Rose-ann, bida entre maternidad & trabou

Rose-Ann tabatin 11 aña den e posicion di Marketing Manager na RBC, un trabou cu e tabata gusta, pero na banco semper e tabata bisa cu e dia lo yega cu e lo join su famia den e negoshi familiar hunto cu su otro rumannan. Su famia ta e creadornan di e famoso Pika di Papaya di Aruba. “Tata di mi abuelo a pasa e formula pa mi abuelo kende despues a pasa e formula pa mi tata kende na su turno, poco poco a perfecciona esaki cu ayudo di un chemisch technoloog y bacterioloog. E temponan ey, e Pica di Papaya tabata wordo traha solamente pa famia y amigonan. Na 1985, despues cu e refinaderia LAGO a sera y cu e economia tabata bayendo malo na Aruba, nos famia y amistadnan di mi mayornan a encurashanan pa e purba comercialisa e Pica di Papaya y asina tur cos a cuminsa. Mi mayornan tabata e uniconan cu tabata dedica na e procesamento di Pica di Papaya e tempo ey. Mi tata a dicidi di tuma curso di horticultura y agricultura y alavez prepara su tereno pa cuminsa planta entre otro papaya y promente. Prome nos a cuminsa cu e Pica di Papaya cual awo ta yama Hot Delight Papaya y mas despues nos a bin cu Hot Delight Madam tambe riba mercado. Nos sa cu hopi hende no conoce e nomber di compania Kelant-Rose paso nos ta mas conoci como e compania di Pika di Papaya. Mi mayornan ta hendenan hopi simpel y humilde. Mi tata semper tabatin e pensamento “Work hard in silence, let success make the noise.” Nos ta exitoso pa hopi aña caba sin haci ningun tipo di propaganda; nos negoshi a crece tur e tempo aki simplemente dor di “mond tot mond” reclame. Pues gran parti di nos exito ta danki ne sosten grandi cu nos ta haya di pueblo di Aruba. Nos Arubianonan ta hopi orguyoso di nos productonan. Business ta den mi sanger; semper mi a gusta business mescos mi tata. Despues cu mi a cabi studia na Hulanda mi tabata kier a join e negoshi di biaha, pero mi tata a bisami cu e kier mi bay traha otro caminda prome haya experiencia a despues bin traha pa nan.

Mientrastanto, mi mayornan tin mas di 70 aña y mi ta haya a yega ora pa nan cuminsa relax y enjoy mas di nan bida. Mi ta hopi contento cu mi a traha na un banco asina reconoci p’asina hopi tempo pasobra mi logra siña hopi. Tur e experiencia cu mi a gana na banco mi por implementa awo den e negoshi di mi mayornan. Awo cu mi tin baby tambe mi tin hopi mas flexibilidad trahando pa mi mayornan. E trabou no a bira menos cu na RBC; mi mester bisa mi ta mas druk cu nunca pero ta e right timing pa mi a haci e move aki. Actualmente mi ta bezig ta restructurando hopi cos den e compania. Esey ta tuma su tempo. Pues esey ta mi plannan pa e aña ‘ki y cuminsamento di otro aña. Den largo plazo ta pa expande e negoshi mas ainda y bay asina leu cu nos por cuminsa cu exportacion di nos productonan. Aparte di esaki mi mes tambe tin mi mesun negoshi di Zumba cu yama Arubazumba Fitness cu maske e ta un negoshi chikito, mi a siña hopi di dje.

Di e momento cu mi a sali na estado mi a bisa mi mes cu mi ta bay duna mi yiu pecho pa sigur e prome 6 lunanan pasobra mi sa cu esaki ta lo mas saludabel pa mi baby. Ta mi prome yiu pues mi no tabatin ningun idea si mi lo bay wanta esaki asina largo of no, si e ta algo facil of dificil mi no tabata sa nada di “motherhood”. Ma kere duna bo yiu pecho lo bay vanzelf pero mi a struggle hopi e prome tres lunanan. Tur manera mi a purba di duna mi yiu pecho, cu hasta ayudo di specialistanan, pero e no tabata bay. Mi baby no kier a pega na mi pecho, pero mi no a ‘give up’. Tur dia mi tabata sigui purba y te despues di 3 luna el a siña bebe na pecho y awo ta esey so e kier y no kier nada otro. Awo a pasa casi 10 luna caba y mi mester bisa e ta algo hopi bunita pa comparti cu bo baby. E ta un momento inexplicabel con bo ta bond cu bo baby como mama. Mas cu claro oranan di marduga cu bo kier drumi y mester duna pecho ta menos leuk of ora e dal bo un mordi bo ta pensa “Oh, mi ta kere mi tey stop”.

Y no tur dia ta mesun facil pero si mi tin cu haci tur esaki di nobo sigur mi lo kies pa duna mi yiu pecho atrobe. Mi ta un persona cu ta come basta saludabel generalmente pues mi no mester a cambia mi manera di come. Mi a bira vegeteriano mas o menos un 6 luna pasa y mi ta zorg pa bebe mi suplementonan pa mi lechi di pecho ta mas optimal ainda. Breastfeeding, un taboo? ”Mi por bisa cu maske mi ta duna mi yiu pecho so te awor nunca mi mester a duna mi yiu pecho den un lugar publico paso semper ma zorg pa e come prome nos sali y nos ta zorg pa ta na cas bek pa ora e mester come atrobe. Y si nos ta mas largo riba caminda mi ta dune den auto. Pero si mester ta e caso cu mi tin cu dune den publico mi no tin ningun problema pa haci esaki. Maske mi ta pensa (y esey ta mi opinion) cu si bo hacie den un lugar publico pa tene respet pa otro y tapa bo mes. No ta tur hende ta gusta y ta sinti nan mes comodo, pues mi ta sinti cu mester tene cierto respet pa tur hende. No tin nada mihor pa bo baby cu lechi di pecho y ami como mama kier lo mihor pa mi yui. P’esey ami sin duda a escohe pa duna mi yiu pecho. Mi ta kere hopi muher no ta skohe pa breastfeed paso esaki ta hopi trabou y ta tuma tempo. Traha un boter cu formula ta hopi mas liher y facil.

Nos como mama y vooral ami mes cu ta un persona conoci den e mundo di fitness tin e preshon grandi pa ‘get back in shape’ liher. E no ta leuk, paso ne momento cu bo haya baby nos tur ta keda c’un bariga grandi cu nos kier baha liher pero ta dificil paso bo tin un baby chikito cu ta kita tur bo tempo y ta laga bo morto cansa. Pues sigur e no ta facil, pero no ta imposibel tampoco. Ami ta pensa den bida si bo kier logra algo bo tin cu traha p’e. Ami a haya yiu cu operacion y asina mes despues di 6 siman mi a cuminsa train poco poco pa yega na mi meta. Pues mi tips pa tur mamanan ta: 1. purba train por lo menos 30 min tur dia. Awendia bo por haci hopi cos na cas mes sea mainta prome bo baby lanta of ora e bay drumi anochi. Tin asina hopi cos riba Youtube of DVD’s cu bo no mester bay un gym of un fitness les si bo no tin tempo pa esey. Y 2. duna bo baby lechi pecho. Ami a subi total 19 kg y ma baha 23 kilo te awo. Pues mi ta mas flaco cu prome cual ta debi na mi training di Zumba cuatro biaha pa siman pero tambe tin haber cu mi ta duna pecho paso cu duna pecho bo ta kima un averahe di 500 caloria pa dia.