renoba di e Gran Dama, den presencia di e isla su Gobernador, Fredis Refunjol y su esposa, e Minister di Turismo Mike de Meza, como tambe otro ministernan gubernamental, miembronan di Parlamento, miembronan di prensa, e partnernan di e Aruba Growth Fund, representantenan di Hilton Worldwide y hopi di e 414 miembronan di ekipo di e resort.
E invitado di honor special na e ceremonia tabata Oscar Henriquez, kende tabata entre esnan cu a concebi e hotel na e prome instante. Como e isla su prome Comisario di Turismo na 1955, Henriquez a raporta na e Minister di Finanzas Juancho Irausquin, su partner den e decision pa introduci turismo na Aruba, den forma di un hotel di luho di cinco streya, diseña pa e architecto Mericano mundialmente famoso, Morris Lapidus.
Na edad di 90 aña, Henriquez a keda honra hunto cu e Gobernador pa oficialmente corta e cinta y declara e resort habri, net na ora pa e temporada halto di 2017. E artista local Etty Toppenberg a entretene durante e prome parti di e recepcion cu a tuma luga den oranan di mainta, y despues, su Excelencia e Gobernador di nos isla a yega y e ceremonia oficial a cuminsa cu e cantamento di nos isla su himno nacional door di Roderick Franken.
Rene Kan, representando e Aruba Growth Fund a dirigi su mes na e invitadonan, rindiendo homenahe den su discurso na e isla su pioneronan di turismo, y na e architecto di e hotel. Tambe el a gradici su partnernan di negoshi y inversionistanan, incluyendo anecdotanan personal na varios momento durante su discurso. El a reitera e compromiso solido di termino largo di su compania na e proyecto y a pidi pa e confiansa di e miembronan di ekipo na e hotel. “Laga e ultimo aña ‘ki ta e prome aña cu nos a inverti den bo confiansa pa fomenta nos reputacion; ami y e otro doñonan y gerencia lo traha tur dia pa crea un reputacion di confiansa cu cada un di boso,” el a declara.
David Keys y e Minister di Turismo tambe a dirigi nan mes na esnan presente, dunando nan perspectivanan respectivo pa loke ta e renobacionnan di e resort y e futuro di turismo na Aruba. Despues di esaki e ceremonia di corta e cinta a tuma luga, cu seis dignitario clave arma cu sker, esta Oscar Henriquez, e Gobernador di Aruba, Rene Kan y Justus Martens di e Aruba Growth Fund, e Minister di Turismo y David Keys, VP di Benta y Mercadeo pa e Americas, Hilton Worldwide, concluyendo na un manera simbolico e parti oficial di e mainta.
Un fiesta di cocktail a sigui na Sunset Grille Restaurant, sirbiendo tur specialidad di e resort su restaurantnan. Tournan personal di e propiedad, pa wak e cambernan recien renoba, a wordo acompaña pa e gerente general di e hotel Olivier Maumaire y su ekipo. Ora Aruba Growth Fund a cumpra e hotel riba dia 15 di Juli, 2015, e organisacion a duna e resort e nomber y marca nobo di Hilton Aruba Caribbean Resort & Casino, y durante e ultimo aña y mey a pasa door di renobacionnan, cumprando muebles y accesorionan nobo, y remodelando e cambernan, gangnan, areanan comun y areanan di come, e areanan di piscina y playa, hardinnan, etc.
