E tabata un mucha hopi alegre, e tabata gusta competi, semper e kier ta e miho den loke e tabata haci. Justin tabatin un carisma asina special cu tur hende tabata stime manera cu nan conoce. E tabata un mucha cu cualkier tata lo kier tin como nan yiu”. Esaki ta djis algun di e cantidad di formanan bunita yena cu orguyo cu Oldric Fernandes (43) ta describi su yiu homber Justin, kende a fayece na September 2018 cu 8 aña, den un teribel accidente na Miami. Tres luna leu di e prome aniversario di Justin su fayecimento, na vispera di e celebracion di dia di Tata, nos a sinta cu su tata Oldric pa conoce un poco di su mes y su otro yiunan y su forsa pa continua despues di e dolor di mas grandi cu cualkier mayor lo por pasa aden na bida.

UN BON BASE

Oldric ta considera su mes un bon tata, un tata cu ta asumi su responsabilidad pa su yiunan no djis cuidandonan, pero ta ey pa nan tambe fisicamente. “Mi ta un tata responsabel, mi no ta un tata cu a djis traha un yiu y bente y no zorg p’e, semper mi a zorg pa mi yiunan y pasa tempo cu nan”. Probablemente, e sensacion di responsabilidad aki ta bin desde su niñez caba, temporada cu e ta corda unda cu su rutina cu su famia tabata bay lama. “Nos tabata pasa basta tempo hunto como famia. Den e momentonan cu mi tata y mi mama tabatin liber, nos tabata pasa esaki hunto. Mi a lanta pariba di brug cu mayornan cu a sa di dunami un bon educacion. Nan a siñami pa mi traha pa mi por yega na mi mesun cosnan. Temponan aya tabata diferente. Mayornan tabata enfoca mas p’asina por hinca nan yiunan den deporte y compañanan na esakinan tambe. Mi tabata un mucha homber cu tabata gusta diferente deporte y mi tabata pusha mi mes semper pa mi por a bay mi diferente deportenan cu mi tabata gusta. Cu mi yiunan mi a haci mescos y mas ainda…

TATA PA PROME BIAHA

Oldric tabatin 20 aña ora el a bira tata pa prome biaha, e tabata sigur demasiado hoben ainda pa compronde completamente kico esaki tabata nifica y con esaki lo bay influencia su bida, pero asina mes el a asumi su responsabilidad den e rol aki. Ora Justin a nace, e tabatin 35 aña. Ya mas madura, Oldric ta bisa cu Justin a trece un alegria increibel den su bida y di su famia completo. “Justin a siñami ta un tata cu por brasa su yiunan sin tin miedo, e tabata un mucha stima pa full famia. El a siñami pa habri mi curason pasobra mi tabata un tata hopi seco. E ‘bond’ cu mi tabatin cu Justin tabata uno special y te awe inexplicabel” Oldric ta conta cu emocion. “Nos relacion tabata super bon, e tabata un yiu cu tabata stimami hopi, semper ora mi yega cas of buske for di scol e tabata core brasami. E semper tabata cumi den camber compartiendo hunto ya cu e tabata e yiu homber di mas grandi”. Un ‘bond’ cu tata y yiu tabata comparti sigur hunto tabata den deporte. “Loke nos tabata gusta haci tabata karting. Nos tabata bay tur atardi, nos no tabata skip ningun dia, nos tabata bay por lo menos 6 biaha pa siman ”. Apesar di su edad, Justin tabata campeon den e deporte varios biaha.“Justin a bin na e mundo aki c’un mishon paso el a siñami diferente cos pero Justin su mishon a caba awor na e mundo aki, Oldric ta bisa preparando pa repasa e dia scur ey cu el a perde su yiu stima…

SEPTEMBER 13,2018

Kico a pasa e dia di e accidente? “E tabata e momento mas dificil di mi bida, nos plan tabata pa bay Disney World pero nos a yega un dia prome Merca p’asina Justin por a bay bishita su mama y conoce unda e mama tabata biba ya cu Justin mes a pidi mi pa esaki” Oldric tabata compaña pa Justin su ruman di mas chikito Colin tambe. “Nos no tabatin ni mei ora na e mama ora cu e accidente aki a pasa. Mi yiunan tabata hungando ‘hide and seek’ ora cu nan a topa c’un porta caminda esaki ta ‘suppose’ di hiba na e lobby solamente pero nan a subi un trapi cu tabata bay na un porta cu no tabata sera na lock y nan a djis pusha esaki y termina riba e dak (rooftop) cu e porta sera nan tras. Colin a conta cu tabatin un momento cu Justin a manera drenta den panico y a bise cu e lo bula riba loke el a yama of confundi pa un “Trampulin” cual tabata un canopy afdak abou den e patio y e cu e lo bin ariba bek p’asina e por habri porta p’e di paden. Na prome momento Justin tabata kier pa Colin bula cune pero Colin a bise, You gonna die, you gonna die.

Tabata manera un mal soño cu te awe Oldric kier pensa cu e ta aden y cu ainda e tin cu spierta for di dje.“Mi no por a kere cu mi yiu a fayece. Ami semper a cuida mi yiunan asina hopi. Den e momento ey loke a pasa den mi cabes ta cu mi tabata bezig ta soñando, mi no por a kere loke mi tabata bibando.

