Kizas bo a pense, pero no kier papia di dje. Psikiatra dr. Hendrikus van Gaalen, como President di Hunta Directiva di Fundacion Salud Mental Aruba ‘Respaldo,’ ta di opinion cu nos lo bay conoce un aumento den e cantidad di persona cu lo presenta trastornonan mental a raiz di e crisis di COVID-19. “E efectonan secundario di e periodo aki lo ta grandi y lo bay sinti nan pa un tempo largo (añanan). Tanto riba e tereno economico, como indirectamente riba e cuido medico en general y particularmente den e salud mental”.
Den entrevista cu Xclusivo Digital Magazine, dr. van Gaalen ta argumenta su punto di bista. Na mesun momento a indica cu ta bogando pa, for di aworaki, traha en conhunto pa brinda informacion na tur frontliner y publico, y asina purba preveni cu mas persona sufri di un malesa mental den e luna y añanan nos dilanti.
Bayendo pa seis luna desde cu COVID-19 a yega nos isla, a puntra dr. van Gaalen riba e efecto cu e pandemia tin riba nos comunidad. “Un problema grandi semper ta cu durante e prome y di dos ola tin menos pashent cu ta wordo transferi.” E realidad aki ta cuadra cu loke expertonan a experiencia durante otro pandemianan manera e Griep Spaño y SARS. “Esey tambe nos ta mira,” van Gaalen a bisa.
Ya caba e profesionalnan den cuido mental ta notando aumento, aunke ta sperando un ola mas grandi den futuro. Segun van Gaalen: “Ya caba tin sigur un aumento, pero mescos cu pandemianan anterior, tin un retraso den su manifestacion dor di e prome liña di duido y e efectonan di e medidanan. Poco poco nos ta wak awo cu e ta creciendo.”
Ya caba tin efectonan visibel cerca cierto cuadronan clinico manera trastorno compulsivo obsesivo, manera autismo, soledad y confusion cerca anciano, tambe den trastornonan di ansha, y depresion.
Tin un mayor menasa di suicidio dor cu stress ta subi pa motibo di pobresa, perdida di diversion den bida. “Bo ta haya inicialmente menos diagnosis, pero esey ta nifica cu tin hende ta cana mas largo cu trastornonan prome cu nan wordo diagnostica,” van Gaalen a bisa. “Pasa mas tempo malo prome cu establece un tratamento ta nifica un transcurso mas largo y pisa”.
Sectornan di nos comunidad pa tene extra na cuenta ta nos hobennan cu ta perde nan interaccion social na scol y esaki ta afecta nan desaroyo social-emocional. Tambe pashentnan psikiatrico existente, hendenan cu ta biba nan so p.e. ancianonan y sigur e cabesnan di famia cu ta esnan cu ta carga e responsabilidad.
Pa maneha e situacion, ya caba e haciendo uso di hermentnan manera e.o. tecnologia caminda ta haci video yamada cu pashent. Aunke e alternativa aki ta yuda bon y ta complementa otro tratamento, a determina cu e ta menos efectivo compara c’un consulta den persona.
Adicionalmente, ta conseha tur persona pa yuda nan mes dor di hiba un bida saludabel cu ta inclui diversion sano manera deporte of actividadnan comunitario, busca perspectivanan nobo, keda leu di actividadnan no saludabel manera alcohol y droga, papia cu otro y brinda otro sosten. Acudi na bo dokter di cas na tempo si ta necesario. No keda deal cu e crisis aki bo so of di manera obsesivo, pero tambe duna atencion na e bida cu ta continua.
Como strategia di combati, Respaldo ta trahando cu cu DVG y Hospital pa un contacto mas intensivo cu tur profesional medico. Hunto ta pensa cua ta e mihor manera pa maneha e crisis di salud mental aki. E fundacion ta recomenda tambe pa mehora e conocemento di esnan den prome liña di cuido riba e tereno di salud mental.
