Mientras cu pa decadanan prome cu na Aruba a cuminsa cu e debate riba e tema di Cannabis medicinal, ya John Arends a sumergi su mes riba esaki birando un conocedor di tur su aspectonan. Kico Cannabis Medicina ta nifica pa Aruba? Cu su compania ARUBA CBD, John ta den pleno preparacion pa yuda trece informacion riba e balor di e mercado nobo aki y con pa haci esaki un realidad na Aruba finalmente. Un Bureau Medicinale Cannabis Aruba (BMCA) ta un bon stap, ya cu sin esaki no por haci nada, segun Arends. Sin embargo, e ta ansioso pa conoce con lo ta e structura di e entidad. Di un banda e ta contento di tende cu Gobierno a opta pa no haci un copy-paste di otro pais paso cada un tin su circumstancianan particular. Tambe e ta spera cu lo asigna personanan cu di berdad tin e conocemento y experiencia necesario pa e reto nan dilanti.
Pa locual ta Cannabis recreacional, John su opinion ta cla; Aruba no ta cla pa cannabis recreacional paso falta hopi educacion ainda riba e materia”. E ta kere cu comercialisacion di cannabis medicinal ta rekeri di cambional den ley mas leu cu hopi ta pensa cu ta regarda introduccion di un Kruiden- en Warenwet y un Ley Artesanal . “Mi ta sinti cu gobierno kier pasa tur cos di un solo biaha y e no ta bay traha asina. Nan ta wardando y wardando, pero e Voedselen Warenwet mester a pasa caba y e Ley Artesanal mester a sigui su tras.
