Hobennan a bin den spotlight pa fiesta y peleanan riba beach violando reglanan pa prevencion di Covid-19. Esaki a genera hopi disgusto den comunidad cu ta custumbra di critica ora hubentud ta haci fout, pero no ta para pensa un rato con nan ta bibando e crisis aki.
Hecho comproba ta cu, den situacionnan manera cu nos ta bibando awendia, adultonan tin e tendencia pa bay den estado di sobrevivencia. Esaki ta laga esnan mas vulnerabel afo, manera ta e caso di mucha y hobennan, por ehempel.
Na opinion di Telefon Pa Hubentud, esey ta exactamente loke ta sosodiendo atrobe te na cierto punto. Hobennan ta pasando dor di yen cambio sin cu nan tin ni bos, ni voto. Nan tin e mesun miedo y incertidumbre, pero pio pasobra nan ta sinti man mara. Esaki ta pone un presion emocional/psicologico enorme te na e punto cu varios a y ta contempla suicidio.
Aunke e nomber ta refleha esaki, Telefon Pa Hubentud a adapta na tempo moderno. Awendia e organizacion ta comunica cu muchanan tambe via email, chat, website, ademas di duna lectura y realisa proyectonan di conscientizacion.
Basa riba e data local y internacional di, por ehempel, St. Maarten despues di horcan Irma na 2017, Telefon Pa Hubentud tabata sa cu ora Covid-19 a dal Aruba dia 13 di maart ultimo, esey tabata e señal pa nan drenta den accion. Inmediatamente e organisacion a cuminsa registra muchanan cu problemanan di salud mental manera stress, ansiedad, panico, ferfelamento, corta nan curpa y te hasta cu tendencia pa suicidio.
James Sneek, kende ta un criminologo di profesion, ta sinta na cabes di Telefon pa Hubentud y ta conta cu e efectonan di e crisis aki ta algo cu lo bay sinti riba termino cortico, mediano y largo. Ta dificil pa premira kico exactamente tur lo ta e consecuencianan, pasobra ta depende di hopi factor. “Nos no sa 100% kico tur ta pasando tras di porta”, e ta bisa refiriendo na e situacion cu e hoben por tin paden di cas.
Loke si Sneek por a comparti cu Xclusivo, ta cu durante e prome dos siman despues cu Covid-19 a yega Aruba, nan a trata 4 caso di hoben cu pensamento pa comete suicidio. Protocol ta indica cu den un caso asina, e mucha ta ricibi guia inmediato pa tuma contacto cu dokter di cas y pa eventualmente yega na Fundacion Respaldo pa tratamento. E trayecto aki nan ta keda monitor.
Pareu cu gobierno a duna ok pa scolnan habri bek dia 18 di mei, Telefon Pa Hubentud a cuminsa cu un programa titula ‘E Normal Nobo?!’ den cual a participa 1.946 mucha y 178 profesional. E lecturanan na scol a bira un espacio caminda e muchanan por a desahoga nan mes despues di e lockdown, pero tambe por a papia di con nan ta wak futuro y kico ta nan opinion di ‘home schooling’.
Falta di deporte y actividadnan social tambe ta afectando nos hobennan; loke ta refleha atrobe cu e mesun experiencia cu adulto tin, e muchanan tambe ta sinti y merece nan debido atencion. Director di Telefon pa Hubentud: “ta bon pa tene na cuenta cu contacto humano ta casi mesun esencial cu come y bebe algo tur dia”.
E recomendacion cu Telefon pa Hubentud tin pa mandatarionan ta pa ora di tuma decision, pensa tambe for di e perspectiva di e mucha y hoben. “Pa un meta ta sostenibel, esaki mester wordo carga door di muchanan y hobennan tambe. No por sigui pone normanan pa nos muchanan y hobennan bay biba, sin involucra nan aden.” Esaki ta lagabo pensa riba e acontecimentonan den fin di siman na lama cu otro lens. No pa hustifica, pero pa compronde un poco mas.
Telefon Pa Hubentud ta un NGO cu 20 aña di existencia. Ademas di e director y dos trahado social na oficina, nan ta conta cu un pool di 35 consehero cu ta accesibel 7 dia pa siman, di 2’or pa 6’or di atardi pa duna oido y asistencia. Ta sali di e punto cu ta dedica, por lo menos, 20 minuut na cada yamada; pero ta bay con largo cu e mucha mester. E yamadanan ta completamente gratis te hasta si e mucha no tin saldo den su telefon. Telefon pa Hubentud Aruba tin partner manera UNICEF Nederland y Child Helpline International cu cual ta intercambia informacion y recurso.
