Aymar Middendorp, conoci como ‘Aymar Torres’ na Hulanda, ta un di e Arubianonan cu recientemente a participa den The Voice of Holland. Dunando les di musica aya na Hulanda, Aymar a wak e oportunidad pa participa y asina gana un experiencia nobo den su bida como artista. Pero ken ta Aymar? Sera conoci cu e hoben aki cu ta marcando su nomber leu for di cas na Hulanda. . .
Infancia
Aymar ta conta cu na Aruba e ta conoci como Aymar Middendorp, pero na Hulanda e ta uza e nomber artistico ‘Aymar Torres’ cual ta fam di su mama. Esaki segun Aymar ta pa motibo cu e ta zona mas exotico na Europa. Aymar ta conta cu e ta un persona hopi druk y cu hopi energia ainda. “Mi no por sinta keto mucho largo, mi tin cu haci algo constantemente. Semper mi tabata e mucha homber fastioso na fiesta di famia cu ta core rond y bula tur caminda. Te dia di awe mi no por para un caminda keto”.
Aymar semper tabata gusta musica, deporte, arte y teatro. “Mi tabata den atletiek, futbol, judo y bodyboarding. Mi lo a desea di haci mas deporte, pero esaki lo a bira di mas p’ami mi ta kere”. Aymar a lanta den e bario di Wayaca y a crece den un hogar yena cu musica y instrumento. “Mi tata ‘Mario Middendorp’ ta un musico na Aruba cu pa varios aña a toca cu Padu del Caribe y varios otro artistanan grandi Arubano. Mi a lanta cu dos ruman muher cu tambe ta destacando den musica na Aruba. Heidi Middendorp (guitarista y bahista) y Aimee Middendorp (cantante). Mi mama Aydee Middendorp-Torres tambe ta canta den coro di misa cu mi tata”.
Un di e recuerdonan di mas bunita di Aymar tabata con su tata tabata lantanan tur den cas tur mainta cu musica (sea radio of CD-player, of e mes tocando algo riba guitara). “Esaki no tabata falta ningun dia. Cu mi 6 aña mi a cuminsa toca maraca den coro di misa y eynan mi bida musical a cuminsa. Cu mi 12 aña mi a cuminsa toca baho y guitara pa diferente banda y cu mi 16 aña mi a siña mi mes canta”. Aymar a bay biba cu su 19 aña na Hulanda, pero semper e tabatin e sosten y ayudo di su mayornan y su rumannan. Nan ta esnan cu a hunga un rol grandi den su bida artistico.
“E recuerdonan di mas bunita p’ami den mi infancia tabata pasa tempo serca mi welanan Mama Ita y Tantichi. Nan a siñami wanta mi pia riba tera y ta humilde. Nan tabata e pilarnan di mas grandi den mi infancia. E recuerdo di mas bunita p’ami di mi hubentud tabata toca na fiestanan di rock na Aruba. Tabatin varios fiestanan di rock na cas di hende y tambe e fiestanan di rock na MT (Na Savaneta)”.
Descubrimento di su talento
Aymar tabata sa semper, for di chikito caba, cu e tabata kier a para riba escenario y pone show. “Mi ta un persona auto-didacto. Mi gusta siña tur cos mi mes cual ta haci cu mi ta hopi cabes duro. Mi kier sa un tiki di tur cos. Por ehempel, mi a siña mi mes canta, toca instrumento, graba mi mesun musica, mix mi musica, traha videoclips, traha yers, posters etc.
Mi a pasa hopi tempo sera na cas ta practica diferente instrumento y tambe canto. Mi gusta teatro, cual ta encera actuacion. Como un artista/cantante, mi ta haya cu bo mester sa actua un poco tambe. E actuacion ta parti tambe di entretene hende. Bo no por djis para keto riba escenario sin bisa nada na e publico. Pero claro, tur artista ta diferente y mi ta respeta otro opinionnan”.
Eherciendo su pasion como profesion
“Mi tin 8 aña ta duna les di guitara na un scol di musica na Leiden, Hulanda cu ta yama The Rockschool. Tambe mi ta duna algun les basico di baho, piano, ukulele y drums. Tin algun alumno cu tambe ta tuma les di song-writing serca mi. Mi profesion ta haci cu letterlijk tur dia mi ta bezig cu musica. P’ami e ta dus facil di combina duna les y toka shownan. Mi ta un freelance-teacher. Dus si mi tin cu toka mi ta djis zorg pa mi tin un suplente pa duna e lesnan p’ami. Toka den shownan p’ami ta un prioridad”.
