1. XCL: Unda bo a nace y con bo infancia tabata?
Mi a nace na Colombia, pero desde mi 6 luna, mi mayornan a hibami Panama. Mi tin un ruman homber, cinco aña menor cumi. Mi infancia tabata uno hopi extrovertido ya cu desde chikito mi tabata gusta deporte (Futbol y tenis). Mi tabata adicto desde mucha na gym y tur loke tabata trata beyesa.
2. XCL: Kico bo a studia y den ki sector bo a traha?
Mi a studia Psicologia’ y mi ta specialisa den ‘Psicopedagogia’. Y tambe mi a studia ‘Cosmetologia’ y ‘estetica integral’ pero mas despues mi a specialisa den ‘cosmiatría avansa den aparatologia y micropigmentacion facial’. (Mi ta gusta studia) awor mi ta bay pa mi diploma di assistente medico di cirugia plastico. Mi ultimo trabou tabata di hefe den recurso humano den un cadena di companianan hopi reconoci na Panama durante 4 aña.
3. XCL: Di unda bo pasion pa estetica?
Mi ruman chikito a sufri hopi cu bullying door di acne severo y mi a biba cune full e proceso den tratamento estetico. Tempo nan a aya e tratamentonan aki tabata hopi caro y doloroso awendia estetica a avansa asina hopi cu e problema di acne por wordo resolvi sin tanto dolor y den menos session. Pues di eynan a nace mi amor pa estetica.
4. XCL: Bo tabata conoce Aruba prome?
Mi tabata conoce e islanan di Antias solamente via potret. Mi plan tabata di bay biba na Israel unda cu ya mi a yega di biba pa dos aña caba pero destino y cupido a hunga un rol hopi fuerte den mi bida. Mi a conoce e amor di mi bida cu a trecemi ‘kinan, definitivamente semper mi a yega di bisa ‘Aruba a escoge ami’.
5. XCL: Ki tempo ba yega Aruba y cua tabata bo prome impresion?
Mi a yega Aruba 5 aña pasa ora mi a conoce mi casa na Panama y el a invitami pa bin conoce Aruba y de nitivamente mi a encanta Aruba door di tanto idioma cu ta wordo papia y e cultura cu ta casi mescos cu esun di nos na Panama paso nos ta multicultural.
6. XCL: Bo a cuminsa di traha di biaha asina cu ba yega Aruba?
Ora mi a yega Aruba mi a dura casi 1 aña sin traha. Cambia di un pais grandi na un isla chikito tabata un cambio extremo, ta hopi importante pa sa cu sali di bo zona di comfort nunca ta facil. Awendia mi ta sinti mi sigur y felis di a tuma e desicion di un cambio exitoso di Panama pa Aruba.
7. XCL: Ki tempo ba habri bo estetica y cua ta bo meta cu esaki?
Mi estetica ta mas cu un negoshi. E ta un lugar unda mi ta sintimi manera un heroe cu superpowers pa yuda diferente tipo di persona y yudanan cu nan autoestima y dunanan bek e seguridad emocional y fisico. Tin hopi cliente cu ta sufri di cambionan hormonal drastico di cual esaki ta laga marca di un cambio den adolecencia. KathyD no ta enfoca solamente den adolecentenan, tambe nos kier yega na e hende muher cu awendia door di vanidad ta destrui nan beyesa natural informandonan di cada tratamento specifico y e importancia di tuma e decision di un cambio drastico ora di aplica botox of tratamentonan invasivo.
8. XCL: Na ki momento ba cuminsa cu e fase di educa y duna presentacionan na fundacionnan y dicon?
Mi a cuminsa for di mi 15 aña na duna charla den un gruponan. Ora mi a yega Aruba mi kier a sigui haci mescos. Tur cos a cuminsa ora mi tabatin diferente clientenan cu ta maestro y nan tabata contami cu tabatin diferente hobennan cu tabata saca nan ‘blackheads’ un tras di otro den klas y cu tabatin di nan cu tabatin problema cu nan autoestima. Tin hende no ta kere pero autoestima den un persona cu ta sufri di acne ta super abou y ta biba bou hopi stress, eynan e lus di idea a sende. Ma puntra mi mes, ken lo ta bisanan over di risico di transmision di bacteria severo ken ta educanan over dicon nan ta haya acne y ta informanan cu e 85% di adolecentenan ta haya esaki. Y asina mi a pidi un cliente cu ta un maestro pa mi por asisti y papia cu nan over di e tema importante aki. Asina KathyD a cuminsa asisti na scolnan. Awendia mi no ta bay scolnan solamente pero tambe fundacionnan, companianan priva. Mi a yeg’i bishita KIA cu workshop pa hende muhernan y tambe institucionnan di gobierno y hopi fundacionnan, kampnan den vacantie di muchanan y tur esaki ta totalmente gratis.
