Cu mas di 25 aña desde cu el a bira un cara familiar cu su trabou como reportera y producer na ATV, Tessa Pietersz ta admiti cu esey tabata e momento cu el a realisa cu e ta gusta e aspecto creativo di e ramo aki. Completamente contrario na su estudio di biologia y quimica. “No tabatin un dia cu mi a lanta sin gana di bay traha. Pero diripiente algun aña pasa, mi a sinti cu mi mester di haci algo diferente. Pero mi no tabatin claridad riba kico. Asina Drunk Denials a nace…
E IDEA
“Semper mi a gusta cushina y mi estilo di cushina ta completamente improvisiona y riba gevoel. Mi no sa sigui receta. P’ami, cushinamento ta un expresion creativo unda mi ta encanta experimenta pa crea platonan diferente”. E concepto di Drunk’s Denial ta un concepto cu Tessa tabatin den su cabes pa 12 aña caba. “Mi tabata semper convenci cu e ta un super concepto, pero e idea hamas tabata p’ami mes cushina e platonan of traha e pastriesnan. Mi a considera cu ami simplemente lo ta encarga cu e direccion creativo manera desaroya receta, crea e menu y laga e profesionalnan ehecuta e trabao den cushina. P’esey tambe mi a wak semper cu “Drunk’s Denial” tabata un ‘business idea’ cu mi lo desaroya mas depues ora mi tin e fondonan pa inverti den un bistro cu su bakery c’un staff completo pa haci tur e trabou”, Tessa ta splica.
