Luis Villegas: No tin algo cu a siñami mas cu mi carera como periodista”

Despues di HAVO, Luis no tabatin claridad di kico e lo kier sigui studia. Temporalmente el a explora arte y diseño na Rietveld Academie Aruba. Den mesun temporada el a afronta hopi obstaculo burocratico pa su nacionalidad Hulandes. E interes den expresion creativo aki, hunto cu e frustracionnan cu loke p’e tabata inhusticia, a cristalisa den forma di poesia y varios otro proyectonan creativo. Despues di a aplica pa un vacatura na Bon Dia Aruba, el a ripara cu fuera di gusta skirbi poesia, tambe e tin pensamentonan critico cu e por a expresa por escrito. “No tin algo cu a siña mi mas cu mi carera como periodista.”

Mi ta kere cu e pensamento ta comprendibel. Den boca di pueblo bo sa tende cu cualkier persona por pretende di ta periodista c’un camara y un telefon. Esaki, danki na avancenan den tecnologia, ta berdad. Pero esey ta e realidad den un cantidad di pais. P’ami, e pensamento aki ta faya di mira e problema den su totalidad. Na Aruba, medionan di comunicacion no tin e recursonan pa ta completamente independiente di sea gobierno of sector priva, mirando cu medionan ta depende di benta di avisonan. Esey ta haci cu medionan di comunicacion no tin e recursonan pa haci e trabou di analisa cierto informacion, confirma informacion cu varios fuente, y – mas complica ainda – investiga. Pero no djis esaki, tin e aspecto di e clima politico hopi polarisa, cu ta haci cu tin medionan cu ta claramente pertenece na cierto partidonan politico. Pues ora tin un gobierno di un asignatura, e medio di comunicacion di e asignatura opuesto ta pone mas energia den baha credibilidad di esun na mando, y vice versa.

Den un pandemia, unda tin hopi tension, e ta natural pa sinti c’un medio di comunicacion ta publica cierto cosnan ‘pa malo’, cual por ta berdad. Ken sa… Pero e manera cu mi ta haya mester contraresta esaki ta encera dos aspecto: Transparencia y alfabetisacion riba uzo di medionan di comunicacion bou pueblo. Transparencia ta encera cu instancianan (semi) gubernamental y instancianan priva ta mas tanto cu ta posibel anda cu e proceso di traha decisionnan den un manera transparente y ta publica informacion y data. Esaki ta haci cu tin menos espacio pa crea duda bou un poblacion, ora tin cifranan, documentonan y otro fuente di informacion veridico disponibel y accesibel. Algo cu mi a haci y ta haciendo uzo di dje den mi trabou ta e ley di maneho transparente di Aruba, e Landsverordening Openbaarheid van Bestuur. Maske e ley ta bieu, y den mi opinion no ta wordo respeta y pa e rason ey no ta sirbi, lesando esaki ta cambia henter e perspectiva riba informacion cu gobierno tin. Pasobra segun e ley, cualkier persona mag di pidi pa gobierno publica informacion den forma di documentonan, y gobierno mester publica esaki den cuadro di transparencia. Un par di ehempel lo ta: Cuanto persona a aplica pa permiso di estadia aña pasa? Den ki distritonan tin casonan di covid? Cualkier informacion cu no ta informacion personal, gobierno mester ta transparente cune. Asina bo ta preveni cu tin asina hopi duda, pasobra desde comienso gobierno ta informando.

E di dos aspecto, alfabetisacion den uzo di medionan di comunicacion, ta encera cu pueblo mester ta mas critico den analisis di loke ta sali den prensa. Ora di lesa un texto, mester analisa, entre otro, ken a skirbi e texto, pakico y kico lo a ta e escritor su meta cu e texto. Poco tempo pasa por ehempel, mi a wordo sorpresa pa mira cu Minister Marisol Lopez-Tromp a laga publica un articulo unda ta declara cu den e caso di un ciudadano di Parkietenbos contra pais Aruba pa operacion di e dump y Incinerator, Hues a rechasa e ciudadano su peticionnan pa beneficio personal. Den e articulo ta insinua hopi cosnan contra e ciudadano. Un articulo asina’ki di un minister, cu despues ta sali den prensa manera cu ta conocemento general, sin indicacion di kende a skirbi e articulo, den mi concepto no ta corecto. Mi tabata contento di lesa cu a sali comentarionan critico comentando cu e fuente di e articulo ta obvio y su comentarionan baho. Asina mi ta spera cu mas ciudadano no simplemente lesa algo y asumi cu loke ta wordo skirbi ta berdad. Pero mas leu ainda, mi ta spera cu pueblo cuminsa realisa e importancia di prensa y paga of duna atencion na prensa cu ta haci trabou di calidad.

