Bida no por tabata mihor pa Malaghy “Freddy Rasta”; E tabata creando musica y trahando cu artistanan manera Jeon, Ozuna, Bad Bunny, J Balvin, Don Omar, Konshes, Rick Ross y hopi mas. Un musico di profesion y curason pa e ultimo 9 añanan caba, tur cos tabata bayendo tremendo…te dia cu Covid-19 a drenta su bida y bolter tur cos. Banda di musica, Freddy tabatin un trabou ‘part time’ tour guide tambe cu turistanan, cu tabata forma parti di su entrada completo. “P’ami e tabata un ‘double’ golpi. Turismo a baha drasticamente. No tabatin turista pa mi por tour y tur evento a keda cancela, pues mi no por a perform mes mas tampoco. Mi no a spera cu e sla lo ta asina duro, paso no ta algo cu a yega di pasa antes. Esaki tabata un sorpresa pa mundo completo. Mi ta kere cu mescos cu ami, ningun hende tabata prepara pa algo asina. Dus di berdad el a dalmi hopi duro mes. Mi a perde tur dos entrada den un sera di wowo”.
MIEDO & REPONSABILIDADNAN
Ora cu gobierno di Aruba a dicidi pa para tur evento y Aruba a drenta den un lockdown na Maart 2020, Freddy ta bisa cu e tabata sa cu e caminda lo ta bay ta largo y aunke e no tin yiu pa pensa riba dje, su debe y responsabilidadnan tabata real y importante.
“Mi miedo di mas grandi, tabata cu mi no tabata sa ki dia e cos lo drecha atrobe. Awor sin entrada ,mi no lo a por cumpli cu mi obligacionnan y esey tabata mi miedo di mas grandi. Pues cu mi no por yuda ningun di mi hendenan paso mi no por a ni yuda mi mes” e ta bisa.
“Mi a cuminsa chapi cura, of laba auto di bisiña, pa mi por haya tiki entrada pa move un tiki. No tabata suficiente, paso p’ami por traha mi muziek mes ta costa placa y mi no tabatin suficiente pa mi por haci loke mi tabata custumbra di haci. Mi a haya un “Reality Check”.
Mi no a scoge pa construccion, simplemente, ta esey so tabatin disponibel p’ami. Manera cu mi a haya e yamada, mi a tuma e trabou sin sa kico e tin di haber cune. Ami no sa nada di construccion, pero awor mi tin 4 luna den dje y mi a siña hopi di esaki. Construccion tabata mi unico salbacion. E tabata of construccion of sinta na cas cu cero entrada.
Mi mester a tuma un decision basta pisa p’ami, paso mi no a custumbra di pone mi musica un banda. Pues berdad esaki di berdad tabata un reto p’ami. Pero como artista mi a siña cu tur cos ta un reto.
Sometimes you win, sometimes you lose.. but you have to keep pushing forward”!
Mi a accepta e reto, drenta construccion y ata mi ‘kinan, trahando placa limpi, mi por paga mi debe y cumpli cu mi responsabilidadnan plus, inverti den mi musica tambe.
UN POST CU A INSPIRA
Dia 2 di September, Freddy a post un potret di su mes na su trabou di contruccion mustrando cu no por give-up. “Mi a post mi situashon, paso mi a mira cu hopi artista y coleganan ta pasando den mesun cos, pero no ta busca un solushon. Mi a mira cu tur hende ta wak e problema, pues cu no tin fiesta/ evento cu ta nifica cu no tin entrada, pero no ta busca un otro solushon. Construccion no tabata mi ‘First choice’, e tabata mi ‘Only choice’! Mi kier a reta mi coleganan artista pa purba algo diferente, ‘struggle’ un tiki. Hopi di nan kizas tin berguensa di haci un trabou pisa of un trabou sushi, paso nos a custumbra ta perform y biba un bida di artista. Pero si Plan A faya, nos mester por tin plan B y bay pe sin miedo y sin berguensa.
Hopefully un dia tur cos ta bai bek na normal, ki dia, mi no sa. Pero pa tanten lo mi keda busca otro manera pa mi por sigui biba. Nunca lo mi stop di practica musica, mi a lansa 2 video nobo durante e temporada aki. Y tin hopi mas na caminda.
Conseho pa tur musico: “Dont be ashamed.. BE THE CHANGE”!
Na esnan cu a perde trabou: No give up, no stop. Sigi pusha, sigi busca otro manera, Nos tur sa e problema. Nos tin cu concentra riba un solushon pa e problema.
Mi forsa, ta bin di ariba. Cu Fe den Dios y cu hopi orashon, tur cos lo sali bon.
We Will Overcome This Together!
