Den un video riba su Instagram Story, Rachel Brathen, conoci como Yoga Girl a duna un advertencia na su mas di 2 miyon siguidornan pa NO bin Aruba. El a adverti den su video cu na Aruba den menos di 48 ora e casonan a explota y yega na casi 400. Mester agrega mesora cu e informacion aki ta incorecto ya cu e casonan registra y activo na Aruba te na e momento di su video tabata 276 den cantidad. Rachel Brathen su mes tin un yoga studio na Noord y a bisa cu tur otro lugarnan awor ta serando y ta recomenda tur hende pa tuma vakantie na nan mesun cas pues ta recomendanan pa no viaha pa Aruba pa e siguiente lunanan.
Den menos di 24 ora cu el a post su video di advertencia, e reaccionnan negativo riba dje a cuminsa drenta. Hopi localnan a resalta cu na lugar di bisa su mas di 2 miyon siguidornan pa no viaha, pakico e no ta recomendanan pa si nan viaha pa Aruba, pa nan haci esaki den un forma responsabel. Tambe tabatin reaccionnan cu tabata asina rabia cu tabata bisa Yoga Girl pa e bay for di Aruba y pa declare persona non-grata.
E mainta siguiente, e influencer a pone un otro video pa trata na splica cu su intencion no tabata pa bisa hende pa no bin Aruba nunca mas, sino djis pa algun luna debi na e situashon di Covid-19.
Ta interesante pa agrega cu casonan di Covid-19 ta keda midi semanalmente na tur pais pa haya un pronostico di e situashon real. Si haci un comparacion mas leu por conclui cu por ehempel aworaki na Merca tin 755 caso activo per 100.000 habitante mientras cu Aruba tin 215 caso pero 100.000 habitante. Pues Aruba ta 4 biaha menos cu Merca, pues den un sentido, mas ‘safe’ cu Merca pa loke ta e cantidad di casonan.
Pa agrega salo na e herida, awe mainta Yoga Girl ta pone un otro post riba regla di gobierno unda ta pidi tur hende pa bisti un mask y ta referi na muchanan chikito cu mester bisti mask awor. E ta bisa cu e ta contra di esaki ya cu regla aki ta haci muchanan mas vulnerabel na ‘predators’ y ta referi cu den e comunidad di Aruba tin mas pedofiel per capita compara cu cualkier otro pais na mundo. Di unda e coneccion di mucha bistiendo mask pa bira vulnerabel na predators ta un misterio. E no ta splica esaki claramente. Den un mensahe cu Xclusivo Magazine Online a manda pa Yoga Girl pa puntre di unda el a saca e estudio/conclusion cu Aruba ta e pais mas halto den caso di pedofilia na mundo, el a bisa cu esaki ta saca di un estudio di ‘Corsow’ riba e scolnan local na Aruba y un reporte di UNICEF di 2017. Nos a pidi Rachel pa comparti e estudio/reporte aki cu nos, pero te na momento di post e texto aki, nos no a ricibi nada for di dje.
Rachel Brathen ta un Yoga Influencer y ta orginalmente di Zweden y ta bibando na Aruba pa algun aña caba cu su casa, cu el a conoce na Aruba y nan yiu chikito. E ta author di e buki Yoga Girl cu a bira un New York Best Seller loke a dune un jumpstart na fama mundial. Na Aruba, via su Island Yoga Studio, e ta duna les y ta conta cu bishitantenan cu ta bin Aruba pa haci yoga serca dje y na varios lugarnan rond Aruba. Tur cos ta mustra cu e ultimo postnan aki di Yoga Girl a cay den masha mal tera serca localnan. Informacion cu Xclusivo Magazine Online a haya ta cu no ta prome biaha cu Yoga Girl ta ‘bash’ lugarnan local riba su instagram y hopi hende ta cuestiona su actitud y ‘vibe’ mirando cu e ta supposed di ta un hende positivo den su practica di yoga cu e ta haci como trabou.
