E tabata un dia yena di emocion, orguyo, patriotismo y siguramente talento. E dia diaranson 17 di January 2018, sigur lo keda marca den nos historia cultural y musical ora c’un grupo di fanaticonan, amigo y invitadonan a uni pa hunto compaña Jonatahan ‘Jeon’Thiel pa lansamento oficial di e cancion y video Machika. Minister encarga cu Turismo, Salubridad Publico y Deporte sr. Dangui Oduber, un fanatico su mes di Jeon, tabatin e gran honor di forma parti di e evento aki y primi e boton pa ‘release’ esaki dilanti tur hende presente cu por a sigui esaki via un screen grandi poni pa e compania Elite Productions.
Durante e evento aki e tata di Jeon, sr. Robert Thiel y tambe su bon amigo Raymbert Bikker a hiba bunita discursonan cu palabranan cu a sali di curason cu tabata sumamente emocionante. E lansamento oficial di Machika a tuma lugar dia 19 di januari na Los Angeles. “Machika” ta bin di un amistad spontaneo cu a nace na New York entre Jeon y J Balvin, a desaroya den un amistad profesional, cu a conduci na integracion di Jeon den e grupo di J Balvin hunto cu Anitta. Den su prome dia caba esaki a surpasa 18 miyon di hits y a posicona su mes number 1 riba varios charts mundial di musica.
Jeon su mes a cuminsa cu su gira hunto cu J Balvin cu lo ta parti entre Merca, Europa y latino America, manera semper el a soña. Pabien Jeon, Aruba ta orguyoso dibo.
