Bryan van Putten ta un professional hoben naci na Aruba kende a caba di lansa den luna di mei ultimo e plataforma di compras online yama ‘TurEsaki.com’ y cu ta un ‘marketplace’ virtual estilo Amazon. Eynan tur comerciante local por bira miembro y bende nan mercancia online cu mercado local y internacional. Esaki ta e prome den su estilo pa Caribe Hulandes.
TurEsaki.com ta ofrece na e consumidor e facilidad di shop for di varios comerciante na un solo luga. E usuario por pone e articulonan cu e gusta di diferente luga den su shopping cart, y na final completa e pago na un forma 100% digital cu credit card, debit card, Paypal, iDeal of por opta pa swipe na momento cu e comerciante ta haci entrega di e producto.
Bibando actualmente na Rotterdam, Hulanda, van Putten ta un Marketing & Communication Specialist su punto fuerte ta su pasion pa conoce e ultimo tendencia y desaroyonan, y e capacidad pa implementa esakinan di manera strategico. Atrabes di su compania Rotterdam Marketing Company, e ta conseha y asisti clientenan manera Alphacomm y De Walvis, ademas di Fundacion Museo Arubano, entre otro.
Un di e aspectonan mas beneficioso ta cu hende bibando den exterior lo por haci compras pa yuda nan famianan residencia na Aruba. Por ehempel, un studiante bibando na Hulanda, cu tin su trabou y/of ta ricibi studiefinanciering, lo por subi e website y cumpra productonan riba e adres di su mayornan, of manda flor y regalo pa su famia. Cu un clik, e ta cambia e moneda di Dollar pa Euro anto paga cu su carchi di banco Hulandes.
Xclusivo Magazine a puntra Bryan con ta bayendo te aworaki. El a bisa: “So far so good. Hopi hende a manda tuma contacto pa busca informacion. No solamente retailers (nos mercado principal), pero di compania di carwash pa fruteria, carniceria y di compania di security te cu real estate”. E ta bisa cu “teniendo na cuenta cu ecommerce ta algo hopi nobo na Aruba, nos a scucha e deseonan di e mercado y den varios caso nos a wak con pa acomoda e comerciante. Por ehempel, awo e plataforma ta inclui real estate tambe. Tambe nos tin e posibilidad di ofrece gift certificates”.
Meta di TurEsaki.com ta pa conecta e mercadonan di tur e islanan di Caribe Hulandes cu otro. Despues di e lansamento di ‘TurEsaki.com’ na Aruba, lo sigui cu e expansion cu ta inclui Corsou, Sint Maarten y e islanan BES. Pa e comerciantenan e miembrecia basico di TurEsaki.com ta completamente gratis cu excepcion di un comision chikito riba pagonan digital pa cubri gastonan bancario.
