E cantante di Dream Girl, hit riba TikTok y otro medianan social a topa cu e entrepreneur miyonario y celebridad riba social media, Gianluca den un encuentro cu awor a bay viral serca siguidornan di islanan ABC. E cantante cu ta biba na Rotterdam-Hulanda, a post e video riba su paginanan social dia 29 di Juli, 2020 y mesora esaki a plama tur caminda. Aparte di esaki por mira Gianluca den varios otro videonan bailando riba e tono di Dream Girl, mescos cu hopi otro hendenanan, grandi y chikito, rond mundo.
KEN TA IR-SAIS
Irgwin Placido Sluis – Ir-Sais – a lanta den e bario di Tera Cora na Boneiro cu su mama. Su tata a fayece ora e tabatin apenas 1 aña. El a cuminsa mustra interes pa musica cu apenas 7 aña y caba cu su 11 aña, el a cuminsa toca drum riba un set cu el a traha di blekinan bashi. E ta un musico di nacemento unda cu aunke e no a bay ningun scol di musica nunca, toch e tabata por a domina varios instrumentonan musical. Na su isla natal Boneiro e tabata forma parti di varios bandanan musical exitosamente. Na 2008 el a muda pa Hulanda y eynan a cuminsa traha riba varios proyectonan musical cu W.S.R Label Mostaman.
E paso grandi den su carera musical a tuma lugar ora el a dicidi pa cuminsa cu su mesun studio na cas dunando inicio asina na su ‘solo career’. Na Maart 2010, el a lansa su prome single ‘Schatje zeg maar’ (Baby Just Tell Me), cual tabata un exito inmediato. El a cuminsa mix zouk cu musica pop y crea exitonan manera; ‘NUWA, Sonja Kumi Awe Nochi, Awo Mi Mes A Mire, Mi Studio, No Worry (Ft Bolle Bof) y ‘The Love Song’ (ft. Unik0). Esakinan tur ta djis algun di su creacionnan. Entre su reconocementonan te cu awor tin; -FunX Awards “Best Singer”, Skempi Music Awards Best Album. DEEPER, FunX XCHART “ABC Ft. Rocco & D.A.N.D.O”, DC pearls “Music & Entertainment” y Premio Carabela.
