Disciplina, forsa mental y pashion ta e don natural cu e damanan aki ta posea. Uni forsa ta locual cu a pone nan destaca y cu a bira Aruba su favorites durante Aruba Challenge.Cu nan tri-suit no usual a pone cu fanatico por a siguinan y reconose nan for di leu. Pa sorpresa di fanatico y familiar mitar di e damanan a logra sali como finalista den nan categoria.
Con tur cos a cuminsa
Apenas 3 luna prome cu Aruba Challenge, un grupo di 5 dama a topa durante diferente actividad den nan bida personal y ta dicidi pa acepta e reto y participa den e evento di triathlon mas grandi di Aruba. Mayoria di e damanan ta conoci den comunidad pero cu ta practica un of otro deporte pa mantene e condicion como nan fisico. Stephany Wever, Shariska Winterdal, Carolina Raven-Merryweather, Ana Maria Ramirez y Shohaira Barnes da Silva a uni y a haya sosten serca otro pa prepara nan mente como nan condicion.
Cada un persona tabata train durante siman un disciplina pa dia y riba diasabra nan tabata topa 6or di mainta p’asina combina e deporte di natacion, cyclismo como core. For di trempan a cuminsa compila informacion y experiencia kico ta e rekisitonan cu mester cumpli cune. Shariska tabata e unico dama entrenan cu a participa caba den Challenge. Cada un di e damanan mester haci e sprint distance, cu ta landa 750meter despues cambia pa haci 22km bicicleta pa despues caba cu 7km na pia y pasa e finishline.
For di prome diasabra a cuminsa cu landa 500m den lama y core 9km bicicleta cu tabata tuma mas o menos 1 ora. E prome biaha e transicion di un deporte pa otro tabata fuerte y dificil pero asina mes e damanan a keda aumenta e natacion como e routa di bicicleta, e curpa a cuminsa custumbra y a cuminsa pidi pa mas. Bon nutricion tabata necesario pa alimenta e curpa cu gasoline pa por sigui. E trainingnan tabata asina intenso cu mainta prome cu trabou y despues di trabou ta kies un disciplina p’asina mehora tempo como technica. Cada un dama tabata tin nan coachnan personal pa cada un deporte cu a guianan durante e periodo di training. Triathlon a cuminsa bira un adiction cu no por a stop mas. E damanan a hasta haci un workshop hunto riba heartrate training y zones.
E dia
Pa e ultimo siman e intensidad di e deporte mester a bira menos p’asina duna e musculonan descanso y sosega pa e gran dia. Aki ta unda e ehercicio mas grandi a cuminsa. E training mental. Como un equipo uni e damanan a presenta na Aruba Challenge y hustamente como un grupo a duna nan forsa pa cuminsa cu e bataya. Cu emocionan halto cada un di e damanan a cuminsa cu e challenge, Stephany tabata e prome cu a sali for di awa, manera un pisca e la pasa 750meter sigui pa e resto di su grupo. Riba bicicleta cada un a pusha y tabata sigui otro y ta manda señal di forsa pa sigui.
ki Shohaira y Ana a logra bula y pasa varios otro damanan riba caminda, na pia ta na unda Shariska y Carolina a demostra nan abilidad y a ranka pa e finish sin wak atras. E yegada y final di cada un di nan tabata un emocion di orguyo como satisfasion. A logra finalisa Aruba Challenge tur cu’n smile di gratitud riba nan cara!
Resultado
Stephany Wever a logra finalisa como prome den su categoria. Carolina Raven- Merryweather a logra 2nd lugar den su categoria, Shariska Winterdal tambe a logra obtene e titulo di 2nd den su categoria.
Xclusivo ta manda palabra di felicitacion pa cada un athleta cu a participa y a demostra nan forsa durante e evento magestral aki.