9. XCL: Cua ta e reaccion di e personanan hayando e presentacion na e fundacionnan?
Depende na cua fundacion mi bay, semper tin diferente reaccion y experienca di persona, por ehempel ora ma bay fundacion Sonrisa e muchanan a enjoy cu e diferente colornan y holornan di e cremanan, contrario ora ma bay Maristela. E señoranan a comparti diferente experiencianan di e cuido di nan piel den nan hubentud. Di otro banda ora mi bay scolnan hopi adolecentenan ta bombardea cu diferente preguntanan y e ta comberti den un workshop hopi informativo. Semper mi ta purba pa e workshopnan no ta laaf y p’esey cada biaha mi ta haci esaki diferente.
10. XCL: ua fundacionnan ba yega di presente cursonan y cualnan tin un recuerdo unico pabo?
Fundacion Sonrisa , Fundacion Maristela, Kamp Don Bosco, Fundacion Cas Marie Fundacion hende muher den di cultad , Fundacion FAVI , Orthopedagogisch centrum, KIA, Universidad di Aruba, Filomena Mavo, St. Paulus School, Maria College SVGA (persona cu limitacion intelectual), EPB HATO, Riu hotel, Hotel Tamarijn, Organisacion di Miss Aruba, Organisacion di beauty Curves Diferentes Gruponan di superacion religioso y entre otro gruponan….
11. XCL: Ba duna workshopnan na scolnan tambe, con esaki ta wordo tuma y cua ta e problemanan mas comun den e hubentud y dicon?
Na scolnan e experiencia ta diferente cu e hobenan y nan ta keda impacta ora nan wak cu nan ta haci tanto fout den e bida cotidiana cu ta afecta nan cutis, manera seca bo cara cu e mesun serbete cu bo ta seca full bo curpa. E problema den e hobenan ta cu nan no ta realisa cu hubentud ta un rato y no ta realisa cu cualkier cos cu nan ta haci awo na e momento aki ta sigui nan futuro como un persona adulto ya sea den nan bida psicologico, fisico of spiritual.
12. XCL: Manera doño di bo mesun negoshi dicon bo ta pensa cu ta importante pa crea espacio y haci e tipo di trabounan aki comunitario?
Comunidad ta bo clientenan y clientenan ta prioridad y e prioridad di KathyDskincare ta informacion y tratamentonan real y 100% efectivo. KathyD no ta un negoshi solamente pa genera placa. Mi kier keda conoci realmente door di duna bon informacion. Como un doño di un negoshi bo mester duna comunidad bek p’esey mi ta purba di ta involucra den hopi fundacionnan y eventonan boluntario.
13. XCL: Cua ta bo plan pa futuro cu bo estetica?
Mi tin 30 aña y mi ta pensa den hubila cu mi 40 aña. Mi kier probecha e 10 añanan cu ta keda mi di servicion pa cuminsa construi mi nomber pa por habri un scol seminarista specialisa den formacion y desaroyo di cosmetologa. P’esey mi ta siñando pa por papia Papiamento y Hulandes pa por duna e lesnan den e idiomanan aki. Mi kier representa e pais di mi yiunan Aruba den workshopnan grandi den e mundo di estetica y cosmiatría, un soño cu ta den plan di accion.
14. XCL: Con bo ta maneha bo trabou y bo famia?
Tin biaha ta dificil paso mi no gusta crèche, esey kiermen cu ta un mama y un prefesional ta basta dificil pero mi yiunan ta e motor pa cu mi negoshi prospera, y mi negoshi ta e sosten di mi yiunan pa sali dilanti. Mi ta dedica tur e tempo cu nan ta na scol pa mi por atende mi clientenan y por haci mi workshopnan.
15. XCL: Conseho:
Un negoshi cu no ta duna comunidad bek no ta haya gratitud di nan clientenan. Exito semper lo ta duna bek.
