Romina ‘Romi’ Martinez Giel (32) ta naci na Buenos Aires, Argentina, bibando y trahando na Aruba como un personal trainer. Romina ta conta cu desde chikito e ta scucha muchanan di su edad kier bira dokter of mama pero e no; di chikito e tabata sa caba cu ta un docente di educacion fysico e kier bira. Conoce mas di Romina…
INFANCIA
Romina ta conta cu su inspiracion tabata su omo.“Di chikito mi tabata wak mi omo como e ideal di locual ami tabata kier pa mi mes. Mi omo a studia pa e profesion aki y tabata un docente di educacon fysico. Mi mama tambe mi tabata wak como un ideal door cu mi mama tambe a sigui e mesun estudio aki pero mi mama nunca no a eherce e profesion aki aunke cu el a studia p’e.
‘Mi famia semper tabata un famia humilde cual a pone cu semper mi a bisa mi mes cu mi kier mas pa mi mes.Esaki a haci cu desde cu mi tin 15 aña poco poco mi a cuminsa crece y mi a siña cu mi por logra
tur locual mi propone mi mes y cu mi no mester di ningun hende pa sigui dilanti den bida. Ta na e momento aki mi a cuminsa studia educacion fysico y despues mi a haya trabou den zomer unda mi tabatin mi mesun campamento di zomer caminda mi a traha cu mucha y tambe cu adulto. Despues di esaki mi a cuminsa traha den diferente gym y vooral cu hopi grupo di hende muher cual a duna mi un felicidad inmenso.
Mi ta encanta traha cu hende muher paso cu mi sa cu mi ta yuda nan logra un mihor calidad di bida y esaki ta locual semper a interesa mi como persona, como muher y como ser humano”.
PROFESHON
Romina a traha na Argentina pa 7 aña na Megatlon cual ta un cadena di gym hopi conoci na Buenos Aires.
“Aki mi a conoce un grupo di hende muher tremendo cual te dia di awe, ki ora cu mi bay cu vakantie Argentina, mi ta topa cu e grupo aki. Tambe mi tin ainda algun amiga cu a cuminsa como mi promer alumno nan 12 aña pasa y te dia di awe nos ta mantene un bunita amistad. Esaki ta un muestra p’ami cu e relacion cu mi tin cu e perso- na nan cu mi ta train, no ta un relacion solamente di personal trainer y cliente, pero despues esaki ta bira un amistad cu mi ta keda mante- ne cu nan. Mi ta train hende muher paso mi ta wak hende muher, no como un curpa cu mester mehora of drecha, pero mi ta wak e hende muher como un ser integro, un ser cu tin dia lo ta den un bon ‘mood’ y tin dia no.Tin dia e lo lanta feliz y cu hopi gana di train y tin dia no. Of tin dia e lo lanta cu angustia of tristesa of sin animo cual ta normal, vooral paso cu nos ta ser humano cu diferente emocionnan.
Locual mi ta haya hopi importante den mi profesion ta pa wak cada hende como e persona cu e ta, e no ta solamente un curpa pero un persona completo. Aki mester wak no pafor so, pero paden di e per- sona tambe”.
DESISHON PA BIBA NA ARUBA
Romina ta conta cu el a yega Aruba despues cu e gym cu el a traha p’e a ofrece un trabou riba un barco crusero pa train hende durante nan estadia. “Mi a haya trabou riba e barco crusero MSC y mi tabata kier a sali di Buenos Aires, pues mi a tuma e trabou aki cu man habri. Locual a sorprendemi mas di e trabou aki ta cu mi a sera conoci c’un mix di cultura hopi diferente na locual mi tabata conoce na Argentina y esaki a hala mi atencion. Despues di esaki mi a haya e oportunidad pa bin Aruba c’un ex pareha dimi cu a bin Aruba pa biba y hunto nos dos a dicidi di muda. Despues di un aña mi ex pareha no a logra adapta su mes aki, mientras ami si y esaki a haci cu mi a dicidi di keda biba. Aruba a dunami oportunidadnan bunita.
SU PASION
Locual Romina ta gusta mas di locual e ta haci como personal trainer ta cu e por yuda cada hende yega na un mihor calidad di bida y na su turno ta percura tam- be pa duna nan alegria como personal trainer. “Mi ta purba semper na conquista e persona door di duna nan un alegria, pone nan hari. Hopi biaha nos no ta para keto na e hecho cu tin hopi hende cu tin problema cual ta un di e motibonan tam- be pa cual nan ta bay gym y como perso- nal trainer, aparte di yudanan cu nan bida saludabel, mi kier duna nan un felicidad y esaki ta locual mi ta haci cu pasion.’
Romina ta kere hopi den ley di karma y esaki ta e motibo tambe cu e ta gusta yuda tur hende cu e por.
