Epitome di moda na Aruba
E arte di retail, esta satisface e demanda pa medio di un cadena di suministro, ta algo cu ta existi for di antiguedad. Moda y trend, mescos cu retail, tambe ta un factor cu semper a existi den sociedad, cambiando constantemente cu e curso di tempo. E cambionan ta asina drastico y rapido cu solamente esnan cu sa con pa aplica nan mes ta logra keda na e top.
Den ningun sentido esaki no ta facil, si bo no cambia y move den e direccion cu e ta bay, tin biaha pa medio di prediccion y contacto directo cu bo mercado, bo por keda atras y perde bo influencia.
For di principio di su Fashion Empire, Diana Helder Lerma a demostra cu e tin un wowo increibel pa trends y un tacto special pa haci negoshi. E ta posee un sensibilidad hopi desaroya pa mira e cambionan den mercado, pa ofrece pa cada grupo demogra co exactamente locual nan ta desea y specialmente, sea ta hoben, mas mayor, flaco, mas yen, semper e tin pa ofrece algo cu nan por identifica nan mes cune, algo pa nan sinti nan mes bon den dje, pero mas ainda, algo cu lo laga nan sinti nan mes sigur di nan mes.
E midas touch
Un persona di un estatura chikito, pero c’un personalidad hopi grandi, un inteligencia hopi desaroya y un wowo pa moda manera ningun otro, Diana ademas di esaki ta un perfeccionista, cual ta haci cu su paso den negoshi ta keda marca pa exito y crecemento constante. Esaki a culmina recientemente cu e apertura di Aruba su tienda di mas grandi cu no ta un ‘international brand’ sino un ‘local brand’ di su mesun nomber, sigur algo cu e y su team por ta hopi orguyoso di dje. Casi e no ta husto pa bisa cu e D- Shop nobo ta un tienda, paso e ta hopi mas cu esey.
E ta un centro di beyesa na unda homber y muher ta sinti nan mes bon bini pa drenta shop, busca inspiracion y haya tur locual nan mester pa sali no solamente bon bisti sino tambe sigur di nan mes.
Apesar di tur su exito te dia di awe bo por topa Diana canando den su tienda combersando cu tur cliente y dunando conseho. E tipo di atencion personalisa aki ta locual ta duna su entorno un ambiente unico y ta haci cu clientenan ta keda fiel na dje.
Diana su business acumen como entrepreneur sigur ta un case study pa cualkier hoben eyfo cu ta desea di cuminsa cu nan mesun negoshi, pero tambe ta sirbi di inspiracion pa e siguiente generacionnan cu cosnan grandi ta posibel na Aruba mes, si bo tin e disciplina y e wowo pa reconoce oportunidad.
Mas impresionante ta cu mientras hopi otro negoshi di retail ta struggle y kisas perde animo contra e amenaza di online shopping, Diana ta sigui crece y kere den brinda no solamente un producto di retail, sino un experiencia… kisas, e clave di su exito.
