Tico Croes: Despues di 20 aña, Crystal Breeze mester a stop di toca na Hotel pavia di crisis

“Manera cu cancelacionnan a cuminsa drenta, ya mi tabata sa”, Tico Croes di Crystal Breeze ta cuminsa conta. Despues di 22 aña tocando na hotel, e efectonan di e crisis di Covid-19 tambe a bati na su porta. “Mi a sinta cu mi famia y a splicanan cu momentonan duro lo bin pa nos y cu nos ta bay depende di Dios y di nos negoshi di cuminda cu nos tin, Tico Snack, pa sobrevivi. “E miedonan di ta na cas sin trabou tabata hopi, pero e mas grandi tabata di no por cumpli cu debenan”. Aki ta unda e storia di un musico cu a diversifica y adapta pa sobrevivi den un crisis, nunca imagina, ta cuminsa…

“Mi a cuminsa toca na Hyatt na 1998. Esaki tabata un dushi temporada. Ainda mi ta corda cu e GM cu nos tabatin e tempo ey, Mr Berry Kaplan a bisami; “Tico si bo sigui manera cu bo ta, humilde y disciplina, lo bo keda pa hopi aña mas aki na Hyatt”.  Tico tabata toca na e Lobby Bar for di 7’or te cu 11’or di anochi mientras e banda tabata cuminsa di 10’or di anochi te cu 2’or di marduga. “Crystal Breeze mes a cuminsa na 1991. Esaki tabata ora mi a yega for di Hulanda cu intenshon di bay bek pero tur cos a cambia ora cu  mi omo, Alex Croes, cu tabata traha na Manchebo Hotel a bisami cu nan tabata buscando un banda.  Asina Crystal Breeze a lanta”.  E mucha homber cu tabata duna presentacion cu su 7 aña den e programa di Matinette na Tele-Aruba, awor tabatin su mesun banda. E prome integrantenan hunto cu Tico tabata Gos Oduber, Jose Herrera.  “Nos tabata un 3- piece band y tabata toca na e restaurant di Mancheno Hotel y e happy hour. Nos estilo tabata ‘all around’, dus nos tabata toca tur cos”, Tico ta conta.

“Despues cu nos a sali for di Manchebo Hotel nos a sigui toca na diferente lugar manera Paddock, Cherries, Plaza Café, Papa’s and Beers, y despues nos a yega Cheers unda nos a bira house band pa 4 aña! Despues di esey nos a haña un oportunidad pa biaha pa toca na St. Louis, Missouri aki Hilward Croes a forma parti di e banda pa e toca na Merca. Despues di Merca nos a bay toca na Boneiro pa 2 aña y eynan mi a conose guitarista Antonio Bello y cantante Marisela. Na Boneiro, Anthony Muyale a bin buscami pa bay toca na Havana Club, aki mi a yama Antonio Teran na Aruba pa e bin forma parti di Crystal Breeze. Nos a sinta hunto pa crea un repertorio pa Marisela. Asina nos a forma e banda agregando Antonio Bello riba guitara pa haci un repertorio amplio di Mana. Despues nos a haya un oportunidad pa bay toca na E-ZONE, aki ta na unda mi a keda aserca pa Eduardo Maya pa toca un evento na Hyatt Regency. Di e manera aki e peticion a bin pa un 3- piece band pa toca den e Lobby Bar y asina tur cos a cuminsa.

Mi a traha na Bushiri Hotel, Golden Tulip Hotel, Holiday Inn Hotel, Costa Linda Hotel, Aruba Beach Club, Casa del Mar Hotel, Bucuti Hotel, Marriot Hotel y hopi mas. – E orario di trabou tabata varia, e tabata diferente. Mi tabata tin 2 toca pa anochi of hasta 3 pa anochi y tabata yega mi cas 6’or di mainta. Nos tabatin hopi variacion di cantante mes cu tabata canta cu nos y cu despues tabata habri nan hala y busca otro oportunidadnan y hasta yega na lanta nan mesun banda. Pero semper, Crystal Breeze tabata e scol pa e siguiente nivel”.

Cua tabata e momento cu bo a dicidi pa cuminsa haci algo diferente pa sobrevivi?

“E momento cu mi a drenta den mi camber y mi a sera wowo y pidi Dios mustrami kico mi tin cu haci. Den aña ‘81 mi a bay Hulanda pa bay studia pa musica pero mi omo a inspirami como cu e tabata un chef na Hulanda y mi a cuminsa pensa “pakico no bay studia horeca” . Mi a termina na logra mi estudio specialisa den Algemene Cumsuptive Techniek cu ta encera tur cos di horeca y pa despues haci mi specialisacion den Brood Banket Bakker.

Despues cu nan a mandami cas, mi a bolbe coy mi bukinan yena cu ‘haraña’ y ‘stof’  y mi a bolbe bek den loke mi a siña p’e”, Tico ta bisa na harimento. “Ora mi a cuminsa bek ta mane cu mi a bay bek ‘to the past’, Mi a haci algun fout nan manera e bolo no ta rijs, mucho sucu of e Bake Alaska ta bira Smelt Alaska y semper mi tabata rabia ora esey sosode pero na final Dios a trankilisami y pone den mi curason pa mi laga e tuma control di e situashon y asina tur cos a cuminsa lora bon. Na mesun momento mi tin un tereno cu antes tabata un cunucu na unda mi defunto welo tabata planta cantidad di fruta y berduranan. E ora mi a dicidi di cuminsa planta mata di fruta y berdura y cumpra galiña p’asina nos tin webo fresco. Awe danki Dios, e cunucu a cuminsa produci poco fruta, no na gran escala, pero cu FE den Dios pronto nos lo bay tin patia, melon, komkomber, zucchini, banana, spinashi, passionfruit. Tanto cu mi tabata pidi Dios pa haña un mata di kalalu, mi bon amigo Ryan Maduro a trece un p’ami y aki a cuminsa un bendishon cu awe e cunucu ta yena cu kalalu. Kiermen awe Dios a bendishona nos cu mas trabou! Mi ta musico, pastry chef y hasta cunukero awor. Esaki ta mustra cu si nos tin Fe y laga Dios tuma e control nos por logra hopi cos.

Kico ta loke bo a siña di e experiencia aki?

“E experiencia aki a siñami pa biba humilde y pa ‘never give up’. Pa semper pone Dios central paso ni cuanto placa cu nos tin of cosnan material cu nos por tin, nada di esey por duna nos salud y trabou bek.

Bo ta den contacto cu otro musiconan, kico ta nan experiencia?

“Di berdad, despues di nos retiro for di Hyatt mi tabatin ainda contacto cu algun musico, tabata duro y tristo pa tende di nan situashon.

Bo tin fe cu tur cos lo bay bek na normalidad?

“Esaki mi kier bisa, bo por perde hopi cos den bo bida, bo por perde bo cas, bo auto, bo por hasta perde bo ingreso pero algo cu NUNCA bo por perde ta bo FE! Pasobra di FE nos ta biba.

Bo conseho na otro musiconan eyfor?

“No perde speransa y tin fe paso fe ta move sero y sigur si bo no por biba den e momento nan aki di musica, pidi Dios mustrabo ki otro bo por haci pa bo por mantene bo famia.

Di unda bo forsa ta sali?

“Mi forsa ta sali di fuente principal cu ta Dios. Si no ta p’e, mi no tin nada”