Melanie & Illeandra di Melz Fashion

Chens ta grandi cu bo lo a mira diferente ‘posts’ riba medianan social di e tienda Melz Fashion caba pero kizas loke bo no tabata sa cu e boutique aki ta maneha pa dos ruman muher, Melanie y Illeandra, ambos ta comparti nan genetica como ruman pero tambe nan pasion pa moda. Di diseña paña desde chikito, pa habri un tiendra exitoso, e dos rumannan aki ta un prueba cu ningun soño ta mucho grandi si bo tribi na traha pa haci esaki un realidad! Sera conoci cu e ruman nan tras di Melz Fashion.

Melanie (34) y Illeandra (29) a lanta nan dos como ruman den un famia chikito. Nan tata tabata esun cu tabata traha pa percura pa tur loke cu tabata necesario den nan hogar mientras cu nan mama tabata semper na cas, dunando nan e bon cuido. Ambos a studia na Aruba di scol primario te na Universidad di Aruba. “Nos mayornan semper a percura pa nos y a sacrifica hopi pa nos por a haya un bon educacion y recuerdonan hopi bunita di nos infancia”.

Melanie a sali na estado y a haña yiu na un edad relativamente hoben, asina mes el a lucha pa sigui studia y caba su scol. “Mirando cu mi a haya yiu cu 19 aña, mi pareha cumi a dicidi pa keda Aruba y asina mi a sigui Universidad di Aruba den area di mercadeo.

Mi a logra obtene mi titulo di Bachelor den 4 aña”, Melanie ta splica. Illeandra, e mas chikito, tambe a opta pa completa su estudio na Aruba mes, na lugar di bay afor. “Mi a logra mi MBO opleiding na EPI sector Economia y despues mi a bay Universidad di Aruba unda mi a logra Bachelor den Finansas”.

Despues di a traha 4 aña den e mundo di seguro, Melanie di su banda, a sinti cu e tabata cla pa algo diferente y asina el a dicidi pa bay traha riba su mes, lantando Melz Fashion, un boutique di paña pa hende muher den Paradera/Piedra Plat. Aunke e mes tabata bayendo scol ora cu su ruman a bin cu e idea pa habri e boutique, Illeandra desde cuminsamento a yuda Melanie cu Melz Fashion despues di scol. Na e momento cu el a caba cu su estudio na Universidad, Illeandra no a pense dos biaha y a scoge pa pa bay traha cu su ruman Melanie full-time. E ta admiti cu e negoshi ta tene semper ocupa y cu e trabou ta hopi diversifica, locual ta haci cu e ta disfruta di esaki planemente.

“Semper nos a gusta e mundo di moda, cual ta uno cu ta cambia constantemente. Mi ta corda cu Illeandra di chikito tabata gusta hunga con e ta diseña paña y pone esaki pa bende”, Melanie ta conta na harimento cordando e bunita etapa aki.

“Ora cu e oportunidad a presenta algun aña atras pa habri Melz Fashion, nos no a duda ningun rato pa haci nos dream come true. E aña ‘ki Melz Fashion lo cumpli su prome lustro.

Nos ta un tienda cu ta ofrece pañanan trendy pa hende di tur size y tur gusto. Nos kier pa na momento cu e clientenan drenta Melz, nan sinti nan mes comfortabel y sigur di nan mes. Nos vision ta pa sigui crece y innova. Nos kier sigui ofrece nos clientenan e ultimo tendencianan den moda. Tambe nos kier semper keda innovativo, treciendo hunto ideanan nobo p’asina duna nos clientenan mas di loke nan ta spera. Meta mas importante pa nos ta pa sigui ofrece e mihor servicio na nos consumidornan”.

“Cada un di nos tin nos tareanan diario cu nos tin cu cumpli cu nan. E tareanan ta varia entre busca mercancia, haci mercadeo, trabou administrativo y asina nos por sigui menciona mas”, Melanie ta splica. Illeandra, por ehempel, cu su background academico ta esun cu ta encarga cu e parti administrativo di e tienda, pero tambe bo lo hay’e ta atende cliente, ‘set-up’ e store pa expone e coleccion nobo, prepara pa e photoshootings etc… Melanie di otro banda ta ocupa sumes cu e parti di busca mercancia, brainstorm con pa innova, haci mercadeo y percura pa tur cos cana bon pa loke ta trata e servicio na cliente.

“Den corto bisa, nos ta all around haciendo nos esfuerso tur dia, p’asina duna lo miho di nos mes na nos clientenan. E reto di mas grandi cu nos tin como entrepreneurs ta cu semper nos mester ta on the run y purba di ta un stap dilanti. Esaki mirando e competencia fuerte cu tin local y internacionalmente. Nos ta dedica completamente na maneha Melz Fashion, cual sin duda ta un full-time job, cu nos ta haci tur dia cu hopi amor y dedicacion”.

“Nos conseho ta, si bo kier cuminsa bo propio negoshi, djis bay p’e! Berdad e por ta un reto, pero sigur na final e lo ta bale la pena! Si nos por cambia algo lo ta pa tin mas incentivo pa e comerciantenan local cu kier cuminsa cu nan negoshi. Si bo kier start bo propio negoshi, e no ta un tarea facil. Tambe realisa cu pa bo ta doño di bo mesun negoshi lo no ta un trabou di 8 ora, ni di dialuna pa diabierna, pero na final e lo ta uno cu ta bale la pena! E satisfaccion cu bo ta sinti di mira bo clientenan sali contento no tin prijs. E parti mas importante ta pa kere den bo mes y nunca give up!”

NOMBER COMPLETO: Melanie Elise Samson 
EDAD: 34 aña 
ESTUDIO: Bachelor Degree den Mercadeo 
PROFESION: Directora Melz Fashion

NOMBER COMPLETO: Illeandra Carmelinda Samson 
EDAD: 29 aña 
ESTUDIO: Bachelor Degree den Economia 
PROFESION: Directora Asistente Melz Fashion