Mi a purba na tene mi mes calmo door cu mi tabata cu mi otro dos yiunan Colin y Scarlette, tambe”. Colin, kende tabata cu Justin e momento lamentabel ey riba e dak, Oldric mester a trata na consola tambe entre tur cos. “Mi a papia cune splicando cu no tabata su fout, pa e keda trankilo y cu Justin a tuma un mal decision”, e tata desconsola ta corda. “Na e momento cu e accidente a pasa, nos a bay hospital den helicopter y mi tabata cu Justin den tur e momento ey. E no a fayece di biaha na e lugar di e sucedido y no tabatin sanger ningun parti di su curpa p’esey na e momento ey ainda, mi no por a pensa di ki haltura el a cay ni con e cosnan por a pasa”.

INVESTIGACION

“Colin a conta e polisnan con tur cos a sosode. Con su ruman hunto cune tabata hunga y a termina riba e dak. Investigacion a saca afo cu e fout tabata di e personal di edificio. Na e porta no tabatin sensor p’asina nan por a monitor ora cu pa un of otro motibo, e porta aki keda habri”. Bo ta kere cu tin eror di parti di e hotel/structura cu por a evita loke a pasa cu bo yiu? Mi ta sigur cu ta nan fout y investigacion a demostra esaki tambe. Nan ta 100% culpabel di e morto di mi yiu, pasobra no ta cu mi no tabata pendiente di nan pasobra nan tabata den camber mientras mi tabata den sala ta reserva hotel p’asina nos por bay Disney. Muchanan ta curioso y den esey nan a haya e porta di emergencia unda cu esaki ta supose di dirigibo solamente na e lobby pero nan a subi trapi bay ariba haya un porta cu mester tabata na lock y a termina riba dak di e edificio. Mi ta bezig c’un caso contra nan. Mi sa cu esaki no ta bay trece mi yiu bek pero esaki ta pa nan percura pa esaki no pasa nunca mas cu ningun otro mucha”.

UN OTRO PERSONA CU A YEGA DI PERDE SU YIU SO POR COMPRONDE E DOLOR CU MI TA SINTI

CONSUELO Y FUTURO

Con pa continua despues di un tragedia asina ta un pregunta cu hopi hende lo tin. “Te dia di awe mi no por haya consuelo, e ta algo cu nunca mi lo por recupera di dje, mi tin cu siña biba cu e dolor”, Oldric ta bisa. “E ta un dolor cu mi no por splica. E perdida di un yiu hopi hende no lo bay compronde solamente un otro persona cu a yega di perde un yiu so por compronde e dolor cu mi ta sinti. E ta un dolor cu bo no por splica y cu bo tin cu djis biba cune paso e ta algo cu nunca mas lo kita, esey ta 100% sigur. E tabata mi yiu y no solamente mi yiu pero e tabata un yiu hopi special p’ami. E tabata nifica hopi p’ami, cu su 8 aña, el a siñami hopi cos den e bida aki. Tin biaha hende sa wakmi pero e realidad ta cu nan no sa mi dolor. No ta pasa un dia cu mi no ta pensa riba mi yiu homber. Nan ta bisa cu tempo ta calma e dolor pero e realidad ta cu tempo, e ta bira mas dolor. Mi pareha actual ta un sosten hopi grandi yudando mi cu mi perdida. Enberdad mi no sa di unda mi ta saca e forsa pero mi tin mester di sake paso mi tin mas yiunan chikito, Colin 7 aña, Scarlet 5 aña y Max di 1 aña y mi tin cu bay dilanti pa nan y cu nan. Mi no por laga mi mes cay paso ken lo cuidanan.

FUTURO

Con bo ta sigui p’adilanti awor pa bo otro yiunan? Mi ta purba na haci actividadnan cu nan bek maske tin biaha esaki ta dificil paso ainda mi no por acepta cu Justin no t’ey. Tabata ami cu mi tres yiunan y diripiente a bira ami cu mi 2 yiunan. Semper mi tabata bay cine cu nan, bay pool, Coney island y diferente cosnan cu tabatin, ami tabata hibanan.

Mi no ta e mihor tata pero mi ta sigur sigur cu mi a y ta inverti hopi pero hopi tempo den mi yiunan compara c’un otro tata cu kizas no tin e tempo ey pa inverti den nan yiu(nan) door di trabou of otro cosnan. Ami por haci esaki door cu mi ta doño di mi propio negoshi y mi tabata percura pa parti mi tempo pa t’ey cu mi yiunan.

JUSTIN TA UN ANGEL AWOR

Con boso ta recorda Justin?

“Nos ta haci misa pa Justin y mi a splica mi yiunan cu Justin ta un Angel awor y cu e semper lo keda den nos curason. Justin lo keda cuida y guianan. Justin a haci aña di 25 di april y nos a bay santana hunto y a hiba un bolo, un regalo pa Justin y nos a canta Happy Birthday p’e. Mi yiunan ta compronde cu Justin no t’ey mas, principalmente Colin cu tabata hopi pega cu Justin. Nan tabatin casi mesun edad y e tabata su mihor amigo.

Recien bo a conoce un otro tragedia pero toch cu a bin c’un bendicion, conta nos di esaki?

Mi tabata den un relacion c’un mucha muher y di esaki mi yiu Max a nace pero e relacion no tabata stabil y nos a separa. E mama a keda cu Max pero recientementa e mama di Max a fayece y asina ami a haya e voogd di mi yiu Max. Mi ta haya Max ta parce Justin masha hopi mes. E ta mesun color cu Justin mesun hyper cu ora Justin tabata chikito. E ta duna mi un trankilidad di tin un yiu mas na cas y asina completa mi famia atrobe na 3 yiu.

CONSEHO

Ami no por bisa kico e otro tatanan por haci pero si mi por consehanan pa inverti tempo cu nan yiunan. Wak kico bo yiunan gusta, kico nan mester, purba na dedica tempo na nan. No djis traha yiu y bente un banda, sea responsabel pa bo actonan”