CU APENAS 26 AÑA, CHEF DE CUISINE DI CASA NONNA NA RITZ CARLTON ARUBA

  1. XCL: Bo a lanta cu mayornan dokter tur dos pero abo a scohe pa un ramo diferente cu ta Hospitality, specificamente cushina. Desde ki tempo esey a cuminsa domina den bo cabes?
    ROLLYN:
    Desde tempo mi tabatin 11 pa 12 aña mi a cuminsa sinti esaki un poco. Ya cu mi 13 pa 14 aña mi a cuminsa cushina. Mi tabata lanta trempan pa traha breakfast pa tur hende. Un tempo mi mayornan a purba motivami un poco pa wak si mi lo ta interesa den medicina, cual mi ta haya interesante pero e no tabata algo cu mi kier a haci.
  2. XCL: Kico a spierta e gana di hospitality de bo?
    ROLLYN: Ami lo bisa e amor pa cuminda tabata loke a spierta e gana aki.

  3. XCL: Unda ba haci bo studie?
    ROLLYN:
    Ma caba EPI akinan na Aruba, despues ma bai studia na Merca na Art Institute na Fort Lauderdale.

  4. XCL: Con bo experiencia di scol tabata na Aruba cu EPI?
    ROLLYN
    : Na EPI mi a cuminsa un poco mas laat cu e otronan pasobra mi a bin for di International School of Aruba. Esey tabata nifica cu mi mester a lesa hopi loke a haci cu mi tabata bon prepara den teoria mientras e otro muchanan tabata mihor prepara cumi den practica cu mas experiencia. Na Merca e scol tabata un estudio di 4 aña cu no tabata barata cual mi a logra caba den 2 aña y mei. Esaki a haci cu mi a logra spaar placa den loke ta vivienda y mi ‘day to day living’.

  5. XCL: Cua tabata bo prome experiencia di trabou?

    ROLLYN: Despues cu mi a caba di studia mi por a traha pa un aña na Merca cual oportunidad mi a haya via mi scol mes. E celebrity chef Masaharu Morimoto a bin e tempo ey skol pa un job fair y ami tabata un di e poconan cu keda escogi pa bai traha cu e chef aki.

  6. XCL: Con bo experiencia di trabou cu e celebrity Chef Morimoto tabata?
    ROLLYN:
    Mi tabata encarga pa haci tur e diferente sopinan y berduranan pero na final mi a termina ta traha tur caminda den e cushina. Mi tabata den tramite pa bira un junior chef den nan restaurant cu tabata bai habri na Orlando ora cu mi temporada di 1 aña a caba pero na final esaki no a bai door pavia di algun complicacion cu e papelnan locual tabata for di man di e compania y for di mi lastimamente. Asina mi a bolbe bek Aruba.

  7. XCL: Bek na Aruba, kico bo a haci?
    ROLLYN: Ora mi a bolbe Aruba mi tabatin 24 aña. Via chef Urvin di White Modern Cuisine, cu kende mi a yega di traha den pasado, mi a haya cotacto pa busca un trabou cu Ritz Carlton cu tabatin poco tempo di a habri.

  8. XCL: Den ki posicion bo a cuminsa na Ritz Carlton?
    ROLLYN:
    Mi a cuminsa den e posicion di Cook one, habriendo BLT Restaurant. Mi responsabilidadnan tabata pa encarga di e seccion di liña cayente. Pues mi tabata encarga cu e cuido y preparacion di e ingredientenan ta di mas balor.

  9. XCL: Cu 24 aña den un top kitchen di Ritz Carlton ta toch un bunita logro, bo no ta pensa?
    ROLLYN:
    Claro sigur cu si, paso Aruba ta un mercado chikito y e ta dificil tin biaha pa haya un trabou paso e candidatonan ta hopi kiermen ami ta pensa cu asina bo haya un bon oportunidad, gare cu dos man.

  10. XCL: Pa cuanto tempo ba keda den e posicion aki?
    ROLLYN:
    Mi a hacie esaki pa mas o menos 4 luna y depues ma haya e oportunidad pa bira supervisor di cushina. Y ma tuma e oportunidad y asina ma bira e supervisor di cushina na Steak House, despues mi a bay traha den banquet unda mi tabata ora cu e oferta pa Casa Nonna a surgi.

  11. XCL: Con e oportunidad pa bira Chef de Cuisine pa Casa Nonna a origina?
    ROLLYN: 
    Mi tabata sa cu e posicion pa un Chef de Cuisine pa e restaurant nobo Casa Nonna a habri. Mi tabata e tempo aki hopi druk cu mi trabou den banquet y aunke e tabata den mi cabes pa aplica, mi no a logra haya e tempo pa haci esaki. Nos Executive Chef a bin serca mi puntrami pakico mi no a aplica ainda paso varios supervisor a aplica menos ami. E ora mi a traha tempo y a manda mi aplicacion aden. Na December di 2017 mi a haya sa cu mi a keda escogi y pa Januari 2018, mi a cuminsa traha oficialmente cu Casa Nonna.
  12. XCL: Con bo preparacion pa reto nobo aki tabata?
    ROLLYN:
    Mi a sigui un entrenamento na New York di 2 siman pa familiarisa cu e standard di e restaurant. Aki mi a haya e preparacion necesario pa garantisa e mesun nivel culinario cu Casa Nonna ta brinda na New York, awor na Aruba tambe. E tabata excited y pa cierto cosnan e tabata complica pasobra mi mester a siña ta kico ta nan touchnan paso na final bo sa traha un tomate sause etc pero bo mester siña kico ta haci Casa Nonna diferente di tur e otro restaurantnan Italiano.

  13. XCL: Kico bo responsabilidadnan awor den bo posicion como Chef de Cuisine pa Casa Nonna ta encera?
    ROLLYN:
    Mi ta guia tur e trahadornan, traha schedule, check si e pedidonan ta yegando, wak pa tur cos ta na ordo, wak kico ta bende kico no ta bende, Bo responsabilidad e no ta djis para den cushina y wak tur loke hende ta haciendo e ta tuma hopi mas detaye cu djis e responsabel pa un cushina. Mi no t’ey djis pa manda sino pa guia tur hende. Semper mi ta bisa e trahadornan cu mi ta available pa yudanan, tur dia mi ta puntranan kico nan mester ayudo den dje y asina mi por planea mi dia tambe.
  14. XCL: Bo ta sinti cu ba jega na e final di e trapi of bo ta wak cu bo tin mas stap pa dal?
    ROLLYN:
    Semper bo por sigi crece y mi ta habri pa esaki. Mi ta kere den keda siña mas cu bo por. Mi tin un ambicion futuro di por ta un docente den e ramo aki un dia. Mi ta kere den comparti loke abo sa na otronan.

  15. XCL: Ki lo ta bo conseho pa otro hobennan eyfor cu tambe lo kier yega na logronan grandi manera abo te awor?
    ROLLYN:
    Prome bo cuminsa y dicidi cu ta chef bo kier bira corda na realisa cu bo bida ta bay cambia. E trabou aki ta un trabou cu bo mester tin hopi amor y dedicacion p’e. Tin biaha mi ta drenta di mainta y ta sali te anochi for di ‘kinan. E ta un trabou di oranan largo y no tur ora tur cos ta bunita. Bo mester duna di bo mes y haci bo trabou corecto cu hopi disciplina y consistencia, pero e ta tambe un bunita trabou.

     

Mi ta kere den siña mas cu bo por.