Ora di relata su propio experiencia cu abuso relacional, Audrey Croes ta cuminsa na señala e vulnerabilidad di hubentud y otro trikinan psico emocional cu abusadornan ta uza pa gana control riba su victima. E claridad cu cual e ta haci un auto-analisis ta resalta con leu el a yega, como persona, pa haci di un episodio mahos den su bida, un causa noble y importante pa e resto di su bida.
Audrey tabata un studiante su so na Hulanda, ora el cay den gara di su abusador. A sigui añanan di agresion sexual, emocional, financiero y tambe fisico. Pero ta hustamente e situacion aki cu a hib’e na busca informacion riba derecho di hende muhe y a cende un candela den su spirito cu a comberti’e de un luchador ferviente. E ta comparti elocuentemente cu lectornan di Xclusivo, su reflexionnan riba e nificacion di amor, con amor ta presente awendia den su bida y con e ta planea di combati violencia relacional pa medio di un comprondemento nobo di e papel cu inteligencia emocional ta hunga den esaki.
