E noticia ya ta confirma. Despues di tabata presenta sintomanan desde fin di siman, incluyendo keintura, e presidente di Brazil, Jair Bolsonaro, a dicidi pa haci e test pa Covid-19 cual a sali positivo.
Bolsonaro a bagatalisa na varios ocasion e riesgonan di e virus, yamando esaki un simpel griep. Tambe el a urgi gobernadornan regional pa suavisa e medidanan di lockdown, cual el a bisa di ta afecta economia di e pais. Dialuna ultimo el a suavisa e reglanan pa bisti mask na Brazil y su mes, tabata atende varios eventonan sin un mask bisti.
Desde dialuna e cantidad di morto debi na Covid-19 na Brazil a surpasa 65 mil y infeccionnan riba 1.6 miyon poniendo Brazil na di dos lugar despues di Merca.
Riba diadomingo, e minister di asuntonan exterior a post un potret riba su social media di sumes hunto cu president Bolsonaro y otro personanan pa un celebracion di independencia di Merca cu tabatin na e embahada na Brasilia. Ningun di nan riba e potret tabatin mask bisti.
No ta prome biaha cu e presidente a haci e test pa Corona virus. El a haci esaki caba na 3 occasion prome cualnan tur a sali negativo.
