Kico ta amor?

Tin hende cu ta di opinion cu amor ta un decision. Bo ta dicidi pa stima un persona. Esaki ta haci cu bo por scohe pa stima un persona aunke circumstancianan ta menos faborabel, pues ‘den bon y den malo’, ‘den salud y den enfermedad’, etc. Un conclusion saca for di e doctrina di religion y cu ta ancra asta den nos contrato civil di matrimonio. Bo ta corda kico nan a puntrabo y con bo a bisa si na tur e preguntanan aki? Practicamente e systema no ta dunabo otro opcion, si bo kier casa. Pues, esaki ta dicta con cos ta ‘suppose’ di bay den un matrimonio, y ta sali for di punto di bista di un decision di un momento, pa bida largo, of: ‘te ora morto separa boso’. Si bo kier casa, this is it. Take it or leave it. Separacion no ta un opcion. Esaki ta e amor ideal. Un relacion permanente y perpetuo, no importa con malo e circumstancianan por ta…

A base di e tantisimo conversacionnan cu clientenan cu ta splicami con cos ta bay den bida real, ami – cu antes tambe tabata di opinion cu amor ta un decision – awor ta convenci cu amor ta un sentimiento (feeling) cu ta surgi espontaneamente den cada ser. Ariba e sentimiento aki un persona ta basa su decision pa compromete cu un otro persona (commitment) y tambe pa, sea mantene of caba cu e e compromiso aki. E intensidad di e sentimiento aki ta wordo alimenta y manteni door di interaccion positivo y ta wordo daña of destrui (den mayoria caso, lentamente) door di interaccion negativo cu e pareha. Si e interaccion den bista di e persona ta mas positivo cu negativo hopi biaha e persona lo evalua y escohe pa mantene e compromiso. Una vez cu e amor caba na nada, no ta resta ningun sentimiento pa e otro persona y no tin smak ni motibo mas pa mantene e compromiso, y e decision lo ta pa separa.

Pero ora papia di amor, no por perde completamente for di bista, aspectonan biologico. Amor hopi biaha ta wordo relata na e curason, pero tin otro organo principal cu ta encarga cu e produccion di quimica natural, asocia cu amor. Kico ta pasa cu e cerebro di un persona, cu ta ponele sinti enamora? Tin varios hormona ta hunga un rol pa cu amor, afecto y compromiso. Pero tin un hormona en particular, cu tin un efecto duradero, y esaki yama Oxytocin.

• Oxytocin saw ordo yama tambe ‘love hormone’, ‘cuddling hormone’ of ‘bonding hormone’. Su efecto principal ta cu e ta haci cu nos ta ‘bond’ cu otro, pues e ta mantene y estrecha e lasonan di pareha.
• Oxytocin ta wordo produci naturalmente door di e cerebro durante parto y dunamento di pecho. E ta kita miedo, facilita contraccionnan, y ta promove e ‘bonding’ entre mama y yiu.
• Oxytocin ta wordo produci na momento di touch, brasa of sunchi otro y su efecto ta duradero. Pues, e ta hacibo sinti felis y stima.
• Oxytocin ta wordo produci den cantidadnan halto durante relacion sexual, ta pone un pareha ‘pega’ na otro, esaki tambe ta e motibo cu hopi biaha bo tin intimidad cu e mesun persona, mas e lasonan cu e persona aki ta wordo estrecha.

Esaki ta nifica cu nos tur ta fout y cu amor ta nada mas cu quimica? Mi no ta kere cu esey lo ta un conclusion demasiado simple. E pregunta kiko ta amor lo hiba nos na un discusion sin final. Mescos cu e preguntanan: “Ki color lama ta?” “Ta existi un Dios?” Of: “Ken tabata prome, e webo of e galiña?” kico ta amor, ta depende di bo punto di bista.