Dia 18 di Juli tabatin e charter night di Kiwanis Club of San Nicolas. Un anochi unda oficialmente a instala e club aki cual ta e prome (adult) service club na Aruba cu ta sirbi specificamente e comunidad di San Nicolas y vecindario. Esaki tabata un momento historico cu a cuminsa dia 21 di Januari di e aña aki caminda cu 25 persona cu curason y amor pa San Nicolas a bini hunto pa asina lanta e club di Kiwanis aki.
E anochi aki tabatin como tema ‘Summer Night Under The Stars’ y a wordo teni pafor di San Nicolas store cual a pone un statement unico na e anochi aki. Durante e anochi aki a instala e club aki cu a bin ta traha di Januari te cu awor riba diferente proyectonan innovativo y importante pa e comunidad di San Nicolas. Como parti di Kiwanis International, e mision di Kiwanis ta pa mehora un mucha y un comunidad a la ves. Kiwanis Club of San Nicolas su vision ta pa haci esaki door di educa muchanan y hobennan y equipanan cu heramienta necesario pa nan sobresali den futuro.
E anochi aki sigur tabata un anochi inolvidabel cu mensahe nan di inspiracion comparti pa Kiwanis Club of Aruba President sra. Edalitza Weller, Kiwanis EC & C District Governor sr. Robert Spellen, Kiwanis Tradewinds Division LG sr. Marlon der Meer, y Kiwanis Club of San Nicolas su propio Club President sr. Alvin Molina. E mensahe cu a resalta durante e evento aki tabata: “It’s all about service”.
Tur (adult) service clubs di Aruba a atende e evento aki pa asina conhuntamente nos por establece e union necesario pa realisa proyectonan mas grandi y mas impactante pa nos muchanan & comunidad den futuro. Nos di Xclusivo Magazine kier a duna un pabien grandi y desea Kiwanis Club of San Nicolas tur clase di exito cu e reto nobo aki y cu nan por sigui traha pa e comunidad di San Nicolas cu e mesun pasion y determinacion cu nan a bin ta traha cune di Januari te cu awor.
