Misha Raymond

Pa bo drenta arena politica na Aruba bo ta pense 10 biaha prome debi na clima politica cu nos tin.
Mi meta ta pa cambia e narativo di nos politica, pa nos por dialoga di un manera constructivo di e desafionan di nos hendenan. Mi no ta kita afo cu mi ta bin di e arena social y mi participacion den politica ta pa atende cu esaki. Den mi profesion mi ta wak hopi buraco den e cuido y sosten di nos muchanan y esaki a haci e decision uno un tiki mas facil pa drenta e arena politico.

Raiz ta boga pa igualdad, no solamente pa cada ser humano sea grandi of chikito pero tambe pa e derechonan di naturalesa y animalnan. Mas cu tur cos, Raiz a brindami tur espacio pa mi parti mi preocupacionnan pa loke ta trata e desaroyo di nos muchanan y nan sistema familiar. Na e momento cu bo ta sinti cu bo stem ta wordo balora, e ta bira facil pa forma parti di un team.

Reforma riba e arena social ta unda mi lo profundisa mi mes. Pero prome, nos mester realisa cu tin inhusticia social prome. Esaki ta nifica den un forma of otro cu pueblo no ta benificia di nan derechonan pasobra esaki no ta acesibel, transparente of no por wordo ehecuta debi na de ciencianan den nos structura social. Un principio di husticia social ta ‘equity’, locual ta nifica cu tur hende mester por wordo facilita pa por haya mesun oportunidadnan den un pais.