PERFIL
Na Aruba Andreina a haya e oportunidad di traha den e ramo cu el studia p’e. Na 2009 el a gradua den Comunicacion Social na Universidad Arturo Michelena na Valencia, Venezuela. “Mi ta haciendo loke mi ta gusta, loke mi a studia y loke a bira mi pasion.” Naturalmente, e aspecto di idioma ta un obstaculo cu e periodista di Bon Dia Aruba ta traha duro pa surpasa. Dia aden y dia afo e ta subi caya pa para schouder cu schouder den e pool di prensa local y eherce su funcion destacandando su mes.
1. Durante e pandemia prensa ta ser tilda di fomenta panico. Di unda bo ta kere e pensamento aki ta bin y con mester contrareste?
Mi ta kere cu hopi hende a pensa riba e palabra ‘panico’ pa motibo cu e prome dianan di e crisis di Covid-19, esey tabata loke hopi hende a sinti. Mi mes a sinti’e ora e prome dos caso a keda conoci. Sinembargo nos tin cu compronde bon e rol cu medionan di comunicacion tin, e forsa cu nan tin; aunke algun hende ta subestima e periodistanan na Aruba pa sensacionalista, e funcion cu nos tin den e sociedad ta poderoso. Un sociedad mester ta informa, y mas ainda den tempo di crisis.
2. Na Aruba particularmente y durante e prome ola di covid, tambe a tilda prensa di no ta profesional, y hasta di ta innecesario (corda Toque de Queda). Con bo lo contra argumenta esaki?
A mi ta un periodista cu ta bin for di un pais caminda libertad di prensa y libertad di expresion ta sufri atakenan, menasanan, incluso coleganan a cay cera pa informa e pais e berdad cu pa e gobierno no ta bon of no ta cumbini. Venezuela no ta un pais liber pa eherce e trabou periodistico y esey ta loke mi kier pa hende compronde. Aruba a sali den e website di Sociedad Interamericana di Prensa (SIP), di cual mi ta miembro, y den dje a publica cu ‘Periodistanan y medionan a wordo exclui di excepcion di Toque de Queda.’ Siguridad di ciudadanonan, y vooral e miembronan di SIP, ta primordial. Sinembargo, den situacionnan manera esaki di pandemia di Covid-19, medionan di comunicacion y periodistanan ta cumpli un papel vital di proporciona servicionan esencial pa ciudadanonan, informa y comparti informacion di interes publico.
3. Kico abo ta haci pa mehora e imagen y funcion di prensa na Aruba?
Den mi opinion prensa mester ta mas uni, mester ta mas obhetivo y neutral den funcion di informa kico berdaderamente ta pasa, sin color, ni bandera politico. Esey ta forma parti di e etica di un periodista cu mester ta ‘imparcial y sin interes propio’, busca e berdad di dos banda di e medaya. Nos ta traha pa Aruba. Ami cu ta stranhero, cu hopi hende a critica mi y señala mi pasobra mi ta ‘Latino’, tur dia mi ta haci mi best pa e pais aki; esun cu a duna mi e oportunidad di traha, forma mi famia y biba cu calidad di bida. Mi ta hopi gradici na esunnan cu a yuda mi cu esey, pa e motibo ey ban uni y traha pa e pida di baranca aki y asina duna comunidad loke nan mester…e berdad.
Nomber: Andreina Morillo Medio: Bon Dia Aruba Inicio den Prensa: 2018