Esaki ta conecta net bon c’un contesta riba e siguiente pregunta referente e idea cu a surgi durante e comienso di e pandemia cu prensa no ta profesional y hasta innecesario. E comentario cu prensa ta innecesario, di un banda mi ta haya ta bin pa via di ignorancia di kico ta prensa su rol den sociedad. Esaki no ta algo cu ta wordo siña den scol basico y masha poco den scol secundario, pues ta di compronde dicon a surgi e pensamento aki. Di otro banda, mi ta kere tambe cu hopi hende ta fada cu medionan cu hopi biaha ta skirbi informacion eroneo y articulonan cu no ta bay profundamente riba un topico. Na mes momento mi ta haya cu hende mester por critica mas directamente medionan di comunicacion ora nan trabou ta mal haci. Si e ta un bon medio di comunicacion, e lo mester responsabilisa su mes pa cualkier fout. Y alternativamente, semper por stop di apoya un medio por medio di simplemente stop di click, cumpra of suscribi.

Riba e aspecto di profesionalismo, e ta un realidad cu falta calidad bou media na Aruba. Esaki mi ta mira manera un problema mas compleho pasobra mi no ta kere cu specifcamente e problema ta cu tin hopi persona cu no a studia pa ta periodista. Mi mes no a studia, pero mi ta haci lo miho cu mi por, y cu esaki mi ta kere mi a logra gana confiansa di par di persona. Si cuminsa exigi estudio den media, simplemente no lo tin suficiente hende pa yena e posicionnan. Loke si mester por pasa ta mas enfoke riba training y profesionalisacion dentro di media. No solamente esey, pero mester hopi mas enfoke riba etica como profesional di media. Por ehempel, e no por t’asina cu bo ta skirbi tocante un reunion c’un departamento di gobierno y bo mes ta traha den e departamento of bo tabata den e reunion como un participante di otro partido. Esaki ta algo mas complica pasobra cada persona tin su codigo di etica personal, pero mi ta kere cu redaccionnan na tur nivel mester pone mas enfoke riba esaki.

Loke mi ta spera di ta haciendo pa mehora e imagen di prensa na Aruba, ta percura cu mi ta mustra cu mi no ta simplemente un persona cu ta critica pa ningun rason of cu ta critica djis pa ta negativo. Mi semper ta subraya cu critica ta algo constructivo y ta e punto di partida pa mehora. Banda di esaki, mi ta percura pa mi ta husto. Si mi ta critica algo, mi tambe ta menciona kico toch ta bon di dje. Loke mi ta spera nos por yega na dje ta representacion di mas persona responsabel y neutral cu ta duna critica unda critica ta necesario. Mi a menciona e ley di transparencia, y mi ta haya cu e ley mester cambia, of gobierno mester establece un sistema structura pa por trata peticionnan pa documentonan den cuadro di transparencia. Mi a entrega varios peticion den cuadro di transparencia y ningun minister, menos e ex minister actualmente bou investigacion (ironicamente), no a contesta mi LOB, ni despues di a haya orden di Hues.

Te aworaki loke mi a haci pa mehora funcionamiento di prensa na Aruba ta papia abiertamente tocante prensa p’asina conscientisa pueblo y asina mas persona cuminsa papia di e topiconan aki. Tambe, mi a entrega un keho na KPA ora cu mi a haya cu cierto agentenan a stroba mi trabou di tuma video di con tabata aresta entre otro Richi Danies, kendenan a manifesta pacifcamente dilanti Parlamento contra abuso di mucha. Mi ta kere ta importante pa e tipo di cosnan aki ta ‘on the record’ pa oficialmente tin un punto di mehoracion pendiente registra. Mi a entrega e keho aki conhuntamente c’un colega di prensa, pues mi ta spera tambe di e manera aki pa kibra e bareranan entre medionan di prensa cu ta traha manera isla na Aruba, compitiendo, en bes di colabora.

Nomber: Luis Anibal Villegas

Media: Freelance

Inicio den Media: 2017