Comete eror, manera semper ta keda bisa, ta humano. Eror ta siña nos ken nos ta y con nos kier biba, e ta siña nos cu nos por comete un fayo pero esey no lo haci cu nos ta menos stima pa esnan rond di nos, e ta siña nos enfrenta nos miedonan y e ta siña nos bisa y accepta e berdad. Kisas e mas importante di tur, den un rol publico, accepta bo eror ta duna un ehempel y ta siña, vooral e siguiente generacion cu haci lo corecto no mester ta dificil.
Despues di a termina su IPA y a fungi como docente den scol basico, Sue- Ann Ras a bay specialisa den Papiamento y asina a traha como docente di scol secundario. Banda di esaki e tabata semper haci uso di su talento pa scirbi y traduci, cual el a sigui haci semper. Den ambito priva Sue-Ann ta un mama hands on y ehemplar di 3 yiu. Tur paso y decision cu e tuma, ta cu su tres yiunan den su pensamento.
Sue- Ann Ras no tabata un cara desconoci den comunidad pero a bira un figura publico na momento cu el a lansa su mes como candidato riba lista di Partido MEP, cu enfoke riba enseñansa. Como e number 15 riba lista y un cantidad di 362 voto riba su nomber, Sue- Ann tabatin e derecho di drenta parlamento despues cu MEP a logra forma un coalicion y asina oficialmente a bira un representante di pueblo.
Tur wowo tabata riba e fraccion aki, cu a priminti di bira un parlamento diferente na esunnan cu Aruba a conoce den pasado.
Kisas hopi a pensa cu paso e ta un muher atractivo y un persona cu ta gusta cuida su fisico y ta conciente di moda, Sue-Ann lo ta automaticamente un politico sin contenido.
E personanan aki a keda mustra lo contrario durante Sue- Ann su prome discursonan publico na unda tabata cla cu e tin su material bon studia y cu e si ta haci su huiswerk y a bin bon prepara pa hiba palabra. Riba media social y den corant e tabata un di e parlamentarionan mas activo y critico, specialmente riba su area di experticio.
E test mas grandi pa Sue- Ann su ‘backbone’ politico a bin, sinembargo, na momento c’un accion casual di su persona a keda graba y exponi pa publico y naturalmente, pa opinion publico. Despues di algun dia di reflexion, Sue- Ann a tuma kisas e accion mas importante den su carera politico y den su bida publico, uno cu lo mark’e pa resto di su bida, na nos parecer, den lus positivo. Acceptando su eror y dunando cara na su criticonan, Sue- Ann a entrega su asiento y a tuma distancia di su trabou como parlamentario.
E accion aki ta uno nunca bisto den politica di Aruba y Sue- Ann lo carga pa resto di su carrera e privilegio di por yama su mes e promer politico/ parlamentario cu tabata sa di tuma honor na su mes y tuma e decision mas poderoso c’un hende por tuma. E shock den comunidad tabata palpable, na unda porfin por a sinti c’un politico a haci locual votadornan tabata bogando pe pa hopi tempo y awor por tin un ehempel pa sigui. Cu su accion no solamente el a tuma control di su propio destino sino tambe a duna votadornan control bek riba locual por keda exigi di parlamento.