Pa Aymar, compone su propio cancion ta nifica ‘show his inner-self to the world’. “Tur mi emocion, energia, pasion y amor ta bay aden. Esaki bo ta laga mundo henter scucha, cual por ta un poco dificil”. Aymar su reto di mas grandi ta purba di yega na toca den e festivalnan di mas grandi na Hulanda y Europa. “Positivamente, un di mi retonan di mas grandi te awor tabata toca baho pa e banda Orange Grove na Tokio y Nagoya, Hapon. Esaki tabata mi prome tour c’un banda den exterior y e soño dimi di mas grandi a bira realidad, cual tabata di bishita Hapon”.
Marcando su nomber na Europa
“Mi a haci mi Blind-Audition pa e programa The Voice of Holland cu e tema di Sergio Mendes, ‘Magalenha’ y mi a mix esaki cu e tema di DJ Snake, ‘Taki Taki’. Tur 4 stoel a bira p’ami y mi a scohe Lil’ Kleine como mi coach. Despues di e Blind-Audition mi a sigui pa e sigiente buelta cual tabata The Battles. Mi mester a competi contra un Cubana den un tema cu nan a scohe pa nos cual tabata Livin La Vida Loca di Ricky Martin. E cantante Cubana, cu tur mi respet, a gana dimi y a bay e siguiente vuelta di e programa aki. Te akinan mi aventura di The Voice of Holland a yega, pero mi a gosa hopi di por a participa y experencia un produccion asina grandi y profesional”.
Di e experiencia aki Aymar a siña pa pusha su mes den un otro nivel. “E participantenan di The Voice of Holland ta di un nivel masha halto, y como persona mi tambe kier resalta entre nan. El a tumami algun siman pa prepara pa participa na e programa aki. E tempo cu nan ta dunabo pa prepara un cancion ta cortico, bo tin actua liher y tin varios deadlines. E cos mas importante ta pa bo keda profesional na tur momento”.
Aymar a haña sa cu e lo ta participando na The Voice of Holland ora nan a yame puntre si e kier tin e oportunidad pa participa na e programa aki. “Na The Voice of Holland nan tin scouts cu ta busca talentonan local na Hulanda via medionan social manera Youtube, Instagram y Facebook. Asina nan ta aserca talentonan y ta puntra nan si nan kier tin un oportunidad pa participa den The Voice of Holland.
Nan a yamami via telefon y a contami cu nan a wak un video dimi riba YouTube ta ‘cover’ e cancion brazilero ‘Canto de Ossanha’ y nan gusta locual mi a haci y a puntrami si mi kier a bay haci ‘audition’ pa nan. Mi a pense dos biaha prome cu mi a bisa si, pasobra e ta un paso grandi. Alfinal mi a bisa si y mi mester a haci dos ‘pre-audition’ prome cu mi por a bay haci ‘audition’ riba television. Asina aki bo por wak con dificil e ta pa yega riba television. No ta asina asina nan ta asercabo y no ta zomaar nan ta escohebo”.
“Participa na The Voice of Holland como un Arubiano a yena mi cu orguyo di por representa nos dushi isla di e forma aki. Aunke no ta mi prome biaha representando Aruba riba television na Hulanda.
Mi a yega di participa caba den un otro programa di television na 2013 cu ta yama ‘The Beste Singer-Songwriter van Nederland’.
Tambe mi ta orguyoso di por a topa Jeremy Garcia como un otro Arubiano mas, dus toch Aruba a wordo bon representa den e edicion aki di The Voice of Holland”.
Futuro musical
“Pronto mi ta bay release mi propio canticanan na Papiamento y asina aki sigui promociona nos idioma den exterior. Mi ta desea di sigui viaha rond mundo cu musica. Toca na diferente pais y djis continua cu mi soño di toka rond mundo”.
“Mi conseho ta pa bo tuma bo soño na serio. Si bo tin e passion p’e, traha duru p’e y bo lo logra. Un cos hopi importante ta cu bo mester practica, practica y practica. Bo lo no logra nada si bo no practica y traha tur dia pa pusha bo mes pa bira mihor pero tambe hacie cu hopi amor”.
NOMBER COMPLETO: Aymar Middendorp EDAD: 32 aña ESTUDIO: Leraar Spaans 2e graads PROFESION: Maestro di guitara/ Musico BARIO: Den Haag, Hulanda/ Wayaca, Aruba
