E burgemeester di Amsterdam Femke Halsema, kier cambionan grandi of hasta kizas mira e Rosse Buurt-De Wallen, e ‘Red light district’ di e ciudad desaparece y bira algo di pasado segun su plan presenta ayera, diaranson ultimo.

E burgemeester ta  di opinion cu esaki lo marca final na un situacion inacceptabel pa e forma di trata muhernan  y e acoso di e cantidad di turistanan pa cu e trahadornan sexual cu ta traha eynan. “Nos ta cla pa pensa riba mihor solucionnan pasobra situacionnan cu ta tumando lugar den e area aki ta inacceptabel”, e Burgemeester di e partido Groenlinks a bisa despues di a presenta su plan cu 4 alternativa pa futuro di ‘Rosse Buurt’ na Amsterdam.

E proposicionnan ta varia  entre sea sera e cortinanan di e showcase, unda muher y hombernan ta prostitui nan mes, p’asina nan no ta visibel mas na e publico riba e cayanan pafor te na eliminacion completo di e parti aki di e districto y muda esaki pa un otro lugar. E Burgemeester ta bisa cu su intencion no ta pa core cu e trahadornan sexual for di Amsterdam sino pa busca mihor condicionnan di trabou pa nan. Esaki ta debi na e cantidad di kehonan di e ultimo añanan di e molester di turistanan cu ta gritanan, saca nan potret y cu nan aglomeracion, ta stroba e trahadornan sexual di haya nan clientenan den forma trankil. E Burgemeester ta bisa cu e reglanan nobo lo yuda na combati e turismo masivo na e area aki como atraccion na e prostitucion y otro actividadnan ilegal liga na esaki manera traficacion di muhernan pa prostitucion. E cambionan lo yuda na reduci e desorden den e area aki cu ta afecta otro negoshantenan tambe, segun e burgemeester.

“E cambio ta posibel, e lo tuma tempo y placa”, Halsema a bisa. E plan ta pa discuti e proposicionnan riba mes cu tur e partidonan afecta e luna aki mes cual ta inclui e trahadornan sexual mes como tambe residentenan di e cuidad.

E plan aki representa e mas recien intento pa trece cambio na e area aki di Rosse Buurt cu ta consisti di no menos cu 330 showcase (bentana) di prostitucion. E ultimo intento prome cu esaki tabata pa baha e cantidad di showcase, pero cual a bay sin exito. E area aki ta uno cu ta existi pa siglonan caba unda awendia pa 50 euro clientenan por haya 15 minuut di un tipo di servicio sexual.